Natuvenye kuna kuparuka posiruwo esi tuna kundindira “ekundungu lyenene,” eli ga tumbwire Jesus asi “udigu wounene.” (Mateusa 24:21) Kapi tatu vhuru kuhenduka udigu ou. Nye kuvhura tu rugane ko yuma yipo ngatu paruke. Yisinke natu rugana?

PEudiso lyendi lyopoNdundu, Jesus Kristusa kwa geve epukururo eli asi: “Yipo nye nomu hovera tanko kupapara Untungi waKarunga neyi ga hepa ko kweni.” (Mateusa 6:33) Ngapi natu yi rugana oyo?

Kuhova tanko kupapara Uhompa waKarunga. Eyi kutanta asi twa hepa kutura Uhompa waKarunga muhowo kupitakana nkenye eyi. (Mateusa 6:25, 32, 33) Morwasinke? Morwa vantu kapi ava vhuru kukohonona po maudigu gawo. Nye Uhompa waKarunga welike ngau vhura kugusa po maudigu govantu.

Kupapara eyi ga hepa ko Karunga kwetu. Twa hepa kuhetekera ko paapa twa hulira pokukwama noveta daJehova. Morwasinke? Morwa nsene tu dira kudikwama nokutokora kurugana yeeyi tuna hara, yitundwamo ngayi tu twaredesa kokudona. (Yisewe 16:25) Nye nsene tu kwama noveta daKarunga, ngatu gwanena mo mauwa ntani ngatu hafesa Karunga.—Jesaya 48:17, 18.

Yipo nye nomu hovera tanko kupapara Uhompa waKarunga neyi ga hepa ko kweni. Jesus kwa rondwere asi vamwe ngayi va donganesa yimaliwa nokugazara asi nsene va yi lipongaikira ngava gwana epopero. Ano vamwe ngava kara nosinka sosinene seyi yeparu, makura kapi ngava kara nosiruwo sokupapara  Uhompa waKarunga.—Mateusa 6:19-21, 25-32.

Nampili ngoso, Jesus kwa tumbwidira asi ava ava kwatesa ko Uhompa waKarunga ngava gwana eyi va hepa ngesi, ano komeho ngava ka hafera mauwa gokudira kuhaga.—Mateusa 6:33.

Nampili ngomu varongwa vaJesus woposiruwo sina va hovere tanko kupapara Uhompa waKarunga neyi ga hepere ko kwawo, kapi va mwene uhura woyininke nayinye eyi ayi retesa po kukora. Nye va gwene epopero. Monkedi musinke?

Awo kwa parukire kuliza nonompango daKarunga, ano eyi ya va poperere va dire kuhonena yikara yoyidona yava ngava dili kukwama nompango daKarunga. Ehuguvaro lyawo moUhompa kwava vaterere va lididimikire maudigu gomanene aga ngava ligwanekere nago. Ntani Karunga kwa va pere ‘nonkondo dononene’ yipo va lididimikire maudigu ogo.—2 Vakolinte 4:7-9.

Vakriste womosiruwo sovapositoli kwa limburukwire mpangera zaJesus zokuhova tanko kupapara Uhompa. Awo ngava zuvhisa mbudi zongwa zoUhompa nkenye oku ngava gwana vantu. (Vakorosi 1:23) Poveli vana kuzuvhisa naina ndi?

Nhi! Nombangi daJehova da dimburura asi ntaantani tupu Uhompa waKarunga ngau ya guse po uzuni ou. Eyi yiyo ava tulire pasirugana nonkango daJesus edi asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.”—Mateusa 24:14.

No tambura mbudi zongwa ndi? Kuna kukukorangeda o honene vantu womositata saBereya moMakedoniya. Apa mupositoli Paurusa ga va zuvhisilire mbudi zongwa kuhamena Uhompa, awo “nonkango kwa di tambwire nawa-nawa.” Awo hena “ngava konakona nkenye ezuva matjangwa” yipo va dive yininke eyi nsene asi yimo sili, makura tava tura pasirugana eyi ngava lirongo.—Yirugana 17:11, 12.

Nove kuvhura o rugane yokulifana. Nsene o hova tanko kupapara Uhompa neyi ga hepa ko Karunga kwetu ove ngo gwana epopero ngesi, ano komeho ngo ka hafera mbili nompora.