Morwasinke twa hepera Uhompa waKarunga?
Kutunda tupu apa ga sitire muntu, Musiti gwetu, gedina Jehova, yige gelike ga kere Mupangeli. Age kwa ruganesa upangeli wendi monkedi zeharo. Age kwa pere vantu embo lyewa, sikunino saEdeni, va tunge mo, ntani kwa va pere nondya dononzi. Ntani hena, kwa pere vantu sirugana somulyo. (Genesis 1:28, 29; 2:8, 15) Vantu ngano va kwatesere ko upangeli waKarunga, ngano va kara mombili.
Vantu wokuhova kwa nyokere Karunga a kare Mupangeli gwawo
Bibeli kulikida asi muengeli gomurwanesi, ogu ga divikwa asi Satana Muzonaguli, kwa rwanesere nkedi zaKarunga zokupangera. Age kwa tente asi vantu ngava gwana ruhafo nsene va nyoka mavyukiso nepangero lyaKarunga. Eguwo, vakurona vetu wokuhova, Adamu naEva, kwa pulire yimpempa yaSatana ntani kwa rwanesere Karunga.—Genesis 3:1-6; Ehororo 12:9.
Morwa Adamu naEva kwa nyokere Karunga a kare Mupangeli gwawo, awo kwa zumbanesere Paradisa nehuguvaro lyokukaparuka narunye ntani neparu lyokusikilira mo. (Genesis 3:17-19) Etokoro lyawo kwa ya kundamene ruvharo rwawo. Morwa Adamu kwa zonene, Bibeli kutanta asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa.” (Varoma 5:12) Nzo kwa twaredesa hena koudigu umwe: “Mouzuni omu mwa kara vanankondo ava ava hepekere mo vakwaawo.” (Muudisi 8:9) Eyi kutanta asi nsene vantu va lipangera vene, maudigu kuligwederera.
UPANGELI WOVANTU TAU TAMEKE
Nimuroto kwa rwanesere Jehova
Mupangeli gokuhova va tumbura moBibeli kwa kere Nimuroto. Age kwa rwanesere upangeli waJehova. Kutunda tupu momazuva gaNimuroto, vanankondo kwa ruganesa nonkondo dawo monkedi zepuko. Konyara nomvhura 3 000 da ka pita, hompa Saromo kwa tjenge asi: “Ava ava hepeke kulira kwelike va kerera, . . . , morwa vahepeki vawo va kara nononkondo kombinga zawo.”—Muudisi 4:1.
Eyi yiyo yina kuhoroka naina. Momvhura 2009, simbapiratjangwa sombunga United Nations kwa tanta asi ya lihorora nawa-nawa asi sinzi somaudigu mouzuni “kugaretesa po morwa kupangera monkedi zepuko.”
SIRUWO SOKURUGANA KO YUMA!
Vantu va hepa vapangeli wovawa ntani epangero lyewa. Ntani eyi yiyo ga tumbwidira Musiti gwetu!
Nampili mapangero aga ava gazara vantu asi mawa, kapi ya ga tompoka kugusa po maudigu govantu
Karunga ga tulisa po Uhompa ndi epangero, eli ngali ka gusa po mapangero govantu, makura ‘ngali kara dogoro narunye.’ (Ndaniyera 2:44) Ou yiwo Uhompa ava kanderere sinzi sovantu. (Mateusa 6:9, 10) Nampili ngoso, Karunga kapisi yige nga pangera. Nye ga horowora Mupangeli ogu ga ya parukire ngomuntu. Yilye ogu ga horowora Karunga?
