Jesus kwa tente asi: “Nomuhoko ngadi livyuka ano yi kare yirongo ngayi livyuka. Ako ngaku kara makankamo gomanene gevhu nerumbu pomavega peke-peke nehamba lyomukagu.” (Rukasa 21:10, 11) Yihorokwa nayinye eyi yina kuhoroka posiruwo simwe tupu kuna kara sidiviso esi sina kulikida asi “Untungi waKarunga pepi nye una kara.” Yihorokwa yangoso ya horoka posiruwo simwe tupu mouzuni mudima ndi? Konakona maumbangi aga gana kukwama ko.

1. YITA

Momvhura 1914, kwa kere ko yita eyi ya dira kuhoroka rumwe kutundilira kesito lyovantu. Vanahistoli kutumbura mvhura 1914 asi mvhura zerunduruko morwa yipo ya tamekere yita yokuhova mouzuni mudima. Yita oyo yiyo yokuhova va ruganesere yirwiso youhungu ngwendi emukanona, nondira dokuganda noboma, mauta gomanene, ntani yirwiso youhungu. Ano eyi kwa twaredesere koyita yauvali youzuni mudima, omu va ruganesere noboma douhungu unene. Kutundilira momvhura 1914, vantu kwa rwa yita komavango gokulisiga-siga ntani ayo kwa dipaga vantu wovanzi.

2. MAKANKAMO GEVHU

Buke Encyclopædia Britannica kutanta asi nkenye mvhura makankamo gevhu gomanene gokusika 100 kwa retesa po ‘ezonauko lyenene.’ Ntani mbunga United States Geological Survey kwa rapota asi “kuliza nomarapoto gomanzi (kutundilira momvhura 1900), ose kuna kundindira makankamo gevhu gomanene konyara 16 nkenye mvhura.” Vamwe kwa tanta asi nampili ngomu pwa kara mahina aga aga likida asi ngesi makankamo gevhu ta ga ka horoka, nye simpe sinzi sovantu kufa. Yosili, makankamo gomanene gevhu aga gana kuhoroka mouzuni kuna kuretesa po ruhepo ntani kuna kudipaga vantu wovanzi.

 3. ERUMBU NDI NZARA

Eyi yina kuretesa po nzara kuna kara yita, ezonauko, udigu woyimaliwa, kudira kulima ndi kuzangura nawa ntani mukarompepo goupyu unene. Mbunga ezi za kara nosinka seyi yonondya uzuni mudima kwa rapota asi “ekonakono lyomomvhura 2018” kutanta asi: “Mouzuni, vantu wokusika pomamiliyona 821 kapi vana kugwana nondya dokugwanena po ntani wokusika pomamiliyona 124 kuna kufa konzara.” Ayo kwa yi gazarera asi nkenye mvhura, vanona wokusika pomamiliyona gatatu kufa kouvera wonzara. Mvhura 2011, kwa likida asi harufa zovanona kufa kouvera wonzara mouzuni mudima nkenye mvhura.

4. MAUVERA

Simbapiratjangwa soMbunga zoUhaku zomoUzuni kwa tanta asi: “Monomvhura edi dantani kwa di tanta asi nomvhura domauvera gomanzi. Mauvera ganare kuna kara ezimo lyokusinsana [ndi Cholera] ntani wokukora moyisupa nokupyapyara ntani sipapa kulitjindja uhenga [ndi Plague and Yellow fever], ano gomape kuna kara uvera womomapunga [ndi SARS], esasika lyokukagura [ndi Pandemic influenza], uvera wokutunda koyikorama [ndi MERS], Ebola ntani uvera wokuzuga morutu [ndi Zika].” Nampili ngomu vadiviunsitwe novandokotora va lironga unene kuhamena mauvera, simpe kapi va gwana uhaku womauvera nagenye.

5. SIRUGANA SOKUZUVHISA UZUNI MUDIMA

Jesus kwa tumbwire ruha rumwe rosidiviso apa ga tente asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” (Mateusa 24:14) Nampili ngomu gana vhuka maudigu mouzuni, vantu wokupitakana pomamiliyona 8 wokonomuhoko nadinye kuna kuzuvhisa mbudi zongwa zoUhompa waKarunga kovantu womoyirongo yokusika 240 ntani kuna kuruganesa maraka konyara 1 000. Eyi kapi ya horoka rumwe mouzuni.

Yihorokwa yosidiviso esi ga tente Jesus kuna kuhoroka ngesi. Yisinke natu lirongera ko? Jesus kwa tente asi: “Nsene tomu yi mono tayi horoka, diveni asi Untungi waKarunga pepi nye una kara.”—Rukasa 21:31.

Sidiviso esi ga tente Jesus ntani neyi za uyunga ko Bibeli, kutuvatera tu kwate egano asi Karunga ga tura po nare Uhompa wendi meguru momvhura 1914. * Posiruwo sooso, yipo Karunga ga tulire Munwendi, Jesus Kristusa, a kare Hompa. (Episarome 2:2, 4, 6-9) Apa ngau pangera Uhompa waKarunga ngau ya gusa po mapangero nagenye ntani nokuyaninka evhu li kare Paradisa omu ngava paruka vantu narunye nanarunye.

Makura nonkango demekanderero eli ga rongere Jesus ngadi ka sika mo: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:10) Yisinke wa rugana Uhompa kutunda tupu apa va u tulisire po meguru momvhura 1914? Ntani yisinke tuna kundindira apa Uhompa ngau ya pangera apa pevhu?