• Nga mu horowora Karunga. “Ame nare na tura HOMPA gwange . . . Ame kuna hara ni gave nomuhoko di kare upingwa woge, ano mauhura gouzuni ga kare emona lyoge.”—Episarome 2:6, 8.

• Nga pinga uhompa waNdafita. “Munona kuna mu tu hampurukire! Munona gomugara kuna mu tu pe . . . Nonkondo depangero lyendi ngadi kura ngorooro; ano untungi wepangero lyendi ngau kara nkenye apa mompora. Age nga pangera ngomukwami gwahompa Ndafita, nonkondo dendi nga di ruganesa pauhunga nopausili.”—Jesaya 9:6, 7.

• Ngava mu hampurukira moBeterehema. “Ove Beterehema . . . , moge yimo ngani gusa mupangeli . . . vantu womouzuni ngava dimburura unene wendi.”—Mika 5:2, 4.

• Vantu ngava mu nyoka nokumudipaga. “Ngava mu swaura, kapi ngava mu tara eho. . . . Mayipiko getu ga mu wurwisa, age kwa mu sansununa morwanonzo detu.”—Jesaya 53:3, 5.

• Ngava mu pindura koufe nokumuyererepeka. “Mwenyo gwange kapi ngo gu sigilira mosirongo sovafe, ndi Mupongoki goge o mu sigilire nye a wore. . . . Korulyo roge uwa wanarunye wa kara ko.”—Episarome 16:10, 11.

Mehistoli lyovantu, muntu gumwe tupu ga wapera eyi vana tumbura mosirongwa esi, ano muntu ogo kuna kara Jesus Kristusa. Muengeli kwa tanterere Mariya, zinyaJesus asi: “Hompa Karunga nga mu pa uhompa wazinakuru Ndafita, . . . ano uhompa wendi kapi ngau paka uhura.”—Rukasa 1:31-33.

Jesus kapi ga kere mupangeli apa pevhu. Nye age nga pangera vantu ngaHompa goUhompa waKarunga kutundilira meguru. Yisinke ayi mu ninkisa a kare mupangeli gomuwa? Tara eyi ga rugene Jesus apa ga kere pevhu.

•   Jesus nga pakere mbili vantu. Jesus kwa vaterere vagara, vakadi, vanona, vakondi, yi kare asi ntundiliro zawo musinke ndi yitumbukira yawo musinke. (Mateusa 9:36; Marukusa 10:16) Apa munayingondwe ga mu likwamberere asi: “Sinene o yi panga, kuvhura kuverura nge,” Jesus kwa mu gwililire nkenda makura ta mu verura.—Marukusa 1:40-42.

• Jesus kwa tu ronga omu natu hafesa Karunga. Age kwa tente asi: “None nokuvhura si kukerera Karunga nomamona.” Jesus kwa tente hena asi nsene tuna hara vantu va tu tekure monkedi zongwa, nose twa hepa kuvatekura moomu twa va harera va tu tekure. Age hena kwa yi likidire asi Karunga kapi a mono tupu eyi atu rugana nye hena ga diva eyi atu gazara nomu atu lizuvhu. Yipo nye, mokuhafesa Karunga, twa hepa kupangera malizuvho getu. (Mateusa 5:28; 6:24; 7:12) Jesus kwa nkondopekere asi mokugwana ruhafo, twa hepa kudiva eyi ana hara Karunga tu rugane nokuyisikisa mo.—Rukasa 11:28.

• Jesus nga rongo eyi ayi tanta kuhara wopeke. Nonkango noyirugana yaJesus kwa kere nononkondo ntani kwa gumine nomutjima dovantu. “Mbunga kwa tetukire unene erongo lyendi. Yeeyi age kwa va rongere nononkondo.” (Mateusa 7:28, 29) Age kwa va rongere asi: “Omu hare wonkore zeni.” Age kwa kanderere po vamwe ava va mu dipagere asi: “Tate, va dongwenena po, yeeyi kapi vana diva eyi vana kurugana.”—Mateusa 5:44; Rukasa 23:34.

Jesus yige ya wapera kukara Mupangeli gomuwa gouzuni ou. Nye siruwoke ga tameka kupangera?