Mosirongwa sina ka pita, kuna zogere sidiviso esi ga geve Jesus. Sidiviso oso kugava umbangi asi Uhompa waKarunga vau tulisa po meguru, ano Jesus yige Hompa.

Bibeli kutanta asi apa Jesus va mu tulire a kare Hompa, Satana novaengeli vendi kwava zugumine mo meguru. Ngesi Satana novaengeli vendi pevhu vana kara, eyi yiyo yininke ya donapera unene kutundilira momvhura 1914.—Ehororo 12:7, 9.

Nampili ngomu una donapa uzuni, Jesus, Hompa goUhompa waKarunga, kwa rugana ko yuma mokuvatera vantu apa pevhu. Morwa sirugana sokuronga Bibeli uzuni mudima esi ga pumbire Jesus, wovanzi kuna kulironga Bibeli nokusikisa mo eyi vana kulironga. (Jesaya 2:2-4) Wovanzi kwa lironga omu nava kara nonkareso zongwa koyirugana, nomu nava vatera epata lyawo ntani omu nava kara nomutaro gouhunga koyirugana yopanyama. Awo hena va lironga omu nava gwanena mo uwa ngesi nokukara vantu ava ana hara Karunga va ka kare mepangero lyoUhompa wendi.

Nampili ngomu Jesus ana kupangera meguru, mapangero govantu simpe kuna kupangera pevhu. Nampili ngoso, Karunga kwa tanterere Jesus asi: “Pangera nonkore doge.” (Episarome 110:2) Jesus ntaantani a ya pangure nokuzonagura po varwanesi navenye ntani nokukareta epwizumuko kwava ava limburukwa Karunga.

Posiruwo oso, Uhompa waKarunga ngau ka rugana eyi yina kukwama ko:

•  Ngau ka zonagura po ukarelikarunga woyimpempa. Maukarelikarunga nagenye aga aga rongo vantu yimpempa kuhamena Karunga ntani nokuvaninkilira mo ngava ka ga zonagura po. Bibeli kutumbura ukarelikarunga woyimpempa asi hondedi. Ezonaguro lyoukarelikarunga ngali tukukisa wovanzi.—Ehororo 17:15, 16.

•  Ngau ka hagekesa po upangeli wovantu. Uhompa waKarunga ngau zonagura po mapangero govantu.—Ehororo 19:15, 17, 18.

•  Ngau ka gusa po vadinikarunga. Ngapi kuhamena ava va tokomena kurugana yininke yoyidona nokunyoka kulimburukwa Karunga? “Karunga nga nyafura mo vadinikarunga mosirongo.”—Yisewe 2:22.

•  Ngau ka zuguma Satana novaengeli vendi. Satana novaengeli vendi kapi ngava vhura hena “kupukisa nomuhoko.”—Ehororo 20:3, 10.

Yisinke ngayi ka horokera ava ava kwatesa ko Uhompa waKarunga?

NgaHompa meguru, Jesus nga sikisa mo yoyinzi kupitakana nkenye mupangeli govantu. Age ngava ka mu vatera vantu 144 000 ava va zowora pevhu va ze meguru. (Ehororo 5:9, 10; 14:1, 3) Age nga divilisa asi mpango zaKarunga kuna kuzisikisa mo pevhu. Yisinke Uhompa waKarunga ngau ruganena vantu?

•  Ngau ka gusa po mauvera nonomfa. “Nagumwe si gomosirongo esi twa kara nga sivana asi ta vere,” ntani “nomfa kapi hena ngadi kara ko.”—Jesaya 33:24; Ehororo 21:4.

•  Ngau ka reta mbili nompora. ‘Vantu vange ngani va pa mbili’ ntani “nkenye ogu nga kara mompora moyikunino yamwene yoyindjembere nomaukuzu, kutupu ogu nga mu tjilisa.”—Jesaya 54:13; Mika 4:4.

•  Ngau ka gava yirugana yoyiwa kovantu. “Awo ngava hafera unene yininke eyi va rugana vene. Yirugana eyi ava rugana ngayi ragopa.”—Jesaya 65:21-22, 23.

•  Ngau ka gusa po maudigu monkarapamwe. “Mburundu ngazi hafa, ano nombya ngadi temuna mowiza.”—Jesaya 35:1.

•  Ngau ka ronga vantu eyi va hepa kurugana yipo va ka paruke narunye nanarunye. “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.”—Johanesa 17:3.

Karunga ana hara nove ngo ka hafere mauwa aga. (Jesaya 48:18) Sirongwa sokukwama ko nasi ka zogera eyi wa hepa kurugana ngo ka hafere meho ozo zongwa.