Moyirongwa yina ka pita kuna likida asi ntaantani Karunga nga ka hagekese po uzuni ou woudona nomaudigu gamo. Morwasinke natu yi pulira asi ngayi ka sika mo? Morwa Nonkango daKarunga, Bibeli, kwa tumbwidira asi:

“Uzuni ngau zonauka po.”—1 JOHANESA 2:17.

Velise zoozo kwa tumbwidira hena asi ngapa ka kara vamwe ava ngava ka paruka:

“Nye ogu a sikisa mo mpango zaKarunga, nga kara dogoro narunye.”

Yipo nye, mokukaparuka mouzuni woupe twa hepa kurugana mpango zaKarunga. Mokudiva mpango zaKarunga, pomuhowo twa hepa tanko kumudiva.

Jesus kwa tente asi: “Ava ngava gwana mwenyo gwanarunye va hepa kutwikira kukudiva asi ove nyovelike Karunga gosili.” (Johanesa 17:3) Mokuparuka ehagero lyouzuni ou nokukaparuka narunye, twa hepa ‘kudiva’ Karunga. Eyi kapi tupu ya kwatera mo kudiva asi Karunga yipo ga kara ndi kupura tupu mwendi, nye hena twa hepa kutulisa po ukaume kumwe nendi. Nsene tuna hara kunkondopeka ukaume nagumwe, twa hepa kutulisa po siruwo sokukara-kara kumwe. Eyi ya lifana nokutulisa po ukaume naKarunga. Koneka mausili gamwe twa lironga moBibeli aga aga tu vatere tu tulise po ukaume naKarunga.

Ose kulya nondya nkenye ezuva yipo tu paruke. Nye Jesus kwa tente asi: “Muntu kapi a paruka komboroto zelike, nye kuparuka kwankenye nkango ezi azi tundu mokana kaJehova.”—Mateusa 4:4.

Naina, ose kugwana Nonkango daJehova moBibeli. Ngomu no lironga Bibeli, ove ngo diva usili kuhamena eyi ga rugene nare Karunga neyi ana kurugana ngesi ntani nga ka rugana komeho.

Yisinke no rugana nsene ono hara kukwama mavyukiso gaKarunga nye kuna kukudigopera kunyokera po kurugana yininke eyi ga tanta asi epuko? Moukaro wangoso, nsene o diva nawa Karunga ngayi ku vatera.

Koneka mukadi gedina Sakura, ogu nga hondere. Apa ga tamekere kulironga Bibeli, age kwa lirongere kuhamena mpango zaKarunga ‘zokunyokera po ruhonda.’ (1 Vakolinte 6:18) Sakura kwa kandererere kwaKarunga a mu pe nonkondo ntani ga ya hagekere nkareso zondona zoruhonda. Nye simpe ga hepa kukondja mokunyokera po mazedo. Age kwa tanta asi: “Apa magazaro goruhonda aga wizire nge, ame kuuyunga naJehova mekanderero, morwa na yi diva asi kapi tani ga vhuru kugafunda po nyamelike. Kukanderera kwa hedesera nge pepi naJehova.” Ngwendi Sakura, sinzi sovantu kuna kulironga kuhamena Karunga. Age kugava nonkondo kwava vana di hepa yipo va rundurure eparu lyawo nokuparuka kuliza nomu ga yi harera.—Vafilipi 4:13.

Moomu ono kudiva nawa Karunga, yimo nage ‘ana kukudiva’ ngakaume gomuwa. (Vagarata 4:9; Mapisarome 25:14) Makura ove ngo vhura nye kukaparuka mouzuni woupe waKarunga. Nye ngapi omu uzuni woupe ngau ka kara? Sirongwa sina kukwama ko tasi ka faturura.