Ame kwa hampurukilire nge moFransa. Modoropa na kulilire vantu kwa kere nonyanya ano momambo ngava litangwisa nokurwana. Membo lyetu, vakadi kapi va va fumadekere. Ame kwa rongere nge asi mukadi gokutereka nokupakera mbili tupu vagara novanona.

Pounona ame kwa pitire momaudigu. Otate kwa fire morwa unkorwe ame nomvhura dange 10. Konyima zonomvhura ntano mukurwange gomugara kwa lidipagere. Mvhura zoozo, membo lyetu vantu kwa rwene makura gumwe tava mu dipaga. Apa na yi mwene kwa tukukire unene. Na lirongere kuruganesa uta nonombere pokurwana morwa ngani yi mono membo lyetu. Nkareso ozo za ninkisire nge ni lifanaike morutu nokunwa marovhu.

Apa na kere nonomvhura 16, ngani nu makende gonobira 10 ndi 15 mezuva ano konyima tani ya tameke kukoka epangwe. Ngani randesa yivera nokuvaka yipo ni gwane yimaliva. Apa na kere nonomvhura 17, ame nare na za modorongo yikando 18 morwa ukorokotji.

Koyiha yonomvhura 20 nkareso zange kwa donapere. Ngani koko nozora depangwe 20 mezuva ntani yikwepangwe yimwe. Yikando yimwe ngani pitakanesa kukoka dogoro kuhara kufa. Tani ya tameke kurandesa epangwe, makura ngani gendagura nonombere nomauta. Ezuva limwe kwa royere mugara erago sikutji tasi ka litoona posivera soliva rwendi. Apa na kere nonomvhura 24, onane tava dogoroka makura tani nyanyenene unene. Vantu apa ngava mono nge mositaura ngava tjira. Moyikondovike ngani kara kositasi sovaporosi ndi kosipangero va ka honze nge nombore morwa kurwanangana.

Ame kwa ya kwere ado nomvhura dange 28. Kapi ngani fumadeke mukadange. Ngani mu swaura nokumutoona. Kapi ngatu ruganene kumwe. Ame kwa gazarere asi ya gwanenene po yokumuretera yininke eyi ngani vaka. Nye tapa ya horoka marunduruko. Mukadange ta tameke kulironga Bibeli noNombangi daJehova. Apa tupu ga tamekere kulironga ta hageke kukoka makanya nokunyoka kutambura yimaliva noyininke yokuvaka eyi ngani mu retere. Ayo kwa handukisire nge unene. Ngani mu rwanesa morwa kulironga Bibeli ntani ngani mu fudire musi gomakanya  kosipara. Ntani ngani mu swaura komeho zovantu.

Esiku limwe, ame kwa korwere unene makura tani hwike embo lyetu na hana kuyidivira. Mukadange yige ga tu poperere namunwetu. Ame kwa li zuvhire unzoni apa na kororokwere. Tani lizuvhu asi Karunga kapi nga gusira nge po. Sikando simwe muruti kwa uyingire asi vantu wovadona ngava ka pya momundiro gwanarunye. Nampili ndokotora kwa tanterere nge asi: “Ove nayimwe si tupu! Kapi ngo runduruka.”

Apa lya pire embo lyetu, tatu dirukire membo lyomukwarero gwange. Apa Nombangi da wizire kwamukadange, tani va pura asi: “Karunga nga gusira nge po nonzo dange nadinye ndi?” Tava likida nge moBibeli 1 Vakolinte 6:9-11. Etjangwa olyo kwa tumubura mo nonkareso edi ga nyenga Karunga nye hena kwa tanta asi: “Vakweneni vamwe yimo va kere.” Nonkango odo kwa pere nge mukumo asi kuvhura ni ture po marunduruko. Tava tantere nge asi Karunga ga hara nge nokulikida nge 1 Johanesa 4:8. Morwa na gwene ekorangedo, tani va pura va ronge nge Bibeli ruvali mosivike, ntani tani tameke kuza komapongo gawo. Ame ngani kanderere nkenye pa kwaJehova.

Konyima zokwedi, tani hageke kukoka epangwe nokunwa marovhu. Morwa oyo, ngani zuvhu kukora morutu nokutukauka masiku, kukora mutwe nemezimo. Nampili ngoso, na lizuvhire asi Jehova kuna kwata nge kokuwoko a nkondopeke nge. Ame kwa lizuvhire ngwendi mupositoli Paurusa. Kombinga zevatero eli ga gwene kwaKarunga, Paurusa kwa tjenge asi: “Ame kuvhura nayinye nononkondo dogu a pameke nge.” (Vafilipi 4:13) Mwa za siruwo tani ya hageke kukoka makanya.—2 Vakolinte 7:1.

Bibeli kapi tupu za vatera nge mokurundurura nkareso zange, nye za vatera nge hena ni tekure nawa epata lyange. Ame na tamekere kutekura nawa mukadange nokumufumadeka nokumupandadeka. Ntani na tamekere kupakera mbili munwetu. Konyima zokulironga Bibeli ure womvhura, tani kwama sihonena samukadange pokuligava kwaJehova nokugwana ekuho.

Yosili nompango domoBibeli da popera nge. Nampili ekoro lyange lya hana asi Nombangi va yi dimburura asi ngano na fa kepangwe ndi morwa kurwanangana.

Marongo gomoBibeli ga vatera nge ni tambure yitumbukira yange nganturagumbo ntani guhya. (Vaefeso 5:25; 6:4) Twa tamekere kurugana kumwe yininke ngepata. Mevango lyokutara mukadange asi age gokutereka tupu ame kuhafa kumuvatera mosirugana sendi sokuzuvhisa novili 70 mokwedi. Ntani age kukwatesa nge ko mosirugana sange soukuronambunga.

Eharo nonkenda zaJehova Karunga ya rundurura eparu lyange. Ame kwa kara neharo lyenene lyokutantera ko vantu owo va kara nonkareso ezi na kere nazo nare kuhamena yikara yaKarunga. Na yi diva asi Bibeli za kara nononkondo dokuvatera nkenye ogu a rundurure nkareso zendi nokukara nositambo meparu. Bibeli kapi tupu za ronga nge ni hare nokufumadeka vagara novakadi nye hena ni lifumadeke nyaamwange.