SIRONGWA SOKUHOVA | NSENE ONO FISA
Epuko kuguva ndi?
Nsene tuna veruka, ose pamwe kudivara usimbu uvera ou wa tu gwene. Nye apa atu fisa kapi atu divara usimbu. Ndokotora Alan Wolfelt kwa tjenge mobuke zendi asi: “Kulira nomfa dagumwe kugusa siruwo.” Nye ga gwederere ko hena asi: “Mwaza siruwo nevatero lyovakweni kapi ngo guva unene.”—Healing a Spouse’s Grieving Heart
Pasihonena, gazara omu ga lizuvhire Abirahamu apa ga fisire mukadendi Sara. Bibeli kutanta asi: “Abirahamu makura ta zi ko a ya lire Sara.” Nonkango odo kulikida asi age kwa guvire siruwo sosire. * Ntani apa Jakopo va mu kumbagerere asi munwendi Josefa ana likana kosikasama, age kwa guvire “mazuva gomanzi,” vana vendi kapi va vhulire kumuhengagwida. Konyima zonomvhura dongandi, simpe nga diworoka munwendi.—Genesis 23:2; 37:34, 35; 42:36; 45:28.
Abirahamu kwa lilire nomfa damukadendi Sara
Nanaina, vantu wovanzi ava va fisa kuguva siruwo sosire. Tarurura yihonena yivali yina kukwama ko.
-
Gail, gonomvhura 60, kwa tanta asi: “Mugara gwange Robert kwa dogorokere 9 Pembankuru 2008. Ngwendi moomu ngatu yi rugana nkenye apa komeho a ze koyirugana, ngurangura ozo komeho li ka horoke ehudi, ose kwa lire kumwe mulihako, makura tatu lirekere. Konyima zonomvhura ntazimwe, ame simpe kwa lizuvhire kukora komutjima. Kapi nina kuyihuguvara asi ngani hageka kulira nomfa daRobert.”
-
Etienne, gonomvhura 84, kwa tanta asi: “Nampili ngomu na zumbanesa mukadange ure wonomvhura 18, ame simpe kumurongora ntani kulira nomfa dendi. Nkenye apa ani mono sininke sosiwa mounsitwe, ame kuninkisa nge ni gazare omu mukadange ngano na hafera kumona sininke oso.”
Kapi ya kara epuko kuguva siruwo sosire ngoso. Vantu omu ava guwu va lisiga ntani kapi tayi wapa kupangura mukweni nsene ana guwu. Ntani twa ha lizuvha udona nsene tatu guwu unene. Ngapi omu natu lididimikira ruguwo?
^ para. 4 Isaka munwaAbirahamu nage kwa guvire siruwo sosire. Sirongwa “Honena epuro lyawo” mosifo esi, kwa likida asi konyima zonomvhura ntatu kutunda apa va fire ozina age simpe kwa guvire.—Genesis 24:67.
