Pwa kara mapukururo kuhamena kulididimikira ruguwo. Nye gamwe kapisi mawa. Pasihonena, vamwe kuvhura va ku tantere asi wa ha lira ndi wa ha pwagesa malizuvho goge. Ano vamwe kuvhura va kusininike asi o lire ndi o pwagese malizuvho goge. Nye Bibeli kwa gava mapukururo gomawa aga va kwatesa ko va ndokotora.

Monompo dimwe ayo kuyitara asi epuko mugara a lire. Nye hepero sili muntu a life nomuga kulira komeho zovantu ndi? Vandokotora kwa tanta asi nsene ono guwu kapi ya kara epuko kulira. Nsene o lira ta yi ku vatere o lididimikire. Nsene kapi ono kupwagesa malizuvho goge kuvhura hena yi ku retere kukora kokunene. Bibeli kapi za uyunga asi epuko komugara kulira. Pasihonena, Jesus kwa lilire komeho zovantu ponomfa dakaume kendi Rasarusa, nampili ngomu ga kere nononkondo dokupindura muntu koufe.—Johanesa 11:33-35.

Nsene asi nomfa dohararasi, vamwe ava ava fisa kulikida ruguwo rwawo pokuhanduka. Pamwe gumwe kuvhura a va uyungire nonkango edi nadi va koresa komutjima. Mike, gomoAfrika Mbindakano, kwa tanta asi: “Otate kwa dogorokere ame nomvhura 14. Pehoreko lyawo, mupitisili gongereka zEvangeli kwa tente asi Karunga kwa gusire otate morwa ana hepa vantu wovawa meguru. * Nonkango odo kwa handukisire nge morwa ose twa hepere otate. Ngesi pana piti nomvhura 63, nye nonkango odo simpe kukoresa nge.”

Vamwe kulipa unzoni, unene po nsene asi nomfa dohararasi. Ogu ana fisa kuvhura a gazare asi: ‘Ngano kani rugana neyi-neyi, ngano kapi ana fu.’ Ndi kuvhura hena va li pe unzoni nsene ka va litangwisire nomuntu ogo komeho a ka dogoroke.

Nsene ove kuna kulizuvha unzoni ndi ehandu, wa ha horeka malizuvho goge. Nye tantera kaume koge ogu na ku purakena nokukuhengagwida asi kapi ya kara epuko kukara nomalizuvho gangoso. Bibeli kwa tanta asi: “Vantu namukwawo kulihara. Ano vantu namumbyendi wovagara nani kapisi kwa karera po, va likwafe moudigu?”—Yisewe 17:17.

Jehova Karunga, Musiti gwetu, yige kaume gomuwa po gokuvhura kuvatera ogu ana fisa. Mu pwagesera malizuvho goge mekanderero morwa age ‘kukupakera mbili.’ (1 Peturusa 5:7) Age ga tumbwidira asi nsene o kanderera age nga ku pa ‘mbili zendi ezi za pitakana unene nondunge nadinye.’ (Vafilipi 4:6, 7) Ntani Karunga kuvhura kukuhengagwida kupitira  moNonkango dendi, Bibeli. Tjanga novelise edi nadi vhura kukuhengagwida. (Tara  kakende.) Kuvhura o hetekere ko kudikwata momutwe. Nsene masiku kapi ono kuvhura kuponyoka kuvhura o tede ko konovelise odo.—Jesaya 57:15.

Jack, gonomvhura 40 kwa fisire mukadendi kouvera wokankera. Poyiruwo yimwe age kulizuvha sili mukuma. Nye kukanderera kumuvatera. Age kwa tanta asi: “Apa ani zuvhu mukuma ame kukanderera kwaJehova. Pamwe masiku kapi ana vhuru kuponyoka. Nye konyima zokuresa Bibeli nokuteda ko kweyi na resa nokukanderera, ame kulizuvha mbili momutjima makura tani ponyoka.”

Mukadona gedina Vanessa kwa fisire ozina. Kukanderera kwa mu vatera. Age kwa tanta asi: “Apa ngani guwu unene, ngani kugu edina lyaKarunga dogoro kulilira mo. Jehova nga zuvhu nge nokupameka nge.”

Vandokotora vamwe kwa korangeda ava va fisa mokuvatera wopeke momukunda. Pokurugana ngoso kuvhura kureta ruhafo ntani kusesupika ruguwo. (Yirugana 20:35) Vakriste ava va fisa va gwanena mo ehengagwido pokuvatera wopeke.—2 Vakolinte 1:3, 4.