Ngapi no vhura kuhengagwida ogu ana fisa? Poyiruwo yimwe kapi atu diva eyi natu uyunga ndi natu rugana. Nye pwa kara yininke eyi natu rugana.

Nampili tu dire kudiva eyi natu uyunga, simpe twa hepa kuvadingura nokuvahengagwida. Nkedi zimwe zokuvahengagwida kuvhura kuvalidingira ndi kuvakwata pepepe ndi kewoko. Nsene ogu ana fisa ana hara kuuyunga, purakena nelituromo. Kuvhura o vatere epata eli lina fisa pokutereka nondya ndi kupakera mbili vanona ndi kuwapaika ehoreko. Kurugana oyo kuvhura kuvahengagwida kupitakana tupu kuuyunga nonkango donongwa.

Mwaza siruwo, kuvhura o simwitire nkareso zongwa zanakufa noyininke eyi mwa haferere kumwe. Nonzogera dangoso kuvhura kuhengagwida ogu ana fisa. Pasihonena, Pam, kwa fisa mugara gwendi Ian nomvhura ntazimwe dina ka pita. Age kwa tanta asi: “Vantu pamwe kutantera nge yininke yoyiwa eyi nga rugana mugara gwange eyi na dira kudiva, ano oyo kuhengagwida nge.”

 Marapoto kwa likida asi vantu ava ava fisa kugwana evatero tupu apa adi horoka nomfa, nye konyima zehoreko kuvasigilira. Yipo nye litulira po sitambo sokutwikira kuhengagwida ogu ana fisa. * Morwa oyo kupa mpito ogu ana fisa mokupwagesa malizuvho gendi.

Koneka sihonena saKaori, mukadi goMuyapani ogu ga guvire unene morwa kwa fisire ozina ntani mukurwendi konyima zomakwedi 15. Age kwa gwene evatero kovakaume vendi. Gumwe govakaume vendi gedina Ritsuko kwa kere mukondi kwendi. Kaori kwa tanta asi: “Kapi na here asi muntu gongandi a pinganene po onane ntani kapi na huguvarere asi kweli gokuyivhura. Nye Ritsuko kwa tekwire nge ngwendi munwendi ano eyi kwa ninkisire nge ni mu hare unene ngwendi oyina. Nkenye sivike, ngatu zi mokuzuvhisa kumwe ntani komapongo. Age nga zigida nge tu ka nwe tiye kumwe, nokuretera nge nondya ntani nokutjangera nge nombilive noyikarata yikando yoyinzi. Nkareso zaRitsuko kwa vaterere nge.”

Pana piti nomvhura murongo nambali kutunda apa va va dogorokere ozina vaKaori. Ano ngesi nage namugara gwendi kuna kara vazuvhisi wosiruwo nasinye. Kaori kwa tanta asi: “Ritsuko simpe kupakera nge mbili. Apa ani zi ni ka mu dingure age kukorangeda nge.”

Gumwe ogu ga gwana ehengagwido monomvhura dononzi kuna kara Poli, gumwe goNombangi daJehova moGereka. Mugara gwendi Sozos kwa kere muntu gombili ogu ga tulire po sihonena sosiwa ngomukuronambungakriste pokuzigida nonsigwe novafisayawo kembo lyawo mokuyalya kumwe nokuyazogera. (Jakopo 1:27) Nye ehudi, Sozos kwa fire kouvera wosimeno somouruvi age nomvhura dendi 53. Mukadendi Poli kwa tanta asi: “Ame kwa zumbanesa mugara gwange ogu twa likwere nendi nomvhura 33.”

Konyima Poli kwa dirukilire koKanada namunwendi gonsiraura gonomvhura 15 gedina Daniel. Awo kwa ka twikilire kukaza komapongo goNombangi daJehova. Poli kwa tanta asi: “Vakaume wovape womombungakriste kapi va divire ukaro wetu woudigu. Nye oyo kapi ya va ninkisire va dire kututambura nokutuhengagwida nokutuvatera. Munwange ga gwanenene mo uwa. Wokupitisira mombungakriste kwa tulire po ukaume nokumuvatera. Gumwe gwawo nga pitura Daniel va ze kumwe va ka dingure vakaume vawo ndi va ka dane kumwe mbara.” Poli namunwendi vana hafa.

Pwa kara nonkedi dononzi omu natu vatera nokuhengagwida owo vana guwu. Bibeli nazo kutuhengagwida.