Josefa, muhongi goyikungu gomoNasareta kwa kere oguhwe vaJesus. Nye wolye va kere oguhwe vaJosefa? Elikwamo lyezimo lyaJesus mEvangeli lyaMateusa kwa tumbura Jakopo ano Rukasa kwa tumbura asi Josefa “zaEli.” Morwasinke pwa karera malisigo?—Rukasa 3:23; Mateusa 1:16.

MwaMateusa kwa uyunga mo asi: “MwaJakopo yiyo mwa tundire Josefa,” kulikida asi Jakopo kwa kere oguhwe vaJosefa. Mateusa kwa tjenge elikwamo lyezimo lyaJosefa omu ga tundire hompa Ndafita mu ya tunde hena Jesus.

MwaRukasa kwa uyunga asi: ‘Josefa zaEli.’ Nkango “za” kuvhura hena kutamba asi “tamweyi za.” Nonkango dokulifana kudigwana hena mwaRukasa 3:27 omu Seratiyeli, munwaJehoyakini va mu tumbura asi Seratiyeli “zaNeli.” (1 Histoli 3:17; Mateusa 1:12) Seratiyeli nampo kwa kwere munwaNeli, makura ta ya kara tamweyi zendi. Josefa nage kwa kere ‘zaEli,’ morwa kwa kwere Mariya munwaEli. Rukasa kwa tjenge elikwamo lyezimo lyaJesus “pasiuntu” kuliza nelikwamo lyezimo lyozina Mariya. (Varoma 1:3) Eyi yiyo Bibeli azi tu pere mafatururo gavali gezimo lyaJesus lyonkwaguhwe ntani lyonkwazina.

Nohuki dononzwi ngava di ruganesa unene mokuninka makehe ntani hena nedi doyikombo nonongameru. Ano makehe gonohuki dononzwi yigo ngava ruganesa unene ntani Bibeli kwa tumbura mo unene kuhamena nonzwi, kukurura nonzwi ntani mudwaro gonohuki dononzwi. (1 Samwere 25:⁠2; 2 Vahompa 3:⁠4; Joba 31:​20) Sitji esi ngava rugana ekehe lyolina ngasi kuru moEgipite nomoIsraeli. (Genesis 41:​42; Josuwa 2:⁠6) Vaisraeli kapi nampo ngava kunu katuni, nye Matjangwa ga tumbura asi katuni ngava ka ruganesa moPeresiya. (Esitera 1:⁠6) Ekehe lyokurerema kwa kere ndiro unene, alyo ngava li randesa tupu varandesi ava ngava tundu koure.​—⁠Ehororo 18:​11, 12.

Buke zimwe kwa uyunga asi: “Nohuki dononzwi kwa kere momaruvara gomazera ga tooto naga goumbombo. Pamwe nohuki dononzi ngava di tura ruvara. Ruvara rondiro ropurupuli ngava ru gusa korupe rumwe rwehunzu. Yitji yokulisiga-siga nonondandani noyihako ntani yimbumburu ngava yi ruganesa mokugwana ko ruvara rorugeha, rosiuhenga, rosinauguru ntani rorusovagani.—⁠Jesus and His World