Nonkambe ne kuna kugenderera kuduka nononkondo. Nonkambe odo novarondi vado, kwa fanekesa yuma yongandi eyi va tjanga moBibeli. Nkambe zokuhova zonzera, ogu ga zi rondere hompa gomupe ana dwara nkata zosiuhompa. Zauvali zongeha ngwendi mundiro, ogu ga zi rondere kwa mu pere yokukagusa po mbili pevhu. Zautatu zonsovagani, ano ogu ga zi rondere kwa kere nosiviha mokuwoko kwendi, age kuna kara nombudi zondona zokudivisa kuhamena esesupo lyonondya. Nkambe zaune zombundu ndi zousamuke, ogu ga zi rondere, edina lyendi Nomfa, age kuna kuretesa po erumbu nehamba lyomukagu. Ano Sirongo soVafe ndi nontoko kwa mu kweme nokutambura vafe.—Ehororo 6:1-8.

Crystal kwa tanta asi: “Apa na resere kuhamena varondi vane wononkambe, ayo kwa tjilisire nge. Ame kwa lizuvhire asi Ezuva lyoMpanguro lina siki ntani ame kapi nina liwapaikire, kapi nani ya paruka.”

Ed kwa tanta asi: “Varondi vane wononkambe kwa tukukisire nge. Nye apa na ya kwete egano eyi lya tamba emoneko olyo, kwa hafesere nge.”

Ono dimburura omu ga lizuvhire Crystal kuhamena varondi vane wononkambe ndi? Nove kuna kulizuvha omu ga lizuvhire Ed ndi? Yi kare asi monkedi musinke ono kulizuvha, varondi wononkambe owo kuna kara umwe wouporofete ou wa divikwa mEhororo, buke zokuhulilira moBibeli. Wa yi diva asi kuvhura o gwanene mo uwa nsene o kwata egano emoneko olyo ndi? Monkedi musinke? Karunga ga tumbwidira asi kuvhura o gwane ruhafo rosili pokuresa nokulironga eyi va tjanga mobuke ezi zouporofete ntani nokuyilimburukwa.—Ehororo 1:1-3.

Nampili ngomu emoneko eli lyovarondi vane wononkambe ali tjilisa vantu vamwe, nye kapisi yiyo va li tjangera. Vantu wovanzi va dimburura asi emoneko eli kunkondopeka epuro lyawo ntani kuvavatera va demenene kehuguvaro lyawo lyokomeho. Nove walye ngosikwawo. Twikira kuresa.