SIRONGWA SOKUHOVA | VARONDI VANE WONONKAMBE—NGAPI VA KU KUNDAMA?
Wolye varondi vane wononkambe?
Varondi vane ava wononkambe kuvhura va moneke ngwendi kutjilisa, nye kapisi yi tu tjilise. Morwasinke? Morwa Bibeli noyihorokwa yomomazuva getu kutuvatera tu dimburure eyi nkenye murondi gonkambe ga fanekesa. Nampili ngomu varondi owo va retesa po maudigu pevhu, azo kuvhura zi kare mbudi zongwa koge nepata lyoge. Monkedi musinke? Tu konakoneni tanko asi wolye ava varondi.
MURONDI GONKAMBE ZONZERA
Emoneko kwa tamekere ngesi: “Eyi na tara ko, tani mono nkambe zonzera. Ano ogu ga rondere ko, kwa kere nouta wonkanza. Makura tava mu pe nkata zefundo, ta pwaga ngwendi mufundi ta ka funda.”—Ehororo 6:2.
Yilye murondi gonkambe zonzera? Buke zEhororo kutuvatera tu dimburure murondi ogu pokutanta asi: “Yige Nkango zaKarunga.” (Ehororo 19:11-13) Situmbwisiso Nkango kwa tamba kwaJesus Kristusa, morwa yige muuyungilipo gwaKarunga. (Johanesa 1:1, 14) Age hena kumutumbura asi “Hompa gohompa, Mupangeli govapangeli” ntani kwa mu singonona hena asi “Mulimburukwi, age hena Munasili.” (Ehororo 19:16) Yosili, ga kara nononkondo dokukara Hompa gependa ntani age kapi a ruganesa nonkondo dendi monkedi zondona. Tu konakoneni mapuro gana kukwama ko.
Yilye ga mu pa Jesus nonkondo dokufunda? (Ehororo 6:2) Muporofete Ndaniyera kwa mwene emoneko omu Jehova * ogu “ga kerera po narunye” ga pere “epangero nefumano nononkondo dosiuhompa” kwaMesiyasa ogu va fanekesa ‘komuntu’. (Ndaniyera 7:13, 14) Yipo nye, Karunga Munankondo nadinye yige ga pa Jesus nonkondo dokupangera nokupangura. Nkambe zonzera za wapera kufanekesa yita yokuhungama eyi nga rwa MunwaKarunga, morwa Matjangwa kwa fanekesa uhungami koruvara roruzera.—Ehororo 3:4; 7:9, 13, 14.
Siruwo musinke va tamekere varondi wononkambe kudukisa nonkambe dawo? Jesus, murondi gonkambe zokuhova kwa tamekere kudukisa apa ga gwene nkata zosiuhompa. (Ehororo 6:2) Siruwoke Jesus va mu pere nkata zosiuhompa? Age kapi va mu pere nkata ozo apa tupu ga tengwire meguru. Bibeli kulikida asi age kwa ka ndindilire siruwo sosire. (Vahebeli 10:12, 13) Jesus kwa pere varongwa vendi sidimbwiliso omu nava dimburura asi age ana tameke kupangera meguru. Age kwa tente asi apa nga tameka kupangera, maukaro gomouzuni ngaga donapa. Ngapa kara yita nerumbu ntani ehamba lyomukagu. (Mateusa 24:3, 7; Rukasa 21:10, 11) Konyima zoYita yoPomuhowo yoUzuni momvhura 1914, ya li likidire asi vantu vana siki mosiruwo soudigu esi za tumbura Bibeli asi “mazuva gopouhura.”—2 Timoteusa 3:1-5.
Morwasinke nye tuna kuligwanekerera nomaukaro gomadona nsene asi Jesus va mu pa nkata zosiuhompa momvhura 1914? Morwa Jesus kwa tamekere kupangera meguru kapisi pevhu. Meguru kwa kere mo yita, ano Hompa gomupe Jesus ava tumbura asi Mikayera kwa zugumina Satana novaengeli vendi pevhu. (Ehororo 12:7-9, 12) Eyi kwa handukisa unene Satana morwa ana diva asi siruwo sendi sina hupu ko sisupi. Karunga ntaantani nga ka sikise mo mpango zendi zokuzonagura po Satana apa pevhu. (Mateusa 6:10) Ngesi tu konakoneni omu varondi vatatu wononkambe dapeke ava tu vatere tu dive asi yosili ose kuna kuparuka “pomazuva gopouhura.” Mokulisiga nomurondi gonkambe zokuhova ogu ga fanekesa muntu, varondi vatatu vapeke kwa fanekesa yihorokwa yoyidona eyi yina kundama vantu navenye.
MURONDI GONKAMBE ZONGEHA
“Makura nkambe zouvali zongeha ngwendi mundiro tazi pwaga mo. Ano ogu ga rondere ko, kwa mu pere yokukagusa po mbili pevhu, asi vantu va lidipage-dipage; makura tava mu pe efuro lyenene.”—Ehororo 6:4.
Murondi ogo kwa fanekesa yita. Koneka asi murondi ogu kapi tupu a gusa mbili konomuhoko dongandi, nye mouzuni mudima. Yita yokuhova mouzuni mudima, kwa horokere momvhura 1914. Kutunda opo, ta ku kwama yita yauvali mouzuni mudima, eyi ya didire unene. Ayo kwa yi ngungunikira asi sivaro sovantu ava va fa koyita kutundilira momvhura 1914 kwa pitakana mamiliyona 100! Vantu wovanzi kwa remana unene moyita oyo.
Ngapi yita yina kundama vantu posiruwo setu? Ngesi vantu vana kara nediwo lyokuvhura kuzonagura po vantu navenye. Nampili nombunga dokutulisa po mbili ngwendi Mbunga zElipakerero lyoNomuhoko, kapi ava vhuru kuhagekesa po murondi gonkambe zongeha.
MURONDI GONKAMBE ZONSOVAGANI
“Na tara ko, tani mono nkambe zonsovagani, ano ogu ga zi rondere kwa kere nosiviha mokuwoko kwendi. Ame makura tani zuvhu ezwi pokatji koyinamwenyo lina kutanta asi: ‘Kakumba korukokotwa taka gu mweyi o kwata mezuva limwe, ano tukumba tutatu toyilya tatu gu mweyi o kwata mezuva limwe! Nye wa ha zonagura magadi gononzwe novhinyu!’”—Ehororo 6:5, 6.
Murondi ogu kwa fanekesa erumbu. Velise ezi kwa singonona omu erumbu ngali lihana pokutanta asi kakumba kedenali limwe korukokotwa taka gu mweyi o kwata mezuva limwe, mfeto zezuva limwe mosiruwo sanare! (Mateusa 20:2) Mfeto zezuva limwe kuvhura kuranda tukumba tutatu toyilya. Siruwo sokuhura kupi nayi gusa mokurera epata lyenene? Vantu kwa va rondwere omu nava vhura kuruganesa nondya, nampili nondya dankenye ezuva kwa di fanekesere mosiruwo sina komagadi gononzwe novhinyu.
Kutundilira 1914, ose twa mona maumbangi asi murondi gonkambe zonsovagani simpe kuna kudukisa nkambe ndi? Nhi! Kutundilira mvhura 1900 yi tware komeho, konyara vantu mamiliyona 70 kwa fa konzara. Mulirongi gumwe kwa tanta asi: “Momvhura 2012 dogoro 2014 vantu wokusika pomamiliyona 805 kwa va kwateka uvera wonzara.” Erapoto limwe kwa tanta asi: “Nzara kudipaga vantu wovanzi nkenye mvhura kupitakana AIDS, nomalaria ntani TB.” Nampili ngomu wovanzi ava hetekere ko kuvatera wonzara, nye simpe murondi gonkambe zonsovagani kuna kutwikira kudukisa nkambe.
MURONDI GONKAMBE ZOMBUNDU
“Eyi na tara ko, tani mono nkambe zombundu. Ogu ga rondere ko, edina lyendi yige Nomfa, ano Sirongo soVafe kwa mu kwamene. Awo kwa va pa nonkondo dokukadipagesa siune simwe souzuni korufuro nekerumbu nekehamba lyomukagu nokoyikasama yepevhu.”—Ehororo. 6:8.
Murondi gonkambe zaune kwa fanekesa nomfa edi ga retesa po mauvera ntani nayimwe hena ngoso. Konyima zomvhura 1914, esakisa lyaSipaniya kwa dipagere vantu mamiliyona nomurongo. Ntani vantu mamiliyona 500 kwa gwene uvera owo.
Esakisa lyaSipaniya kwa kere etameko tupu. Valirongi kwa ngungunikira asi vantu mamiliyona mafere kwa fire kouvera wakankwenyenye monomvhura efere da ka pita. Naina vantu mamiliyona simpe kuna kufa koAIDS nokoTB ntani komalaria, nampili ngomu dina vhuka nomutji.
Yosili, nzara nehamba lyomukagu ntani yita kwa retesa po unene nomfa. Ava va fa kuna kara moSirongo soVafe ndi monontoko.
SIRUWO SOSIWA PEPI!
Siruwo somaudigu ntaantani ngasi hage po. Diworoka eyi: Jesus ‘kwa pwege a ka funde’ momvhura 1914, nokuzugumina Satana pevhu, nye Jesus kapi ga mene efundo lyendi. (Ehororo 6:2; 12:9, 12) PoHarumagedoni, Jesus nga ka gusa po mapukiso gaSatana Muzonaguli ntani nokukazonagura po vantu ava ava mu kwatesa ko. (Ehororo 20:1-3) Jesus nga ka zonagura po varondi vatatu wononkambe ntani nokukawapukurura ezonauko eli va retesa po. Monkedi musinke? Konakona eyi za tumbwidira Bibeli.
Mevango lyoyita, ngapa kara mbili. Jehova ‘nga hagekesa yita mouzuni mudima; nga tezagura mauta, nokuharaganesa magonga.’ (Episarome 46:9) Vantu ava va hara mbili, “ngava hafera mpora zonene.”—Episarome 37:11.
Mevango lyerumbu, ngapa kara nondya dononzi. “Ewogo lyoyisima ngano tali kara mosirongo; nondundu ngano tadi zura muzangu.”—Episarome 72:16.
Jesus ntaantani a ka wapukurure ezonauko eli va retesa po varondi vatatu wononkambe
Mevango lyomauvera nonomfa, vantu ngava ka hafera ukanguki nomwenyo gwanarunye. Karunga “nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.”—Ehororo 21:4.
Apa ga kere Jesus pevhu, age kwa likidire eyi nga ka rugana mepangero lyendi. Age kwa korangedere vantu va kare mombili nokukutika mayovi nokuverura vaveli ntani kupindura vafe.—Mateusa 12:15; 14:19-21; 26:52; Johanesa 11:43, 44.
Nombangi daJehova nadi ka yi hafera kukulikida moBibeli zoge omu no liwapaikira apa ngava ya hagekesa po varondi wononkambe owo. Ono hara kudiva ko yoyinzi ndi?
^ para. 7 Jehova kuna kara edina lyaKarunga.