Apa ava hampuruka mukeke, nominute 60 dokuhova kuna kara siruwo esi mukeke ga hepa kuyika ukaro woponze. Morwasinke? Morwa yiso siruwo zinya a tura po elikwatakano namunwendi gomukeke, eli ngali vatera mukeke a kure nawa. a

Yisinke ayi tumangeda zinya a pakere mbili mukeke gwendi? Profesora Jeannette Crenshaw kwa faturura mobuke zendi [The Journal of Perinatal Education] asi eligwederero lyohoromone ava tumbura asi oxytocin yizo azi “tumangeda zinya konyima zokuhampuruka a kare nomalizuvho gokukwaterera mukeke nokumuhempa nokumuzamweka.” Ano horomone zimwe hena azi moneka posiruwo oso “kuvatera zinya a tulise po elikwatakano nomukeke gwendi.” Morwasinke ya karera nomulyo?

Elikwatakano eli a tura po zinya nomukeke gwendi, kwa tundilira koMusiti gwetu geharo, Jehova Karunga. Hompa Ndafita kwa pandwire Karunga kweyi ga yi gendesere va mu ‘hampuruke’ ntani va mu popere mezimo lyozina. Age kwa kanderere asi: “Ame kwa ligava koge hana tundira mezimo lyonane; kwa hampuruka nge tupu, makura ove to kara Karunga gwange.”—Episarome 22:9, 10.

GAZADARA KO: Nsene asi Karunga yige ga sita yikara yangoso yokutetukisa yipo zinya a pakere mbili mukeke gwendi nokumupa eyi ana hepa, eyi kulikida nawa-nawa asi Karunga ga litura mo mwetu, morwa kwendi ‘twa tunda.’—Yirugana 17:29.

Jesus Kristusa, ogu ga diva nawa Musiti kupitakana nkenye ogu, kwa rongere asi: “Nani manzunge gavali kapi ava ga randa senda zimwe? Nye nalimwe si ali gwire pevhu, alyo lya hana kudivikwa kwaGuhyeni. Ngone, nonohuki nadinye dokonomutwe deni da pwa kuvara. Yipo nye nomu dilira kutjira, yeeyi one kwa pitakana manzunge gomanzi momulyo.”—Mateusa 10:29-31.

Sinzi setu kapi atu vhuru kukonakona yidira, unene po yoyinunu asi tu dive sene kosili esi sina gwire pevhu. Nye guhyetu gemeguru ga yi diva nayinye! Nampili ngoso, age kutara vantu asi mulyo unene kupitakana yidira. Eyi kutanta asi Karunga ga ku diva, kapisi hepero o ‘tjire.’ Age ga litura mo moge!

Matjangwa kutupa ehuguvaro

• “HOMPA kumona nkenye oku kuna kuhoroka yuma, age kutumona, nsene ose kuna kurugana uwa ndi udona.”—YISEWE 15:3.

• “Meho gaHOMPA kwa tara kovahungami, age kutondoka nonkugo dawo.”—EPISAROME 34:15.

• “Ame ngani hafa, tani pembura, morweharo lyoge lyenene. Ove kumona runyando rwange, yiyo wa diva udigu wange.”—EPISAROME 31:7.

Nsene tu diva asi Karunga ga kara nosinka kwetu nokututakamesa, kuvhura yi tjindje eparu lyetu ndi? Kuvhura, ngomu ga yi faturura Hannah, b gomoIngiranda asi:

“Yikando yoyinzi ngani lizuvhu asi Jehova kapi ga hara nge ntani asi kapi a limbururura makanderero gange. Ame kwa gazarere asi nampo yeeyi na dira kupura mwendi yiyo yina kuhorokera nge. Ame kwa lizuvhire asi age kuna kutengeka nge ndi kuna kusigilira nge morwa ame kwato mulyo. Kwa lizuvhire asi Karunga kwato sinka.”

Ngesi, Hannah kapi hena ana kara nomasinganyeko asi Jehova kapi ga mu hara. Yisinke ya mu vatera a rundurure malizuvho gendi? Age kwa tanta asi: “Tani diworoka siuyungwa sokuhamena nzambo zaJesus zosizoweseso nomvhura dononzi da ka pita, esi sa kundamene nge unene nokuvatera nge ni lizuvhe asi Jehova ga hara nge. Apa Jehova ga limbwilire makanderero gange, ngani lili, morwa na dimbwilire asi Jehova nani ga hara nge. Ntani kulironga Bibeli nokuza komapongo kwa ronga nge yoyinzi kuhamena Jehova noyikara yendi nomu a lizuvhu kutuhamena. Ngesi, na limonena evatero neharo lyaJehova ntani nomu ga hara kutupakera mbili pamundinda.”

Eyi ga uyunga Hannah, kukorangeda sili. Nye ngapi no yi diva asi Karunga kukukwata egano ntani ga diva omu o lizuvhu? Resa sirongwa sokukwama ko o gwane elimbururo.