Vantu kwa kara nelikwatakano lyenene ngwendi lyeli va kara nalyo vamapange wokulifana. Awo kulihonena nkenye eyi ava rugana. Mugendesi Nancy Segal mumapange, ogu ga lironga kuhamena vamapange, kwa tanta asi: “Vamapange kuruganena kumwe ntani kulikwata egano. Mukadi gumwe kwa faturura elikwatakano eli ga kara nalyo nomumapange mukwawo asi: “Ose twa lidiva unene.”

Morwasinke ya karera ngoso? Valirongi vamwe kutanta asi vamapange kuvarerera membo limwe nokuvazamweka zinya gumwe yiyo ya karera ngoso, nye unene po morwa kwa kere mosivharero simwe tupu.

GAZADARA KO: Ogu ga tu sita ga diva nawa nkenye gumwe gwetu kupitakana omu twa lidiva nyamwetu. Ndafita kwa tente asi: “Nyove wa tura nge kumwe mezimo lyonane. Yisupa yange wa yi mwene omu yina kukara po, . . . apa wa mwene nge ame simpe nokuhampuruka nge si. Mazuva gokuunga nge ove nare wa ga tura mobuke zoge.” (Episarome 139:13, 15, 16) Karunga gelike yige ga diva nokukwata egano ukaro wetu ntani neyi atu ligwanekere nayo meparu. Morwa eyi, ayo kutupa ehuguvaro asi Karunga kutukwata egano mwankenye eyi.

Ndafita kwa kanderere asi: “HOMPA, ove kwa kona-kona nge, yiyo wa diva nge! Wa diva nkenye eyi ani rugana; ure-ure o divire magazaro gange nagenye. Nampili kapi na uyunga simpe, ove nare ono diva eyi na hara kutanta.” (Episarome 139:1, 2, 4) Ntani hena, Jehova ga diva malizuvho getu ntani “ga diva magazaro getu nomaharo getu nagenye.” (1 Histoli 28:9; 1 Samwere 16:6, 7) Yisinke adi likida novelise edi kuhamena Karunga?

Nampili ngomu atu dili kupwagesa magazaro getu nomalizuvho getu nagenye apa atu kanderere kwaKarunga, age kapi a nomene tupu eyi atu rugana nye kukwata egano eyi atu yi ruganene. Age hena kukwata egano yininke yoyiwa eyi tuna hara kurugana nampili ngomu pamwe atu dili kuyisikisa mo morwa maupirankondo getu. Karunga kwa tura monomutjima detu eharo, age kunomena nokukwata egano magazaro noyitambo yetu.—1 Johanesa 4:7-10.

 Matjangwa kutupa ehuguvaro

• “Yeeyi meho gaHompa kwa tara kovahungami, age kupurakena nkenye apa makanderero gawo.”—1 PETURUSA 3:12.

• “HOMPA kuna kutanta asi: ‘Ame tani ku rongo nzira ezi no genda; ngani ku pukurura oku tani ku takamesa.’”—EPISAROME 32:8.

Pokudiva asi Karunga kukwata egano ukaro wetu nomalizuvho getu, ayo kutuvatera tu lididimikire maudigu. Koneka eyi ya horokerere Anna gomoNigeria. Age kwa tanta asi: “Kuliza noukaro wange, ame kwa lipulire nsene asi hepero kuparuka. Ame mufisayendi ogu na pakerere mbili munwange ogu ga kere mosipangero morwa uvera womouruvi, siruwo sooso name yipo va kwatekere nge kankera zekevere ntani va hepere kutaura nge nokupa nge nomutji dononkondo dokudipaga uvera owo. Ayo ya digoperere nge kulipakera mbili nyamwange ntani namunwange.”

Yisinke ya vaterere Anna a lididimikire? Age kwa tente asi: “Ame ngani gazadara ko komatjangwa ngwendi Vafilipi 4:6, 7, ezi za uyunga asi ‘mbili zaKarunga, ezi za pitakana unene nondunge nadinye, ngazi kunga nomwenyo deni nomagazaro geni.’ Nkenye apa ngani diworoka etjangwa eli, ngayi hedesere nge pepi naJehova pokudiva asi age kukwata nge egano kupitakana nge. Ntani ngani gwana ekorangedo kovanavazinyetu womombungakriste.

“Nampili ngomu simpe nina kukondja noukanguki wange, ukaro wange nou wamunwange wa runduruka. Ose kapi atu demenene komaudigu getu morwa twa kara nehuguvaro asi Jehova kutuvatera. Jakopo 5:11 kutanta asi: ‘Ava ava didimike, ose kuvatumbura asi vanerago. Mwa zuvha yedidimiko lyaJoba, nomu ga ya mu rugene Hompa poruhura, mwa yi diva. Yeeyi Hompa mufenkenda, age munambili.’” Jehova ga kwete egano ukaro waJoba, ano eyi kutupa ehuguvaro asi age kukwata egano maudigu aga tuna kupita.