Kukoresa kutanta asi “kulizuvha ngwendi moomu ana kulizuvha muntu gongandi ndi kulitura moukaro wendi.” Ndokotora gouruvi, Rick Hanson, kwa tanta asi: “Sikara esi sokuzuvhira mo kukora vakwetu, naso va tu reta.”

GAZADARA KO: Morwasinke twa karera nosikara esi sokuzuvhira mo kukora vakwetu? Bibeli kufaturura asi Karunga kwa tu sita tu mu fane. (Genesis 1:26) Kufana Karunga kutanta asi ose twa kara noyikara yoyiwa ngwendi eyi ga kara nayo. Apa sikara esi sokuzuvhira mo vakwetu asi tumangeda vantu va vatere vakwawo, awo ngoso kuna kutemwinina Musiti gwawo, Jehova Karunga.—Yisewe 14:31.

Karunga kutuzuvhira mo kukora ntani ga nyenga kutumona kuna kuhepa. Kuhamena Vaisraeli vanare, ava va lididimikilire yirugana yonyanya moEgipite ntani nokurenda-renda momburundu nomvhura 40, Bibeli kutanta asi: “Hompa makura tayi mu koro yeguwo lyoVaisraeli.” (Vapanguli 10:16) Koneka asi Karunga kapi ga mwene tupu maudigu gawo nye ga lizuvhire kukora. Age kwa tente asi: “Ruhepo rwawo na ru diva.” (Exodus 3:7) Karunga kwa tanta asi: “Nkenye ogu ana kumuguma, ta gumu eyi yondiro po zonene kwange.” (Sakaliya 2:8) Apa ava tu koresa wopeke, nage kumukoresa.

Bibeli kutupa ehuguvaro asi nampili tu lipangure ndi tu lizuvhe asi ose kwato mulyo, nye ‘Karunga ga pitakana nomutjima detu, age ga diva nayinye.’ (1 Johanesa 3:19, 20) Karunga ga tu diva nawa kupitakana omu twa lidiva nyamwetu. Age ga diva nawa maukaro getu nomagazaro getu ntani malizuvho getu. Ntani age kutuzuvhira mo.

 Matjangwa kutupa ehuguvaro

• “Nsene ngo kanderera, tani ku limburura. Ngo zigida nge, tani yi tambura.”—JESAYA 58:9.

• “Nyamelike na diva magazaro aga na kara nago gokumuhamena, magazaro gokumuretera erago kapisi simpagwa, magazaro gokuhamena yokomeho eyi muna ndindire. Makura ngomu zigida nge, ngomu wiza tomu ya kanderere nge, ano ame tani mu limburura.”—JEREMIYA 29:11, 12.

• “Mahodi gange kwa ga pimpira mohupa zoge. Amesi wa ga ndomaika mobuke zoge?”—EPISAROME 56:8.

Pokudiva asi Karunga kutuzuvhira mo kukora, ayo kutuvatera tu lididimikire maudigu. Koneka eyi ya horokerere Maria:

“Ame kwa lizuvhire asi eparu udigu ntani kwa lizuvhire kukora kokunene apa munwange gomumati gonomvhura 18 ga fire kouvera wokankera ou ga verere nomvhura mbali. Ame kwa handukilire Jehova kweyi ga dilire kurugana ko yuma a mu verure.

“Konyima zonomvhura 6, kaume kange gomombungakriste kwa purakenene nge nawa apa na mu pwageserere malizuvho gange asi Jehova kapi ga hara nge. Apa na mene kumupwagesera malizuvho gange, yipo ga reserere nge 1 Johanesa 3:19, 20 ezi za tumangedere nge, azo kutanta asi: ‘Karunga ga pitakana nomutjima detu, age ga diva nayinye.’ Makura ta fatwilire nge asi Jehova ga diva maudigu getu.

“Nampili ngoso, kapi ya kere ureru kwange kufunda po ehandu! Makura tani resa Episarome 94:19, eli ali tanta asi: ‘Nsene nina kara noyinka momutjima gwange, makura ove to gu tendekere nge.’ Ame kwa lizuvhire ngwendi novelise edi nyame va di tjangera! Apa na ya divire asi Jehova kupurakena nge nokukwata nge egano, ya ya rerupilire nge kumupwagesera maudigu gange.”

Ayo kutuhengagwida sili pokudiva asi Karunga kutukwata egano ntani kutuzuvhira mo! Nye morwasinke pwa karera ruhepo? Morwa Karunga kututengeka kononzo detu ndi? Karunga nga hagesa po ruhepo ndi? Yirongwa yokukwama ko tayi ka zogera mapuro aga.