“Morwasinke Karunga ana dilire kurugana ko yuma?”
“YISINKE KARUNGA ANA DILIRE KURUGANA KO YUMA?”—Yimo ga lipure mupapa Benedict XVI, apa ga ka dingwire kamba zanare zounkwate moAuschwitz, mosirongo saPoranda.
APA AYI HOROKA YIMPAGWA, WA LIPURA ASI: ‘YISINKE KARUNGA ANA DILIRE KURUGANA KO YUMA?’ NDI NAMPO WA LIGWANEKERA NOUKARO OU WA KU NINKISIRE O LIPURE NSENE ASI KARUNGA KUKUPAKERA MBILI?
Nampo nove kulizuvha ngwendi Sheila, ogu ga kara moAmerika. Nampili ngomu ga kulilire mepata eli lya litulire mo moukarelikarunga, age kwa tanta asi: “Kutunda unona wange, ame kwa hara Karunga morwa yige Musiti gwetu. Nye kapi na kere nelikwatakano kumwe nage. Ame kwa gazarere asi age kumona nge, nye kumonena nge tupu koure. Ame kwa lizuvhire asi Karunga kapi ga nyenga nge ntani kapi na yi pulire asi age kupakera nge mbili.” Morwasinke Sheila ga karerere nomasinganyeko? Age kwa tanta asi: “Epata lyetu kwa ligwanekerere noyimpagwa yokulitwikida, ntani kwa monekere asi Karunga kapi ga tu vaterere.”
Ngwendi Sheila, nove kuvhura o lizuvhe asi Karunga yipo ga kara. Nye kuvhura o kare nomasinganyeko nsene asi age kukupakera mbili. Joba, ogu ga yi pulire asi Musiti ga kara nononkondo nounongo, nage ga kere nomasinganyeko. (Joba 2:3; 9:4) Apa Joba ga pitire moyimpagwa yokulitwikida, age kwa pulire Karunga asi: “Yinke ono kulihorekera nge? Yinke yokuruganena nge ngwendi nkore?”—Joba 13:24.
Yisinke azi uyunga ko Bibeli? Apa ayi horoka yimpagwa, ya wapa tu pe Karunga usima ndi? Pwa kara umbangi ou au likida asi Karunga kupakera mbili vantu ntani nkenye gumwe gwetu ndi? Pwanyamoge, kuvhura o tante asi Karunga ga ku diva nokukukwata egano nokukuzuvhira mo nokukuvatera momaudigu goge ndi?
Moyirongwa yokukwama ko, tatu ka lirongera ko kounsitwe omu Karunga a tu pakere mbili. (Varoma 1:20) Ntani natu ka konakona omu Bibeli azi yi likida asi Karunga kutupakera mbili. Moomu ono ‘kumudiva’ kupitira mounsitwe nomoBibeli, yimo ngo kara nehuguvaro asi Karunga ‘kukupakera mbili.’—1 Johanesa 2:3; 1 Peturusa 5:7.
