LUZIA KWA REMANA EGURU LYORUMOHO. Pounona, kwa mu kwete uvera woPolio, uvera ou au kundama uruvi. Apa Luzia ga kere nonomvhura 16, mukadi ogu nga ruganene kwa mu tanterere asi: “Karunga kwa kutengeka o kare sirema morwa kapi ngo limburukwa konane woge.” Nampili konyima zonomvhura dongandi, simpe Luzia nga diworoka nonkango odo.

APA DAMARIS GA YI DIMBWILIRE ASI ANA KARA NOKANKERA ZOMOURUVI, oguhwe kwa mu pulire asi: “Yisinke wa rugana dogoro yi ku horokere eyi? Nampo koyili wa rugana yoyidona. Eyi yiyo ana ku tengekere Karunga.” Nonkango odo da koresere sili Damaris.

Monomvhura dononzi, vantu kwa yi pura asi uvera kuna kara etengeko lyokutunda kwaKarunga. Buke zimwe [Manners and Customs of Bible Lands], kwa tanta asi sinzi sovantu womomazuva gaKristusa kwa yi pulire asi “uvera ngau tundilire kononzo domuntu mwene ndi dagumwe gekoro lyawo, ngositengekeso.” Ntani buke hena zimwe [Medieval Medicine and the Plague], kwa tanta asi mosiruwo sovapositoli, “vantu vamwe kwa yi pulire asi Karunga yige nga retesa po yimpagwa mokutengeka vantu kononzo dawo.” Eyi kutanta nye asi apa vantu wovanzi va fire moEuropa kouvera momvhura 1400, ngoso Karunga ga va tengekere kononzo dawo ndi? Ndi kwa kere asi uvera owo kwa u retesere po nokime ngomu va yi uyungire vapapali nomutji? Vamwe kugazara asi Karunga kuruganesa mauvera mokutengeka vantu. a

GAZADARA KO: Nsene asi uvera noruhepo kuna kara etengeko lyokutunda kwaKarunga, morwasinke nye Jesus ga verwilire vantu? Oyo ngano tayi lilimbi nouhungami waKarunga. (Mateusa 4:23, 24) Jesus narumwe si ga rugene yininke yokulilimba naKarunga. Age kwa tente asi: “Ame kurugana nkenye apa eyi ga hara” ntani “ame kurugana moomu ga tantera nge Tate.”—Johanesa 8:29; 14:31.

Bibeli za yi likida asi Jehova Karunga “kurugana eyi ya vyuka.” (Deuteronomium 32:4) Pasihonena, Karunga kapi ta vhuru kuretesa po simpagwa sondira omu muna rondo vantu wovanzi morwa ana hara kutengeka muntu gongandi mondira ozo! Abirahamu mukareli gwaKarunga gomulimburukwi kwa tente asi Karunga narumwe si ‘kuzonagura vahungami kumwe novadinikarunga.’ Age kwa tente asi ‘nampili kuna manga.’ (Genesis 18:23, 25) Bibeli kutanta hena asi: ‘Karunga kapi a rugana yoyidona.’—Joba 34:10-12.

Ruhepo oru atu ligwanekere naro, kapi yina kutanta asi Karunga yige ana kututengeka morwa nonzo. Jesus ga yi zeresere apa nage novarongwa vendi va mwene mugara ogu va hampuruka age mutwiku. “Varongwa vendi tava mu pura asi: ‘Murongi, yilye ga zona, gogu ndi vakurona vendi, va mu hampuruke age mutwiku?’ Jesus ta va limburura asi: ‘Kapisi yige ga zona, novakurona vendi nawo si, nye asi yirugana yaKarunga yi horokere mwendi.’”—Johanesa 9:1-3.

Morwa kukara nomagano gepuko, varongwa ya va tetukisire apa Jesus ga va tanterere asi mugara ogo kapisi yige ga zona novakurona vendi nawo kapi va zona. Jesus kapi ga verwire tupu mugara gwina nye hena ga vyukisire magano gepuko aga asi ruhepo kuna kara etengeko lyokutunda  kwaKarunga. (Johanesa 9:6, 7) Naina, ava vana kuhepa komauvera kuvhura kugwana ehengagwido mokudiva asi Karunga kapisi yige ana kuretesa po mauvera gawo.

Matjangwa kutupa ehuguvaro

• “Yeeyi Karunga kapi ava mu zedagwilire moudona, age hena kapi a zeda muntu.” (JAKOPO 1:13) Yininke ‘yoyidona’ eyi vana kuligwanekera nayo vantu ngwendi mauvera nokukora ntani nomfa, ntaantani ngayi ka hage po.

• Jesus Kristusa kwa ‘verwire vaveli navenye.’ (MATEUSA 8:16) Pokuverura vaveli, Jesus kwa likidire eyi ngau ka sikisa mo Uhompa waKarunga mouzuni mudima.

• “Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—EHORORO 21:3-5.

Morwasinke vantu ava ligwanekerere nokukora noruhepo? Wovanzi kwa lipura epuro eli nomvhura dononzi. Nsene asi Karunga kapisi yige a retesa po ruhepo, yilye ogu no pa usima? Malimbururo komapuro aga nava ka ga zogera mosirongwa sokukwama ko.