Yilye ogu no pa usima?
Nsene asi ruhepo kapisi Karunga a ru retesa po, morwasinke nye pana karere erumbu nomaudigu noyita nomauvera noyimpagwa? Bibeli za gava nokonda ntatu deyi pana karere ruhepo:
Kuliharera uwa nokulipongaikira yininke ntani nyengo. “Mouzuni omu mwa kara vanankondo ava ava hepekere mo vakwaawo.” (Muudisi 8:9) Vantu kuhepa morwa kupira kusikilira mo noyirugana yoyidona yovantu vamwe.
Ehudi kuhorokera nkenye ogu. Vantu kuhepa morwa “ehudi kuhorokera nkenye ogu.” (Muudisi 9:11) Eyi kutanta asi vantu kuvhura va hepe morwa awo kuna kara tupu pevango lyongandi posiruwo sosimpagwa.
Mupangeli gomudona gouzuni. Bibeli kulikida eyi ayi retesa po ruhepo. Azo kutanta asi: “Uzuni mudima kwa kara mepangero lyoMuzonaguli.” (1 Johanesa 5:19) ‘Muzonaguli’ ogo kwa kere muengeli gwaKarunga, yiyo ga lininka mwene a kare Satana, morwa “kapi ga kara mousili.” (Johanesa 8:44) Vaengeli vamwe kwa liharere uwa wavene yipo va lipakerere naSatana mokurwanesa Karunga, eyi yiyo ya va ninkisa va kare nompepo donondona. (Genesis 6:1-5) Kutunda tupu apa va rwanesere Karunga, Satana novaengeli owo kwa kara nonyanya ntani kuna kupiyaganeka uzuni mudima, unene po momazuva getu. Ngesi, Satana ana handuka unene, ntani kuna ‘kupukisa uzuni naunye,’ ano eyi kuna kureta maudigu “pevhu.” (Ehororo 12:9, 12) Yosili, Satana mupangeli gonyanya. Age kuhafa nsene vantu kuna kuhepa. Satana yige a retesa po ruhepo, kapisi Karunga.
GAZADARA KO: Muzonaguli yige gelike gokuvhura kuhepeka vantu va hana nzo. Mokulisiga, Bibeli kutanta asi: “Karunga yige eharo.” (1 Johanesa 4:8) Morwa eharo, “Karunga Munankondo kapi a rugana yoyidona.”—Joba 34:12.
Kuvhura o lipure asi: ‘Siruwo sokuhura kupi Karunga Munankondo nga pulisira Satana a twikire nepangero lyendi lyedona?’ Ngomu vana yi tumbura, Karunga kwa nyenga udona ntani age kumuguvisa nsene ose kuna kuhepa. Bibeli kukorangeda asi: “Mu peni yinka yeni nayinye, yeeyi age kumupakera mbili.” (1 Peturusa 5:7) Karunga ga tu hara ntani ga kara nononkondo dokukagusa po ruhepo noudona naunye, ngomu no ka yi resa mosirongwa sokukwama ko. a
a Komauzera gomanzi kuhamena eyi pana karere udona noruhepo, tara sirongwa 26 mobuke Hafera eparu narunye! va rugana Nombangi daJehova ntani kuvhura kuzigwana ko-www.pr418.com/kwn.