GAZARA asi ove kuna kutarera muvi, omu muna hamene muntu ogu wa hara. Azo tazi tameke pokulikida eparu lyagoogo muntu age simpe munona, ta ya lirongo kusika yikwanomusika dogoro ta ya yi kwata. Makura to ya mu mono age kuna kusika komeho zovantu nokupwaga-pwaga koyirongo yapeke ntani ta ya divikwa uzuni mudima. Ta ya kara sili musiki gomunene, kouhura womuvi ta fu.

Muvi ezi kapisi sihorokwa sousili, nye azo kulikida nawa-nawa eyi ayi horoka. Yi kare asi ogo muntu kwa kere musiki ndi mudiviunsitwe ndi muduki ndi gokudivikwa unene, esimwititi ngano ngali haga mokulifana. Muntu ogo kwa rugene yininke yoyiwa yoyinzi, nye ngano kwato ukurupe nonomfa, ngano yininke yinzi ga tompwere meparu.

Eyi yiyo yina kutundindira natuvenye. (Muudisi 9:5) Nampili tu kondje ngapi, kapi ngatu henduka ukurupe nonomfa. Kapisi yooyo yelike, nye pamwe ose kufa morwa uvera ndi yimpagwa yohararasi. Ngomu va yi singonona moBibeli, ose kwa fana ngwendi musi “ogu agu moneka, makura mosikando nare guna dongonoka.”—Jakopo 4:14.

Kwavamwe, eparu kumoneka ngwendi kwato mulyo awo kukwama nkareso ezi asi “tu lyeni nye oku tatu nu, yeeyi mungura tatu fu.” (1 Vakolinte 15:32) Nye vantu ava va kara nonkareso ezi kapi va kara nehuguvaro lyokomeho. Poyiruwo yimwe meparu, unene po apa atu ligwanekere nomaudigu kuvhura muntu a lipure asi: ‘Eli eparu yilyo lyelike tupu ndi?’ Kupi no vhura kugwana elimbururo?

Sinzi sovantu naina kwa huguvara movadiviunsitwe asi kuvhura va gwane elimbururo. Vadiviunsitwe novandokotora va gwana yininke eyi ayi vatere vantu va paruke siruwo sosire. Vadiviunsitwe vamwe kuna kurugana unene mokugwana yininke oyo. Yi kare asi tayi va tompoka ndi pira, epuro simpe lyeeli asi: Morwasinke atu kurupire nokufa? Pwa kara ehuguvaro asi nkore zetu nomfa ngava ka di gusa po ndi? Moyirongwa yokukwama ko, nayi ka faturura nokukalimburura epuro eli asi: Eli eparu yilyo lyelike tupu ndi?