Erongo lyokuzeruka noyimaliwa ya gwanena po mokukara nomeho zongwa ndi?
Sinzi sovantu kugazara asi ava va lironga unene ntani nongawo va kara nomeho zongwa. Awo kwa yi pura asi erongo lyokuzeruka lyokoUnivesiti kuvhura kuvatera muntu a kare murugani gomuwa, muntu gomuwa mepata ntani munavharerwa gomuwa. Awo kulizuvha hena asi erongo lyokuzeruka kuninkisa muntu a gwane yirugana yokufuta nawa ntani asi ava ava gwana yimaliwa yoyinzi kukara noruhafo.
ETOKORO ELI AVA TURA PO WOVANZI
Tara eyi ga uyunga ko Zhang Chen gomoTjina. Age kwa tanta asi: “Ame kwa yi pulire asi na hepa kuza koUnivesiti ni ya guse po ruhepo ntani nokugwana yirugana yokufuta yimaliwa yoyinzi yipo ni hafe meparu.”
Mokukara nomeho zongwa, wovanzi kwa hara kuza va ka lirongere konoUnivesiti dokudivikwa, pamwe moyirongo yapeke. Eyi yiyo ngava rugana vantu wovanzi dogoro paapa una wiza uvera woKorona. Konyara nomvhura 10 da ka pita, mbunga zimwe kwa rugene ekonakono ntani kwa tanta asi sinzi sovarongwa ava ava ka lirongera koyirongo yapeke kuna kara Vaasia.
Narunye vakurona kurugana unene yipo vana vawo va vhure kukalirongera konoUnivesiti dokoyirongo yapeke. Qixiang gomoTaiwan kudiworoka asi: “Vakondi vange kapi va kere nongawo, nye va tu tumine natuvenye moune wetu koKoledji zomoUnited States.” Mokufutira erongo lyangoso, epata lyawo kwa lizwekere momakongo, ngwendi moomu ava yi rugana sinzi sovantu.
YITUNDWAMO?
Wovanzi ava va kondjera erongo lyokuzeruka noungawo kwa kara nosinka
Erongo lyokuzeruka kuvhura kuwapukurura eparu mononkedi dongandi, nye wovanzi va yi nongonona asi kapi ava gwana yitundwamo moomu va yi ndindilire. Pasihonena, nomvhura nadinye odo va rugene unene noku korota makongo va fute konosure dokuzeruka, wovanzi kapi ava ya gwana yirugana eyi va hara. Erapoto lyaRachel Mui lyomoSaitunga ava tumbura asi Singapore’s Business Times kwa tanta asi: “Wovanzi ava va ka mana Univesiti kapi vana kugwana yirugana.” Jianjie, mugara ogu ga lironga unene ga tunga moTaiwan, kwa tanta asi: “Sinzi sovantu kapi ava gwana yirugana eyi va lirongera.”
Ava ava gwana yirugana eyi va lirongera kuyadimburura asi eparu lyawo kapi lya li tjindja ngamoomu va yi ndindilire. Apa Niran gomoTailand ga ka mene Univesiti moUnited Kingdom, ga ya gwene yirugana eyi ga lirongerere. Age kwa tanta asi: “Erongo lyokoUnivesiti lya vaterere nge ni gwane yirugana yokufuta yimaliwa yoyinzi ngamoomu na yi ndindilire. Nye na hepere kurugana unene ntani novili dononzi yipo ni gwane yimaliwa oyo. Konyima zosiruwo, kampani ozo ngani rugana kwa tjidire varugani vazo, kukwatera mo name. Na ya yi dimbwilire asi yirugana kapi ya gwanena po mokukara nomeho zongwa.”
Nampili nongawo ndi ava ya tompoka meparu simpe kuligwanekera nomaudigu mepata, nomauvera ntani kukara nosinka soyimaliwa. Katsutoshi gomoYapani, ga yi tambura asi: “Ame kwa kere noyimaliwa yoyinzi nye kapi na hefe morwa vantu ngava zuvhire nge mfudu ntani ngava tekura nge momudona.” Lam, mukadi ga tunga moVietnam kwa tanta asi: “Vantu wovanzi kukondja va gwane yimaliwa yoyinzi morwa awo kugazara asi tayi va pe meho zongwa, nye narunye awo kuyakara nosinka sosinene, tava tameke kuvera nokuguva-guva.”
Ngwendi Franklin, wovanzi va yi nongonona asi pwa kara yininke yomulyo meparu kupitakana erongo lyokuzeruka ntani ungawo. Mevango lyokudemenena koyininke yopanyama, vamwe kupapara meho zongwa pokukara muntu gomuwa nokuvatera wopeke. Nkedi ezi za gwanena po mokukara nomeho zongwa ndi? Resa sirongwa sokukwama ko o gwane elimbururo.
