Kukara muntu gomuwa ya gwanena po mokukara nomeho zongwa ndi?
Monomvhura dononzi, vantu wovanzi kwa gazarere asi kukara muntu gomuwa yizo nkedi zokukara nomeho zongwa. Pasihonena, sinzi sovantu womoAsia kwa kwatesa ko eyi ga uyungire mulirongi gedina Confucius (koyiha yomvhura 551-479 B.C.E.) asi: “Eyi wa dira kuhara asi vakweni va yi ku rugane, walye o yi rugana wopeke.” *
NZIRA AVA KWAMA VANTU WOVANZI
Wovanzi va yi pura asi kukara nononkedi donongwa yizo nkedi zokukara nomeho zongwa. Awo kuhetekera ko kulikida efumadeko nokukara nononkedi donongwa nokusikisa mo yitumbukira yawo ntani kukwaterera kezwi lyewa lyokomutjima. Linh, mukadi gomoVietnam kwa tanta asi: “Ame kwa yi pulire asi nsene ni hungika nokuuyunga nkenye apa usili, ngava tungika nge.”
Vamwe kuhetekera ko kurugana uwa morwa epuliro lyawo. Mugara gedina Hsu-Yun, ogu ga tunga moTaiwan, kwa tanta asi: “Ame kwa ronga nge asi muntu nsene a rugana yirugana yoyiwa age simpe muzuni nga hafa apa nga fa, nye nsene yoyidona nga zuvha kukora apa nga fa.”
YITUNDWAMO?
Ayo usili asi nsene tu ruganena vakwetu uwa, nose ngatu gwanena mo mauwa. Nye wovanzi ava ava hetekere ko kuruganena uwa vakwawo va yi dimburura asi kapi ava va ruganene nawo uwa. Mukadi gedina Shiu Ping, ogu ga tunga moHong Kong, kwa tanta asi: “Ame kwa lirongera ko kweyi ya horokera nge asi ava ava rugana uwa narunye kapi ava gwanene mo uwa. Ame kwa hetekerere ko kupakera mbili epata lyange ntani nokurugana yininke yoyiwa. Nye nonkwara dange kapi da tompokere morwa mugara gwange kwa tu zumbire namunange gomumati.”
Wovanzi va yi dimburura asi kapisi maukarelikarunga nagenye kuvatera vantu va kare wovawa. Mukadi gedina Etsuko, ga tunga moYapani kwa tanta asi: “Ame kwa lipakerere noukarelikarunga umwe nokurongikida yirugana yovadinkantu womoukareli owo. Ayo kwa tetukisire nge apa na ya dimbwilire asi vantu vamwe womoukareli owo ngava rugana yininke yokunyata nokurwanena unankondo ntani kuruganesa yimaliwa yongereka momudona.”
“Ame kwa hetekerere ko kupakera mbili epata lyange ntani nokurugana uwa. Nye nonkwara dange kapi da tompokere morwa mugara gwange kwa tu zumbire namunange gomumati.”—SHIU PING, GOMOHONG KONG
Vamwe ava va litulire mo mongereka nokurugana yininke yoyiwa kwa va dompesa apa ayi va horokere yininke yoyidona. Yimo ngoso ga lizuvhire mukadi gomoVietnam. Age kwa tanta asi: “Nkenye ezuva ngani randa manyango nonombya nonondya nokuyizambera vadimu vange nokukara nehuguvaro asi ngava tungika nge. Yirugana yoyiwa na rugene nokufumadeka mpo zetu monomvhura nadinye odo, mugara gwange kwa ya tamekere kuvera sili unene. Ano munange gomukadona ogu ga zire kosirongo sapeke a ka lironge, ta fu.”
Yisinke hena ya hepa po nsene asi kukara muntu gomuwa kapi ya gwanena po mokukara nomeho zongwa? Mokulimburura epuro eli, twa hepa mavyukiso ndi ntundiliro ezi nazi tu pa elimbururo komapuro getu ntani nokutulikida nkedi omu natu kara nomeho zongwa. Kupi natu vhura kugwana mavyukiso gangoso?
^ para. 2 Komauzera gomanzi kuhamena eyi ga rongere Confucius, tara egaununo 7, paragarafu 31-35, mobuke Mankind’s Search for God, va rugana Nombangi daJehova ntani kuzigwana ko www.pr418.com.
