Yisinke nawa-nawa ya hepa po mokukara nomeho zongwa?
Vantu wovanzi kwa yi pura asi meho zawo va zi va tokwera nare. Morwa epuliro olyo, awo kukwama yininke eyi ava gazara asi kuvhura yi wapukurure meho zawo.
EYI VA PURA WOVANZI
VALIRONGI WONOMBUNGURURU: Vamwe kwa yi pura asi meho zawo kwa korera monkedi omu adi gendi nombungururu di tunde pevango lyado nsene vana hampuruka mukeke. Awo kupura ava va lirongera mukarompepo ndi valirongi wonombungururu va va tantere eyi ngayi va horokera komeho yipo yi va vatere va ture po matokoro.
VAPUMBI: Vamwe kwa yi pura asi kuhedera vapumbi kuvhura yi va vatere va dive yininke eyi ngayi va horokera ntani neyi va hepa kurugana. Apa ava diva asi yininke musinke oyo, awo kuhetekera ko kuyinyokera po nokupapara nkedi omu nava kohonona po udigu wangoso yipo yi va tompoke meparu.
KUKARERA VADIMU: Vamwe kwa yi pura asi va hepa kukarera vadimu ndi yikarunga yokulisiga-siga yomafano yipo va gwane epopero nokuvatungika. Van, * mukadi ogu ga tunga moVietnam kwa tanta asi: “Ame kwa yi pulire asi mokulikida efumadeko kovadimu, name novana vange tatu kara neparu lyewa ntani nomeho zongwa.”
EHAMPURUKURURO: Wovanzi va yi pura asi apa a fu muntu kumuhampurukurura, nokukamuhampurukurura hena. Awo kugazara asi uwa ndi udona vana kuligwanekera nawo ngesi kuna kara yitundwamo yoyirugana yawo eyi va rugene komeho va ya va hampurukurure hena.
Nampili ngomu wovanzi ava tara mapuliro gangoso asi umpure, nye awo simpe kulihameka moyininke oyo, pokuza kovapumbi ndi koyimbanda va ka va zanekede, omu mwa hamena kuruganesa katemba ndi nonzimbu ndi nontarero ntani nayimwe hena ngoso. Awo kugazara asi kulihameka moyininke yangoso tayi va vatere va dive meho zawo.
YITUNDWAMO?
Ava va huguvara momapuliro nomoyirugana yangoso va kara neparu lyewa ntani nomeho zongwa ndi?
Konakona sihorokwa saHào, ogu ga tunga moVietnam. Age nga ruganesa valirongi wonombungururu, novapumbi ntani nokupura evatero kovadimu. Ngoso ya mu tompokere ndi? Age kwa tanta asi: “Ame kwa zumbanesere yimaliwa yoyinzi, tani lizweke momakongo, nokulitangwisa mepata ntani kwa ya verere uvera wokuguva-guva.”
Qiuming, mugara gomoTaiwan nage kwa yi pulire asi eparu nare va li tokora, nokupura movalirongi wonombungururu, nemehampurukururo, nomovapumbi ntani nga karere vadimu. Konyima zapa ga konakonene nawa mapuliro gangoso, age kwa tanta asi: “Ame na ya dimbwilire asi marongo nonompo dangoso kulirwanesa dene nadene ntani kupukisa. Tani ya nongonona asi eyi ava pumbu valirongi wonombungururu rorunzi kapi ayi siki mo. Ano kuhamena kehampurukururo, nsene asi kapi o diworoka eparu lyoge lyanare, ngapi nye omu no vhura kutjindja eparu lyoge lyepe yipo li wape?”
“Ame na ya dimbwilire asi marongo nonompo dangoso kulirwanesa dene nadene ntani kupukisa.”—QIUMING, GOMOTAIWAN
Mugara gedina Hào naQiuming ntani navamwe, kwa ya dimburura asi eparu lyetu kapi lya korera konombungururu ndi kovadimu ndi kehampurukururo ndi kegano eli asi eparu kwa li tokora nare. Eyi ngoso kutanta nye asi kapi tatu vhuru kuwapukurura meho zetu ndi?
Wovanzi kugazara asi mokukara nomeho zongwa va hepa kukondjera erongo lyokuzeruka ntani ungawo. Yitundwamo musinke va ligwanekera nayo vamwe ava va tulire po etokoro lyangoso?
^ para. 6 Mosirongwa esi neyi yokukwama ko, madina gamwe kwa ga rundumuna.
^ para. 16 Nonkango edi kudigwana moBibeli moVagarata 6:7. Egano olyo kwa li faturura mombuungiso ezi za divikwa asi Eyi a kunu muntu yiyo a zangura yooyo; nsene a kuna mahangu, nga zangura mahangu.
Kuvhura o hafere hena
RUHUNGU
Valirongi wonombungururu noyimbanda—Va diva yokomeho ndi?
Kuvhura o huguvare eyi ava pumbu valirongi wonombungururu noyimbanda ndi?
RUHUNGU
Eyi azi uyunga Bibeli kuhamena eparu nonomfa
Ose twa kara nosininke esi asi paruka konyima zonomfa ndi? Twa kara nomwenyo agu dili kufa ndi? Kupi va kara vafe?
