Bibeli kapi za zonauka po. Yitundwamo, ove kuvhura o kare noBibeli nokuresa mo. Nsene o horowora etoroko lyewa lyoBibeli, ngo vhura kuresa matjangwa gene-gene gokuhova. * Nye morwasinke Bibeli za dira kuzonauka koyimbumburu nokovarwanesi ntani noku kwava va here kutjindja mbudi zazo? Ngapi omu za lisiga nonobuke dapeke?

Valirongi wovanzi woBibeli nawo kwa uyunga ngwendi mupositoli Paurusa ogu ga tjenge asi: ‘Nkenye etjangwa, kwa li retesa po mpepo zaKarunga.’ (2 Timoteusa 3:16) Awo va yi pura asi Bibeli kapi va vhura kuzizonagura po morwa Nonkango daKarunga ntani asi mwene ga zi popera dogoro ngesi. Faizal, ogu vana tumbura mosirongwa sokuhova, ga ya tokwere kukonakona magano ogo pokulironga Bibeli. Eyi ga lirongere kwa mu tetukisire. Age ga lirongere asi moBibeli kapi mwa kara sinzi somarongo aga adi rongo nongereka. Ntani eyi ga lirongere moBibeli kuhamena sitambo saKarunga kevhu ya mu gumine komutjima.

Faizal kwa tanta hena asi: “Ngesi nina yi pura asi Bibeli ezi na kara nazo uhwi wokutunda kwaKarunga. Nsene asi Karunga yige ga sita uzuni, age ga kara nononkondo dokutupa Bibeli nokuzipopera. Nsene tu uyunga asi mbudi zomoBibeli kwa zi tjindja vantu, ose ngoso kuna kunsensa nonkondo daKarunga. Nyame yilye nye gokunsensa nonkondo daKarunga?”—Jesaya 40:8.