Hetakanesa eyi wa pura noBibeli
OVE kulitumbura asi Mukriste ndi? Nsene yimo, ove kuna kara gumwe govantu mabiliyona gavali, ava ava litumbura asi vasikuli vaKristusa. Pwa kara maukarelikarunga gomanzi aga aga litumbura asi Vakriste, nye marongo gawo neyi va pura kwa lisiga. Eyi wa pura kuvhura yi lisige unene nava ava litumbura asi Vakriste. Hepero o konakone eyi wa pura ndi? Yimo, ya kara hepero nsene ono hara kukara Mukriste ogu ga pura eyi azi rongo Bibeli.
Vasikuli vaJesus Kristusa kwa ya va rukire asi “Vakriste.” (Yirugana 11:26) Morwa pwa kere epuro limwe tupu, kapi va kere nedina lyokuvadimbwilisa. Vakriste ngava kwama marongo nomavyukiso gogu ga tameka Ukriste, Jesus Kristusa. Ngapi kuhamena ngereka zeni? Wa yi pura asi azo kuronga eyi nga rongo Kristusa ntani nokupura eyi va pulire vasikuli vendi wokuhova ndi? Ngapi no gwana malimbururo? Pokuruganesa Bibeli mokukonakona eyi wa pura.
Gazadara ko: Jesus Kristusa kwa fumadekere unene Nonkango daKarunga. Age kapi ga tambwire ava ngava pepura marongo goBibeli morwa nompo dawo. (Marukusa 7:9-13) Vasikuli wousili vaJesus marongo gawo kutunda moBibeli. Nkenye Mukriste ga hepa kulipura asi: ‘Marongo gomongereka zetu kwa tunda moBibeli ndi?’ Mokugwana elimbururo, hetakanesa eyi azi rongo ngereka zeni neyi azi rongo Bibeli.
Jesus kwa tente asi twa hepa kukarera Karunga mousili, ano usili kuugwana tupu moBibeli. (Johanesa 4:24; 17:17) Ntani mupositoli Paurusa kwa tente asi eparu lyetu kwa korera mokukasika “kediwo lyousili.” (1 Timoteusa 2:4) Ayo ya kara nomulyo asi eyi twa pura ya hepa kutundilira moBibeli. Morwa kwa hamena mo eparu lyetu.
OMU NATU HETAKANESA EYI TWA PURA NOBIBELI
Kuna kukuhundira o rese mapuro ntazimwe ntani koneka malimbururo gomoBibeli. Resa matjangwa moBibeli, ntani gazadara ko komalimbururo. Lipura asi: ‘Marongo gomongereka zetu ga liza neyi azi rongo Bibeli ndi?’
Mapuro gana kukwama ko kuvhura ga ku vatere o hetakanese nawa. Ono hara kuhetakanesa marongo gomongereka zeni neyi azi rongo Bibeli ndi? Nombangi daJehova nadi ka yi hafera mokukakuvatera o konakone Bibeli. Kuvhura o pure Nombangi daJehova va ku ronge Bibeli mawoko-woko, ndi kuvhura o tare koIntaneta zetu, jw.org/kwn.
