Kwato buke zimwe za fana ngwendi Bibeli. Azo kwa vatera vantu va rundurure eyi va pura. Ntani kwato buke za pita momarwaneso ngwendi Bibeli.

Pasihonena, valirongi vamwe kapi va yi pura asi Nobibeli edi twa kara nado kwa di tjangurura komatjangwa gokuhova. Gumwe ogu ga lironga kuhamena maukarelikarunga kwa tanta asi: “Kapi tatu diva nawa-nawa asi eyi va tjanga mo kwa vyuka. Ose kwa kara tupu nomatjangururo aga ga kara nomapuko gomanzi ntani ga lisiga unene nomatjangururo gokuhova.”

Morwa mapuliro gomaukarelikarunga gawo, vamwe kulipura nsene asi Bibeli kwa vyuka. Pasihonena, Faizal kwa mu rongere vakurona vendi asi Bibeli buke zokupongoka, nye magano gamo kwa ga tjindja. Age kwa tanta asi: “Eyi ya ninkisire nge ni kare nomasinganyeko apa vantu ngava hara kuzogera name kuhamena Bibeli. Ntani awo kapi va kara noBibeli zene-zene ezi va hovere kutjanga.”

Ya kara hepero kudiva nsene asi Bibeli kwa zi tjindja ndi? Konakona mapuro aga: Nsene kapi wa diva asi matumbwidiro gomoBibeli kwa tundilira komatjangururo gokuhova, kuvhura o huguvare matumbwidiro ogo ndi? (Varoma 15:4) Kuvhura o ruganese magano gomoBibeli mokutura po matokoro kuhamena yirugana nepata ndi noukareli woge nsene asi Nobibeli dantani kwa kara mo mapuko ndi?

Nampili ngomu nobuke doBibeli dokuhova dina kudira kumoneka, ose kuvhura tu ruganese matjangururo ganare goBibeli. Ngapi Bibeli va zi poperere kokuzonauka koyimbumburu nokovarwanesi ntani nokutjindja mbudi zazo? Ngapi epopero lyazo nali ku vatera o kare nehuguvaro asi Bibeli ezi tuna kara nazo ngesi kwa vyuka? Gwana malimbururo komapuro ogo moyirongwa yina kukwama ko.