SIRONGWA SOKUHOVA | BIBELI—OMU VA HETEKA KUZIZONAGURA PO
Bibeli kapi za zonaukire koyimbumburu
OMU VA HETEKERE KUZIZONAGURA PO: Vatjangi woBibeli ngava ruganesa yipepa noyipapa mokutjanga Bibeli. (2 Timoteusa 4:13) Ngapi yininke oyo ya tulire Bibeli mosiponga?
Sipepa kutauka, nonkango kudongoka usimbu ntani kuzonauka. Mulirongi Richard Parkinson naStephen Quirke kwa tanta asi: “Sipepa kuzonauka usimbu nokulisitunuka evhu. Aso kuvhura kuzonauka kouhwa nokonompuku, nsene si vhumbama mevhu.” Yipepa yimwe apa va yi gwene ayo yina hara kuzonauka.
Sipapa sikoli kupitakana sipepa, nye naso kuzonauka nsene si kara moupyu ndi momvhura. * Sipapa naso kuvhura kuzonauka koyimbumburu. Eyi yiyo ga zonaukilire matjangururo gamwe ganare. Ngano Bibeli za zonaukire koyimbumburu, ngesi ngano kapi tuna kara noBibeli.
EYI BIBELI ZA DILIRE KUZONAUKA PO: Veta zoVajuda kwa pangerere nkenye hompa a tjangurure ‘buke zaKarunga zonoveta,’ nobuke ntano dokuhova domoBibeli. (Deuteronomium 17:18) Ntani valirongi wovanzi kwa tjangwilire nobuke odo doveta, yipo nye apa ga kere Jesus pevhu nobuke odo ngava di gwana monosinagoge domoIsraeli nazinye nedi domoMakedoniya. (Rukasa 4:16, 17; Yirugana 17:11) Morwasinke nobuke dimwe odo da dira kuzonauka po dogoro naina?
Matjangururo gamwe goBibeli kwa ga gwene motundimbe otu va pungwire momakombombo kEfuta lyoKufa
Mulirongi Philip W. Comfort, kwa tanta asi: “Vajuda ngava pungura nobukegango dimwe doBibeli motundimbe yipo di dire kuzonauka.” Vakriste nawo kwa ya kweme mpo ozo. Yipo nye nobuke dimwe doBibeli danare kwa di gwene motundimbe ntani momakombombo.
YITUNDWAMO: Matjangururo gomanzi goBibeli kapi ga zonauka dogoro naina. Kwato buke za kara po siruwo sosire ngwendi Bibeli.
^ para. 5 Pasihonena, emanguruko lyosirongo saAmerika kwa li tjenge posipapa. Konyima zonomvhura 250, nondanda kwa ya zonaukire, nokumoneka si nawa.
