NYANYA MOMAMBO NTANI KUKWATERA KONONKONDO: Mbunga zelipakerero lyonomuhoko kwa tanta asi: “Vakadi wovanzi kuvakwatera kononkondo vagara vawo. Ntani kwa yi dimburura asi movakadi vatano, gumwe ngava mu kwatera kononkondo ndi ngava hara kumukwatera kononkondo.”

UKOROKOTJI: Erapoto limwe kwa tanta asi nombunga dovakorokotji dokusika 30 000 kurugana ukorokotji moAmerika. MoAmerika zokombindakano, movantu vatatu, gumwe gwawo kwa ligwanekera noukorokotji wonyanya.

EDIPAGO: Momvhura zimwe, vantu wokusika konyara harufa zemiliyona kwa va dipaga, kupitakana ava va dipagere moyita. MoAfrika zokoMbindakano ntani moAmerika vantu wovanzi kwa va dipaga unene kupitakana ava va dipaga mouzuni naunye. Vantu wokupitakana 100 000 kwa va dipaga moLatin Amerika momvhura zimwe tupu, ano moBrasilia vantu wokusika konyara 50 000. Nyanya ngazi haga po ndi?

Yisinke yina kuretesa po nyanya? Yinzi yina kuziretesa po, ngwendi: maudigu gomonomukunda noruhepo nonkareso zonyanya zovakurona ezi ava mono vanona nokuruganesa yikorwesa noyikwepangwe nokudira kukara nosinka keparu lyava wopeke ntani vakorokotji kurugana nyanya moomu vana harere.

Moyirongo yimwe kwa kondja unene mokuhagekesa po nyanya. Sitata esi sa kara novantu wovanzi moBrasilia kwa tanta asi edipago kwa gurumuka unene monomvhura murongo da ka pita. Nye simpe ukorokotji kuna kuligwederera nampili ngomu edipago lina gurumuka. Yisinke ngayi hagekesa po nyanya?

Mokuhaga po nyanya vantu va hepa kurundurura nkareso zawo. Vantu wonyanya mokurundurura nkareso zawo, va hepa kuhara wopeke nokuvafumadeka ntani nokuvafira sinka.

Yisinke nayi tumangeda muntu a ture po marunduruko ogo? Tara eyi azi rongo Bibeli:

• “Eharo lyetu lyokuhara Karunga lyeli asi, ose atu sikise mo yipango yendi.”—1 Johanesa 5:3.

• “Kufumadeka HOMPA yiko kunyenga udona.”—Yisewe 8:13.

Kuhara Karunga ntani kutjira kumuguvisa kuvhura kutumangeda vantu wonyanya va rundurure nkareso zawo. Eyi kuhoroka sili ndi?

 Konakona sihorokwa saAlex * ogu ga kere nomvhura 19 modorongo zomoBrasilia morwa nyanya. Konyima zokulironga Bibeli noNombangi daJehova, nage ga ya kere Mbangi zaJehova momvhura 2000. Ga rundwilire nkareso zendi zonyanya ndi? Age kwa liverere koudona naunye ou ga rugene. Alex kwa tanta asi: “Ame kwa ya tamekere kuhara unene Jehova kweyi ga gusira nge po. Kupandura Jehova nokumuhara kwa vatera nge ni rundurure nkareso zange.”

César gomoBrasilia nga lihameke mokuteza nombanga nomambo nokuruganesa uta mokuhakana yiweka yovantu. Age kwa yi rugene nomvhura 15. Yisinke ya mu vaterere a rundurure nkareso zendi? Apa ga kere modorongo yipo ga tamekere kulironga Bibeli noNombangi daJehova. Age kwa tanta asi: “Na ya divire sitambo separu. Nokutameka kuhara Karunga ntani na tjilire kumuguvisa. Ame kwa pandwire Jehova kweyi ga ruganena nge. Eharo nokutjira kuguvisa Jehova ya vatera nge ni rundurure nkareso zange.”

Yisinke ayi likida yihorokwa eyi? Kulikida asi Bibeli za kara nononkondo dokutjindja eparu lyovantu. (Vaefeso 4:23) Alex ogu tuna tumbura kwa tanta hena asi: “Eyi na lirongere moBibeli kwa fene ngwendi mema aga ga zeresere nge ni sige magazaro gange gomadona. Yininke eyi na gazarere asi kapi ngani vhura kuyisiga.” Nsene tu zwida nondunge detu nombudi zongwa zomoBibeli, ureru kusiga yirugana yoyidona. Nonkango daKarunga kwa kara nononkondo dokuzeresa. (Vaefeso 5:26) Eyi kuninkisa vantu wonyanya va sige nkareso zawo nokukara vantu wombili. (Varoma 12:18) Nsene va sikisa mo magano gomoBibeli, awo kuyakara nombili meparu lyawo.—Jesaya 48:18.

Nombangi daJehova dokupitakana pomamiliyona ntantatu ava kara moyirongo 240 va dimburura eyi ayi hagekesa po nyanya. Vantu womarudi nonontundiliro dokulisiga-siga kwa lironga kuhara Karunga nokutjira kumuguvisa ntani kwa hara vakwawo mouzuni mudima. (1 Peturusa 4:8) Awo va yi likida asi uzuni wokudira nyanya yiko ngau ka kara.

Bibeli kwa tumbwidira asi Karunga ntaantani nga ka guse po nyanya pevhu. Karunga ntaantani nga ka zonagure uzuni ou ‘nokukapangura vadinikarunga navenye nokuvahanagura po.’ (2 Peturusa 3:5-7) Kapi ngaku ka kara vantu wonyanya. Ngapi tuna yi diva asi Karunga ana hara kugusa po nyanya?

Bibeli kutanta asi Karunga “kwa nyenga” ava va hara nyanya. (Episarome 11:5) Musiti gwetu kwa hara mbili ntani eyi ya hungama. (Episarome 33:5; 37:28) Eyi yiyo nga ka zonagwira po vantu wonyanya narunye.

Uzuni woupe wombili pepi una kara. (Episarome 37:11; 72:14) Ove kuvhura o lironge yoyinzi kuhamena omu no wapera mokukaparuka mouzuni wokudira nyanya.