Posiruwo sanare, Vajuda kwa tjilire unene uvera woyingondwe. Awo kwa kere uvera woudona ou ngau ndembangura nonyara nokuzonagura maruha gorutu. Kapi pwa kere mutji gokuuverura. Ava va kere nouvera owo ngava likarere velike ntani va hepere kuzigira asi: “Na nyata, na nyata.”—Levitikus 13:45, 46.

Vampitisili woVajuda kwa tulisire po veta kuhamena yingondwe ezi za dilire kuliza nomatjangwa, ntani za digopesere eparu lyovanayingondwe. Pasihonena, awo kwa pangerere asi nokuhedera si munayingondwe ure wonometa mbali. Nye nsene mpepo kuna kupepa, nokumuhedera si ure wonometa 45. Valirongi vamwe kwa torokere veta zomoBibeli ezi za uyunga asi munayingondwe a “likerere gelike ponze zokamba,” asi age nokuvhura si kuhwilira moyitata eyi va kundurukidire nomakuma. Yipo nye, murongi gumwe apa nga mono munayingondwe kuna kuwiza mositata, nga mu zuguma mamanya nokutanta asi: “Tengura kevango lyoge, no nyateka vakweni.”

Nye Jesus kapi nga tekura vanayingondwe monkedi zangoso. Mevango lyokuvatjida-tjida, age nga va kwata nokuvaverura.—Mateusa 8:3.

Vampitisili womaukarelikarunga goVajuda ngava litatana kuhamena elizumbo. Posiruwo simwe, Vafalisayi vamwe kwa hetekere Jesus pokumupura asi: “Mugara kuvhura kuzumbira mukadendi mokonda nkenye ezi ndi?”—Mateusa 19:3.

Veta zaMosesa kwa pulisilire mugara a zumbe mukadendi nsene ana “mono yuma yoyidona” mwendi. (Deuteronomium 24:1) Posiruwo saJesus, pwa kere nosikora mbali dovarongi womaukarelikarunga edi ngadi lirwanesa kuhamena veta ozo. Sikora zimwe ngazi tanta asi konda zelike zeyi mugara na zumbira mukadendi ntudi ana hondere. Ano nkwawo ngazi tanta asi mugara kuvhura kuzumbira mukadendi nkenye konda. Azo ngazi tanta hena asi mugara kuvhura kuzumba mukadendi nsene kapi ana kumuterekera nondya donongwa ndi nsene ana hara kukwara ko mukadi gwapeke.

Ngapi omu Jesus ga limbwilire epuro lyoVafalisayi? Age kwa tente asi: “Ogu a zumbu mukadendi, nye pwa hana konda zehondero, a ka kware nagepeke, nonkwara a teza.”—Mateusa 19:6, 9.