KUVHURA o rese Bibeli zoRuhebeli ndi? Hawe. Nampo kapi wa mona Bibeli zoRuhebeli. Nampili ngoso, pokulironga kuhamena munekuto gedina Elias Hutter ntani Nobibeli mbali edi ga tjenge moRuhebeli ngayi ku tumangeda o kare norupandu koBibeli ezi wa kara nazo.

Elias Hutter kwa mu hampurukire momvhura 1553 mokadoropa Görlitz pepi nomururani gwaNdovesiranda ogu gwa teta sirongo saPoranda ntani Czech Republic. Elias kwa lirongere maraka gomoAsia kounivesiti zaLutheran mositata, Jena. Apa ga kere nonomvhura 24 yipo va mu tulire a kare profesora geraka lyoRuhebeli mositata Leipzig. Mokumona asi ga divire nawa maraka, age ga totere po sure mositata Nuremberg yipo varongwa va lironge Ruhebeli, Rugereka, Ruratina ntani Rundovesi monomvhura tupu ne. Oyo kapi ya tompokere konosure ndi konounivesiti dapeke.

Momvhura 1587, Elias yipo ga pwagesere Bibeli zoRuhebeli ezi tuna kutumbura naina asi Etestamende Lyekurukuru. Bibeli ozo kwa zi tumbwire asi Derekh ha-Kodesh, nonkango va gusa mwaJesaya 35:8 kutanta asi: “Nzira zokupongoka.” Ntjangeseso ezi va ruganesere moBibeli ozo kwa twaredesere vantu va uyunge asi “nayinye eyi ya kara mo kulikida ufuuli woBibeli ezi.” Nye eyi ya ninkisire Bibeli ezi zi kare nomulyo kuna kara monkedi omu za vaterere varongwa va vhure kulironga Ruhebeli.

Mokukwata egano eyi Bibeli zoRuhebeli zaElias za vaterere varongwa, tu tareni maudigu gavali aga va ligwanekerere nago pokuresa Bibeli moRuhebeli. Udigu wokuhova kwa kere noalfabeti domoRuhebeli, ano wauvali kwa kere yizupwirankango nonosingonono nkangorugano demeraka olyo. Pasihonena, nkango zoRuhebeli נפשׁ (monondanda nefesi) kutanta asi “mwenyo.” MoRuhebeli etjangwa lyaHesekiyeli 18:4 nkango “mwenyo” kwa tameka nosizupwirankango esi ה (monondanda, ha) makura tazi moneka ngesi הנפשׁ (monondanda, ha nefesi). Makura muntu ga dira kuyidiva oyo ta gazara asi nkango הנפשׁ (ha·nefesi) ntani נפשׁ (nefesi) kuna kara nonkango mbali edi da lisiga.

Mokuvatera varongwa, Elias kwa ruganesere nontjangeseso mbali. Nkango zene ko kwa zi sovaganeka ano yizupwirankango nonosingonono  nkangorugano kapi va yi sovaganeka. Ntjangeseso ozo kwa vaterere varongwa va dive kudimburura nkango ko zene zoRuhebeli yipo va vhure kulironga eraka olyo. MoBibeli zoRuingilisa namo kwa ruganesa mo ntjangeseso zokulifana konondanda dokonhi. Nkango ko zene kwa zi sovaganeka ano yizupwirankango nonosingonono nkangorugano kapi va yi sovaganeka. Yihonena yina tuna mono kwa likida tjangeseso ezi ga ruganesere Elias moBibeli zoRuhebeli metjangwa lyaHesekiyeli 18:4 ntani nezi va ruganesa moBibeli zoRuingilisa konondanda dazo dokonhi.—New World Translation of the Holy Scriptures—With References

Elias kwa ndurukire hena ruha roBibeli tuna kutumbura asi Etestamende lyepe momaraka 12. Etestamende olyo kwa li pwagesere moNuremberg momvhura 1599, alyo kulitumbura asi Nuremberg Polyglot. Elias kwa here hena kutoroka moRuhebeli Matjangwa goRugereka. Nye age kwa tente asi ngano “ga futire yimaliwa yoyinzi” mokugwana Etestamende lyepe moRuhebeli ngano kapi ya tompokere. * Yipo ga tokwere kutoroka mwene moRuhebeli Etestamende lyepe lyoRugereka. Age kwa tulilire ntere yirugana yapeke, a vhure kutoroka Etestamende olyo momvhura zimwe tupu.

Etoroko lyaElias lyoMatjangwa goRugereka moRuhebeli lya wepe ndi? Mulirongi goRuhebeli Franz Delitzsch kwa tente asi: “Etoroko lyendi lyoRuhebeli kulikida ekwatogano lyendi lyeraka eli va dira kudiva nawa Vakriste nye simpe mulyo kuresa mo, morwa age kwa ruganesa nontanto dokuwapera.”

Elias kapi ga ya kere ngawo kosirugana sendi sokutoroka, morwa Nobibeli dendi kapi ngava di randa nawa. Nampili ngoso, etoroko lyendi mulyo ntani kwa kundama vantu. Pasihonena, Etestamende lyendi lyepe lyoRuhebeli kwa ya li wapukurwire nokulindurukurura William Robertson momvhura 1661, ano Richard Caddick momvhura 1798. Apa ga torokere Etestamende lyepe moRuhebeli, nontumbwisiso domoRugereka Hompa (Kiriyosi) ntani Karunga (The·osʹ) kwa di torokere asi Jehova (יהוה, JHVH) ntani monovelise omu va temwinine Matjangwa goRuhebeli ndi apa ga mwene asi pana fire edina Jehova, age kwa litulire po. Eli kuna kara etoroko lyomulyo morwa matoroko gomanzi gEtestamende lyepe kapi va tura mo edina lyaKarunga, nye Elias metoroko lyendi ga tulire mo edina Jehova apa lya fira moMatjangwa goRugereka.

Apa ngo mona edina Jehova moMatjangwa goRugereka, ngo diworoke sirugana saElias Hutter ntani Nobibeli dendi doRuhebeli.