Kuvhura tu kare nehuguvaro asi matumbwidiro nagenye gaKarunga ngaga sika mo ndi? Jesus ga kere nehuguvaro ntani eyi nga rongo vantu ya va vaterere va tunge po epuro. Tu konakoneni sifanekeso esi ga geve pEudiso lyopoNdundu zoMauzwe, eli lya kara mwaMateusa 5:18 asi: “Yosili nina kumutantera asi, nampili eguru nevhu li dongonoke, koVeta zaKarunga [nondanda si ndi] nokaninkegona si kaaka ngaka tunda ko, dogoro noku ngayi sika mo nayinye.”

Ndanda zonunu po monoalfabeti doRuhebeli kuna kara י (kutanta asi yod) azo yizo zokuhova monondanda ne edi da karera po edina lyaKarunga, Jehova. * Valirongi womatjangwa noVafalisayi kapi tupu va tere asi nonkango domoVeta zaKarunga yido delike da kere nomulyo nye hena nankenye ‘kaninkengona’ ndi nkenye ndanda.

Jesus kwa uyungire asi eguru nevhu ngayi dongonoka po nye nonkango domoVeta ngadi sika mo. Nye twa yi diva kuliza noMatjangwa asi eguru nevhu lyene-lyene ngayi kara narunye. (Episarome 78:69) Yipo nye, Jesus kwa here kunkondopeka sitwa asi nkenye nkango va uyunga moVeta ngazi sika mo.

Jehova Karunga kupakera sinka mauzera gomanunu ndi? Nhi. Pasihonena: Vaisraeli kwa va tanterere asi nokanunu si va vandagure yisupa yonzwi zoPaska. (Exodus 12:46) Ago kwa kere mauzera gomanunu. Nye awo va kwete egano eyi va va silikilire kuvandagura yisupa ndi? Hawe. Nye Jehova Karunga ga yi divire asi mauzera gena kwa ya kere uporofete ou ga ya sikisire mo Mesiyasa ogu va dilire kutezagura yisupa yendi apa va mu dipagere.—Episarome 34:20; Johanesa 19:31-33, 36.

Yisinke natu lirongera ko kononkango daJesus? Nose kuvhura tu kare nehuguvaro lyokupama asi matumbwidiro nagenye gaJehova Karunga ngaga sika mo nawa-nawa. Olyo kuna kara ekorangedo lyononkondo lyomondanda zonunu zoRuhebeli.