Mupositoli Paurusa kwa singwenene Jehova * asi ‘Karunga ogu a kwafa nkenye apa. Age yige a tu hengagwida momaudigu getu nagenye.’ (2 Vakolinte 1:3, 4) Bibeli kutanta asi Karunga kuvhura kukwafa nkenye muntu ntani kwato udigu wokumuvhura mokugava ehengagwido.

Nye, twa hepa kurugana ko yuma nsene tuna hara Karunga a tu hengagwide. Nsene tuna hara ndokotora atu hakure twa hepa kuza kosipangero. Eyi yiyo azi tu korangedere Bibeli asi: “Hedeni Karunga pepi, nage a mu hede pepi.”—Jakopo 4:8.

Ngapi omu twa diva sili asi Karunga ngatu hedera pepi? Morwa age kututantera asi ana hara kutukwafa. ( Tara kakende.) Ntani twa kara noumbangi omu ga vaterere vantu womosiruwo sanare nava womosiruwo setu.

Ngwendi moomu vantu vana kupapara naina ekwafo kwaKarunga, hompa Ndafita nage kwa paparere ekwafo. Age kwa kanderere kwaJehova asi: “Zuvha nge nsene tani ku kugu asi o kwafe nge.” Karunga ga mu kwefe ndi? Nhi. Morwa ga tente asi: “Age kwa kwafa nge, yiyo yina hafesa nge.”—Episarome 28:2, 7.

Karunga kwa pa Jesus sirugana sokugava ehengagwido. Sirugana oso kwa hamena mo ‘kuverura mutjima gwanyanyauka’ ntani ‘kuhengagwida navenye ava vana kulira.’ (Jesaya 61:1, 2) Ngwendi moomu va yi pumbire, Jesus kwa kwefe vantu “ava wa rorora udigu.”—Mateusa 11:28-30.

Jesus kwa hengagwidire vantu pokuvapa mapukururo gomawa nokuvatekura monkedi zonkenda ntani nokuvaverura. Ezuva limwe munayingondwe kwa likwamberere Jesus asi: “Sinene o yi panga, kuvhura kuverura nge.” Jesus ta zi mu gwire nkenda, ta limburura asi: “Nina yi panga, veruka.” (Marukusa 1:40, 41) Makura munayingondwe ta veruka.

 Naina, Jesus kapi ana kara pevhu a tu hengagwide. Nye Guhwe, Jehova, “Karunga ogu a kwafa” ndi a hengagwida, kuna kugava ekwafo kwava vana li hepa. (2 Vakolinte 1:3) Tara nonkedi ne edi a ruganesa Karunga mokuhengagwida vantu.

• Bibeli. “Nkenye eyi va tjangera momatjangwa, kwa yi tjangera asi yi tu ronge. Kwa yi tjangera asi tu kare nehuguvaro eli ali tundu medidimiko nehengagwido.”—Varoma 15:4.

• Mpepo zokupongoka. Konyima zonomfa daJesus, mbungakriste kwa kere mombili. Morwasinke? Morwa kwa kere ‘netjiro lyokutjira Karunga ntani nekwafo lyompepo zokupongoka.’ (Yirugana 9:31) Mpepo zokupongoka, azo nonkondo dononene edi a ruganesa Karunga. Karunga kuvhura kuziruganesa mokuhengagwida nkenye muntu ntani mwankenye ukaro.

• Ekanderero. Bibeli kutukorangeda asi: ‘Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Ano mbili zaKarunga, ezi za pitakana unene nondunge nadinye, ngazi kunga nomwenyo deni nomagazaro geni.’—Vafilipi 4:6, 7.

• Vakriste vakwetetu. Kuvhura va tu hengagwide poyiruwo yomaudigu. Mupositoli Paurusa kwa tente asi vakwetu “ngava kwafa nge unene” ‘momaudigu nomoruhepo.’—Vakorosi 4:11; 1 Vatesaronika 3:7.

Nye kuvhura o lipure asi: ‘Ngapi ngayi horokera nge oyo?’ Konakona yihonena yovantu mosirongwa sina kukwama ko ava va ligwanekerere nomaudigu. Ngwendi yiwo, nove no dimburura omu Karunga ga sikisa mo etumbwidiro eli asi: “Ame ngani mu hengagwida . . . , moomu a hengagwida zina munwendi.”—Jesaya 66:13.