NDAFITA kwa sikeme apa vakwayita va dukire va mu pitakane. Awo kwa tukukire nokuduka va tunde oku ya karere yita. Yisinke ya va tjilisire? Ndafita kwa va zuvhire kuna kurugurura kutumbura edina lyomugara gumwe. Makura Ndafita ta mono mugara gomunene ntani gomure kupitakana vagara navenye ava nampo ga mwene.

Mugara ogo kwa kere Golyata! Ndafita ga kwete egano eyi va dukilire vakwayita, morwa mugara gomunene. Mukumo gwendi kwa pitakanene vagara vavali wovanene nampili kapi ana kara noyirwiso yendi. Age kwa kere noyirwiso nayinye, ntani kwa kere ependa mokurwa. Golyata ta zigire. Gazara tupu ezwi lyendi lyenene omu lina kuzuvhika monondundu ngomu ana kuswaura vakwayita woVaisraeli ntani hompa gwawo, Sauru. Age kwa here mugara gumwe a ze aka rwe nage yipo yita yi hage.—1 Samwere 17:4-10.

Vaisraeli kwa tjilire. Hompa Sauru nage kwa tjilire. Apa ga ya va gwene Ndafita apo pana piti kwedi kutunda apa va tameka kulikondjesa. Vakwayita woVafilisiti nava woVaisraeli kwa tjilire kulirwanesa apa Golyata nga swaura Vaisraeli nkenye ezuva. Ndafita ya mu guvisire. Hompa goVaisraeli novakwayita vendi kukwatera mo vakuru vaNdafita vatatu navenye kwa tjilire! Nye eyi ya guvisire unene Ndafita, yeeyi Golyata ga swawire Karunga gwaIsraeli, Jehova! Yisinke ga rugene ko Ndafita nampili ngomu ga kere mumati? Ntani yisinke natu lirongera ko kepuro lyaNdafita?—1 Samwere 17:11-14.

Tanko tu tare eyi ya horokere komeho zosihorokwa esi. Ezuva limwe kongurova Ndafita kwa kere konondundu daBeterehema a lise nonzwi doguhwe. Age kwa kere mumati gorutu roruwa gomugeha ntani gomeho gomawa. Apa nga kara gelike nga siki siumba sendi. Unsitwe yiwo ngau mu tumangeda a sike. Moomu nga siki, yimo ga ya divire nawa kusika. Kongurova zoozo, Ndafita tava mu zigida oguhwe.—1 Samwere 16:12.

Apa ga ya sikire ta ya gwana oguhwe Isayi kuna kuuyunga nomuswamane. Age kwa kere muporofete Samwere. Jehova ga mu tumine a ya gwaveke gumwe govana vaIsayi a kare hompa gwaIsraeli. Samwere ga mwene vakuru vaNdafita ntambali, nye Jehova kwa mu tanterere asi kwato ogu ana horowora po. Apa ga ya sikire Ndafita, Jehova ta tantere Samwere asi: ‘Mu gwaveka, morwa yige googo.’ Makura Samwere ta gusa ruvinga romagadi ta mu gwavekere komeho zovakuru vendi. Kutunda opo eparu lyaNdafita kwa litjindjire. Bibeli kutanta asi: “Kutunda kezuva olyo nokomeho mpepo zaKarunga kwa kere naNdafita.”—1 Samwere 16:1, 5-11, 13.

Apa va mu gwavekere, Ndafita ga ruganesere nonkondo dendi mokukondjera uhompa ndi? Hawe, age ga ndindilire mpepo zaJehova zi mu pitisire dogoro paapa sa ya sikire mo siruwo  sendi sokupangera. Ngomu ga ndindilire, age kwa twikilire kulisa nonzwi. Aso kwa kere sirugana sa hepere eligawo nouradi. Siunda soguhwe kwa si homokerere yikando yivali, pomuhowo nyime ntani simbungu. Ndafita kapi ga tjidire yikasama oyo age ure ana kara, nye kwa rwene nayo yipo a popere siunda soguhwe. Yikando nayinye oyo, age kwa dipagere yikasama.—1 Samwere 17:34-36; Jesaya 31:4.

Ezuva limwe, Ndafita kwa mu zigidire, apa hompa Sauru ga zuvhire nkareso zendi zongwa. Nampili ngomu ga kere mukwayita gononkondo, Sauru kwa rwanesere Jehova morwa kudira kutambura mavyukiso gendi. Jehova ta mu gusa mpepo zendi, makura mpepo zondona tazi mu wizire, ntani ngazi mu ninkisa a handuke nokukara nonyanya. Musika gomuwa yigo ngagu tjida mo mpepo ozo zondona. Vakwayita vamwe vaSauru va divire asi Ndafita age musiki gomuwa ntani kurwana. Yipo va mu zigidire a ka kare gumwe govasiki womombara zaSauru ntani nokukamusimbira yirwiso yendi.—1 Samwere 15:26-29; 16:14-23.

Vadinkantu kuvhura va lirongere ko kepuro lyaNdafita. Apa Ndafita nga dili kurugana yuma nga ruganesa siruwo oso mokunkondopeka ukaume wendi naJehova. Age kwa tungire po udivi ou wa mu ninkisire va mu pe yirugana. Somulyo po, age kwa tambwire epitisiro lyompepo zokupongoka. Aso kuna kara sirongwa sosiwa kwanatuvenye.—Muudisi 12:1.

Apa Ndafita ga kere mombara zaSauru, pamwe nga tengura kembo a ka lise nonzwi doguhwe. Posiruwo oso yipo Isayi ga mu tumine a ka tare ko vakuru vendi omu vana karere, ava va kere vakwayita vaSauru. Ndafita kwa limburukwire makura ta zi koMuramba gwaEra oku va kere vakuru vendi. Apa ga ka sikire, age kwa tetukire kukagwana nombunga mbali dovakwayita kuna kutjira kulirwanesa, ngomu vana yi tumbura kevareko lyosirongwa. Vakwayita owo kwa kere vamwe koruha oru romuramba, ano vamwe koruha rwina.—1 Samwere 17:1-3, 15-19.

KwaNdafita, owo kapi wa kere udigu wounene. Ngapi vakwayita vaJehova Karunga nava tjira mugara gumwe, ogu hena nga dili kukarera Jehova? Ndafita kwa yi tere asi Golyata kuna kuswaura Jehova. Yipo ga uyungire asi age kuvhura a ka rwise Golyata. Mukurwendi Eliyaba ga zuvhire nonkango odo. Makura ta mu handukire, nokumurundira asi age kuna wizire a ya tarere yita. Nye Ndafita ta mu limburura asi: ‘Yisinke nina zono? Ame kuna pura tupu.’ Ndafita ta uyunga hena asi age kuvhura kufunda Golyata, makura gumwe ta ka yi tantera hompa Sauru. Makura hompa ta tumine Ndafita va mu rete.—1 Samwere 17:23-31.

Ndafita kwa uyungire nonkango edi dekorangedo kwaSauru kuhamena Golyata asi: ‘Nomutjima deni da ha dompa morwa mugara gumwe tupu.’ Sauru novakwayita vendi kwa dompere nomutjima morwa Golyata. Awo nampo kwa lihetakanesere  naGolyata mugara gomunene gomure. Tava gazara hena asi Golyata kuvhura a va funde po navenye. Nye Ndafita kapi ga yi gazarere oyo. Age kwa tere udigu owo monkedi zapeke. Yipo ga tokwere kukarwa naGolyata.—1 Samwere 17:32.

Sauru ta mu tantere asi: “Ove nokuvhura si o ka rwe nomufilisiti, mumati ono huru opo, yeeyi age mukwayita ga kara kutunda unona wendi.” Ndafita munona sili ga kere ndi? Hawe, age kapi tupu ga waperere kukara mukwayita morwa nga moneka ngwendi mudinkantu. Siruwo oso, age ga divikwa nare asi kurwana nampo age kuna kutunda monomvhura doudinkantu.—1 Samwere 16:18; 17:33.

Ndafita yipo ga tanterere Sauru kweyi ga rugene nyime nasimbungu. Age kwa likangangere ndi? Hawe. Ndafita ga divire omu ga fundire yikasama oyo. Age kwa tente asi: “HOMPA ogu ga parura nge kovanyime nomarundu, na parura nge hena mokuwoko kogu Mufilisiti.” Apa ga zuvhire oyo, yipo Sauru ga tente asi: “Zende, nye HOMPA ngano a ka kare noge.”—1 Samwere 17:37.

Ono hara kukara nepuro ngwendi lyaNdafita ndi? Epuro lyaNdafita kapi lya kere lyomokana tupu. Age kwa kere nepuro mwaKarunga morwa ediwo ntani neyi ga limonenene. Age ga divire asi Jehova Mupopeli ntani kusikisa mo matumbwidiro gendi. Nsene tuna hara kukara nepuro lyangoso, twa hepa kulironga kuhamena Karunga. Ngomu tuna kuparuka kuliza neyi tuna kulironga, epuro lyetu ngali nkondopara.—Vahebeli 11:1.

Pomuhowo, Sauru kwa geve yikoverero yamwene yoyita kwaNdafita. Kwa mu pere embare lyosivera songoporo ntani nosikoverero sonongande dongoporo, ngwendi yaGolyata. Ndafita ta hetekere ko kugenda nye kwa mu digoperere morwa kapi ga yi dwara rumwe. Age kapi va mu dewire ngomukwayita, yiyo ga dilire kuvhura kuruganesa silikandwiso, unene po esi nga ruganesa Sauru, ogu ga kere mugara gomure momuhoko gwaIsraeli. (1 Samwere 9:2) Age kwa yi hutwire, makura ta dwara yikoverero eyi nga lisisa nonzwi.—1 Samwere 17:38-40.

Ndafita kwa simbire siuro esi nga lisisa nonzwi nondjato ntani nosizugumiso. Sizugumiso kwa monekere ngwendi kwato mulyo, nye aso sirwiso sononkondo. Ntani kwa likulikire ndjato, ezi nga ruganesa pokulisa nonzwi. Age nga gusa kamanya mondjato, nokukatura mosizugumiso sendi makura ta si ndirumuna nokusizuguma nononkondo. Vakwayita poyiruwo yimwe ngava ruganesa yizugumiso ngoyirwiso.

Ndafita kwa genderere kuza konkore zendi. Ndafita nampo ga kanderere ngomu ga gusire tumanya tutano momukuro tokuliudinga. Makura ta zi kevega lyomarwaneno, age kuna kuduka.

Apa Golyata ga mwene Ndafita, yisinke ga gazarere? Tatu resa asi: “Ta mu sense, morwa simpe mumati tupu gomugeha gosihanga sosiwa.” Golyata ta zigire asi: “Ove koge asi ni simbwa ame, no wizira nge noyiuro ndi?” Age kwa mwene tupu siuro saNdafita nye kapi ga mwene sizugumiso. Age kwa tanterere Ndafita asi kuna kugana medina lyovakarunga woVafilisiti asi nyama zoge tani ya zi gava koyidira nokoyikorama.—1 Samwere 17:41-44.

Elimbururo lyaNdafita kwa likida omu epuro lya kara nomulyo. Gazara tupu omu Ndafita ga zigilire Golyata asi: “Ove kuna kuwiza kwange norufuro nomukove nosilikandwiso, nye ame tani wiza koge medina lyaHOMPA gonombunga dovakwayita, Karunga govakwayita Vaisraeli ogu ono kuswaura.” Ndafita ga yi divire asi Jehova kapi a parwisa muntu koyirwiso. Golyata kapi ga fumadekere Jehova Karunga, ano Jehova ga rugene ko yuma. Ndafita ta tanta asi: “HOMPA mufundi moyita.”—1 Samwere 17:45-47.

Ndafita kapi ga tjilire musika gwaGolyata noyirwiso yendi ndi yi mu dompese. Age kapi ga kere ngwendi Sauru novakwayita vendi. Ndafita kapi ga lihetakanesere naGolyata. Nye age kwa  hetakanesere Golyata naJehova. Nampili ngomu musika gwaGolyata gwa sikire koyiha yonometa 3 ngoso, pokumuhetakanesa noMupangeli gwanayinye, Golyata kumutara ngwendi simbumburu tupu. Mosihorokwa esi, Jehova ga liwapaikilire kudipaga Golyata.

Ndafita ta duka a ze konkore zendi, makura ta hwilire mondjato zendi ta gusa mo kamanya. Ta ka tura mosizugumiso nokusindirumuna nononkondo. Golyata kwa hederere Ndafita, ano ogu ga simbire silikandwiso sendi kwa pitire komeho. Musika gwaGolyata kwa ninkisire ogu nga mu simbire silikandwiso yi mu digopere kupopera sipara saGolyata. Makura Ndafita ta nongo posipara.—1 Samwere 17:41.

Ndafita ta zuguma kamanya. Gazara tupu omu ka vyukilire pwaGolyata. Yosili Jehova kwa divilisire asi Ndafita a ruganese tupu kamanya kamwe. Kamanya ta ka tomona sipara saGolyata, ta ka hwilire. Golyata ta gu kawomba. Ogu ga mu simbilire yirwiso yendi nampo kwa dukire. Ndafita ta gusa rufuro rwaGolyata, ta mu tetesa ko mutwe.—1 Samwere 17:48-51.

Sauru novakwayita vendi tava kara nouradi. Makura vakwayita tava likugilire va rwise Vafilisiti. Yita kwa horokere moomu Ndafita ga tanterere Golyata asi: “HOMPA . . . yige na mu gava one momawoko getu.”—1 Samwere 17:47, 52, 53.

Naina, vakareli vaKarunga kapi ava ru yita. Yokurwa yita ya pita nare. (Mateusa 26:52) Nye simpe twa hepa kuhonena epuro lyaNdafita. Ngwendi Ndafita, twa hepa kutara asi Jehova yige gelike natu karera nokutjira. Pamwe kuvhura tu lizuvhe asi maudigu getu manene unene, nye ago manunu pokugahetakanesa nononkondo daJehova. Nsene tu horowora Jehova ngaKarunga gwetu ntani nokutura epuro mwendi ngwendi Ndafita, kwato maheteko ndi maudigu aga ngaga tu tjilisa. Kwato eyi ya pitakana nonkondo daJehova!