Seth * kwa tanta asi: “Name namukadange kwa zumbanesere yirugana posiruwo simwe. Monomvhura mbali ose ngatu paruka kweyi ngava tu pe vekoro ntani ngatu rugana yirugana yopokaruwogona. Makura mukadange Priscilla ta dompo mutjima ntani ame kwa lizuvhire asi kwato mulyo.

“Ngapi twa lididimikilire? Priscilla nga diworoka nkenye apa nonkango daJesus mwaMateusa 6:34. Edi ga tente Jesus asi, kapisi tu kare nosinka seyi yomungura morwa nkenye ezuva kwa kara nayalyo. Ntani makanderero gendi gelituromo kwa mu vaterere. Ano ame, Episarome 55:22 kwa hengagwida nge. Ngwendi muepisarome, name kwa twikire Jehova udigu wange, makura ta kwafa nge. Nampili ngomu nina kara ngesi noyirugana, ose kudemenena kweyi yomulyo po kuliza nepukururo lyaJesus mwaMateusa 6:20-22. Unene po, ose kwa hedera Karunga pepi ntani nyamwetu.”

Jonathan kwa tanta asi: “Ame kwa kere nosinka apa za pete ngesefa zetu. Morwa yikweparu kwa digopere mosirongo, nomvhura 20 edi twa rugene kwa kere domawoko-woko. Name namukadange tatu tameke kulitangwisa kuhamena yimaliwa. Kapi ngatu ruganesa sikarata mokuranda yuma, morwa twa kere nowoma asi va si pata.

“Nye Nonkango daKarunga nompepo zendi zokupongoka kwa tu vatera tu tokore nawa. Na ya lirongere kutambura yirugana yopokaruwogona, ntani kapi ngatu randanga yininke ya hana hepero. NgoNombangi daJehova, twa gwene hena  evatero kovapuli vakwetetu. Awo kwa tu vaterere moyiruwo yoyidigu.”

Raquel kwa tanta asi: “Apa mugara gwange ga zumbire nge, ame kwa lizuvhire kukora nehandu, ntani kwa guvire unene. Nye na hederere Karunga pepi, ntani ga hengagwidire nge. Mbili zaKarunga kwa poperere nge apa ngani kanderere kwendi. Ayo kwa monekere asi Karunga kwa verwire mutjima gwange.

“Tani mu pandura koNonkango dendi Bibeli, edi da vatera nge ni nyokere po ehandu nonkoko. Nonkango domupositoli Paurusa kwa vaterere nge, edi da kara moVaroma 12:21 asi: ‘Walye omu tarerere udona u mu funde, nye one fundiseni udona kouwa.’

“Kaume kange kwa korangedere nge. Age kwa likidire nge Muudisi 3:6 nokutantera nge asi pwa kara siruwo ‘sokuzumbanesa.’ Alyo kwa kere epukururo lyedigu, nye lya vaterere nge. Ngesi na divara maudigu gange ganare.”

Elizabeth kwa tanta asi: “Nsene kuna lizumbu, kuhepa ekwafo. Ame kwa kere nakaume kange ogu nga kwafa nge nkenye ezuva. Age nga lilisa nge ko nokuhengagwida nge, ntani ga vaterere nge ni lizuvhe asi kwa hara nge. Nina yi diva asi Jehova ga mu ruganesere a hengagwide nge.”

Luis ogu vana tumbura mosirongwa sokuhova, nga vere mutjima, ano yikando yivali nkare a fe. Age ngesi kukara kehina lyompepo zokuheseresa novili 16 mezuva. Age kwa tanta asi: “Ame kukanderera nkenye ezuva kwaJehova. Konyima zokukanderera, ame kugwana nonkondo. Kukanderera ku vatera nge ni twikire kuparuka morwa na huguvara asi Karunga kupakera nge mbili.”

Petra gonomvhura 80 kwa tanta asi: “Ame kwa hara kurugana yininke yoyinzi, nye kapi ani yi vhuru. Pokumona omu dina kusesupa nonkondo dange kuguvisa nge. Ame kuroroka-roroka ntani kwa korera konomutji. Rorunzi ame kudiworoka omu Jesus ga pulire oGuhwe asi nsene  kuvhura maudigu gamwe ga ha mu gwana. Nye Jehova ga nkondopekere Jesus, name kunkondopeka nge. Kukanderera kuvatera nge nkenye ezuva. Ame kulizuvha ko hansa konyima zokukanderera.”—Mateusa 26:39.

Julian ogu ga kere nouvera wouruvi nomvhura konyara 30, kwa tanta asi: “Ame ngesi kugendera posipundi sourema. Nye ame kuhafa morwa kuvatera wopeke. Kuzuvhisa kuvatera nge, ntani Jehova kusikisa mo etumbwidiro lyendi lyokutunkondopeka. Name kulizuvha ngwendi mupositoli Paurusa, ogu ga tente asi: ‘Ame kuvhura nayinye nononkondo dogu a pameke nge.’”—Vafilipi 4:13.

Antonio, kwa tanta asi: “Apa va fire otate kosiponga setuwa, pomuhowo kapi nayi pulire. Awo kwa gendere makura etuwa tali va mbwanda. Kwato eyi na vhulire kurugana ko. Awo kwa kere mosipangero mazuva gatano, makura tava fu. Apa ngani kara nonane kapi ngani lili, nye pwanyamelike ngani lili. Ngani lipura asi: ‘Morwasinke? Morwasinke?’

“Poyiruwo yangoso ngani hundire Jehova a vatere nge ni pangere malizuvho gange ntani a pe nge mbili. Kanunu-kanunu tani ya litura. Ame kwa diworokere eyi za tanta Bibeli asi ‘ehudi kuhorokera nkenye ogu.’ Ngani ka mona hena otate pevhumbuko, morwa Karunga kapi a tanta yimpempa.”—Muudisi 9:11; Johanesa 11:25; Titusa 1:2.

Robert vana tumbura mosirongwa sokuhova, kwa tanta asi: “Name namukadange twa gwana mbili zomomutjima ezi va tumbura moVafilipi 4:6, 7. Ose kwa zi gwana kupitira mokukanderera kwaJehova. Mbili ezi kwa tu vaterere tu tantere ko vagavimbudi ehuguvaro lyetu lyevhumbuko. Nampili ngomu munwetu ga fire kosiponga sondira, ose kudiworoka yiruwo yoruhafo eyi twa kere nage. Ose kudemenena koyiruwo oyo.

“Apa Nombangi nonkwetu da tu tanterere asi kwa tu mwene omu tuna kufaturura epuro lyetu kotivi, ose kwa va pandwire kweyi va tu kanderere po. Yosili Jehova kwa tu kwefe kupitira monombudi dehengagwido edi ngava tu tjangere.”

Moomu tuna yi mono moyihonena tuna tumbura, Karunga kugava ehengagwido kovantu ava vana kuligwanekera nomaudigu. Nove kuvhura a ku hengagwide ndi? Nkenye udigu no ligwanekera nawo pwa kara ehengagwido eli nali ku vatera. * Hundira ekwafo kwaJehova. Morwa age ‘Karunga ogu a kwafa ndi a hengagwida.’—2 Vakolinte 1:3.