To diworoka apa wa ligende, ove simpe munona ndi? Nampo wa remanene kewoko nokuputuka pongoro. To diworoka omu va ku hengagwidire onane woge ndi? Nampo awo kwa kuhwire po honde nokumanga po. Wa lilire nye nonkango dawo donongwa da ku hengagwidire. Apa wa kere unona, ngava ku hengagwida nkenye apa.

Nye ngomu tuna kukura eparu kudigopa. Maudigu kuvhuka ntani udigu kugwana ehengagwido. Maudigu gomoukondi, kapi ava ga kohonona po pokumanga sironda soge ndi pokukudamuna. Tarurura yihonena yimwe.

• Wa zumbanesa rumwe yirugana yoge ndi? Julian kwa tanta asi apa va mu tjidire moyirugana, age kwa guvire unene. Ta lipura asi: ‘Yisinke ngani reresa epata lyange? Ame kwa rugana nomvhura dononzi mosirugana esi nye yiyo vana tjida nge mo.’

• Nampo ono guwu morwa mwa lizumba. Raquel kwa tanta asi: “Apa ga zumbire nge mugara gwange makwedi 18 gana ka pita, ame kwa guvire unene. Ame kwa lizuvhire kukora komutjima ntani kwa veresere nge. Ayo kwa tjilisire nge.”

• Nampo wa kara nouvera wokudira kuveruka. Ove pamwe kulizuvha ngwendi Joba, ogu ga tente asi: “Na roroka kukara nomwenyo.” (Joba 7:16) Nampo nove kulizuvha gwendi Luis, mugara gonomvhura 80, ogu ga tanta asi: “Poyiruwo yimwe ame kulizuvha ngwendi ni fe.”

• Ndi nampo ove kuna hepa ehengagwido morwa wa fisa. Robert kwa tanta asi: “Apa munange ga fire kosiponga sondira, pomuhowo kapi na yi pulire. Makura tani ya lizuvhu kukora, gwendi kooku va tanta moBibeli asi rufuro ngaru tomona mutjima goge.”—Rukasa 2:35.

Robert naLuis naRaquel ntani Julian va gwene ehengagwido komaudigu gawo. Awo kwa gwene ehengagwido kwaKarunga Munankondo nadinye. Ngapi Karunga a gava ehengagwido? Nove nga ku pa ehengagwido eli ono hepa ndi?