Ame kwa hampurukira nge moSaxony, siruwo esi ngali pangere epangero lyaNdovesiranda. Membo lyetu kwa kere mo mbili noruhafo ntani vakondi vange ngava rongo nge nkareso zongwa. Alyo kwa kere epangero lyoUkomunisi, yipo nye sinzi sovantu va tungire moSaxony, ukarelikarunga kapi sa kere sininke somulyo kwawo. Ame kapi na yi pulire asi Karunga yipo ga kara. Monomvhura 18 deparu lyange, ame ngani kwama marongo aga asi Karunga kapi ga kara po ntani vantu va hepa kugwana yokuhetakana.

Morwasinke na lihamekerere moUkomunisi? Morwa na haferere egano eli asi vantu navenye kwa hetakana. Ame kwa pulire asi emona lyosirongo va hepa kuligavera kovantu mokuhagekesa po ruhepo. Yipo na litulire mo unene mombunga zovadinkantu zoUkomunisi. Apa na kere nonomvhura 14 ngani rugana unene mokuwapukurura mapepa gokuzonauka tu ga ruganese hena. Ndango zodoropa zaAue kwa pandwire unene kweyi na rugene yipo va pere nge nzapo nouhwi. Nampili ngomu na kere munona, ame na lidivire novanapolitika vemepangero lyaNdovesiranda. Ame kwa yi mwene ngwendi nina kara nomeho zongwa ntani noyitambo yoyiwa.

Hararasi tupu, eparu lyange tali runduruka. Momvhura 1989 yipo va bamagwire po ekuma eli lya gawinine Ndovesiranda pokatji. Yihorokwa yokutukukisa kwa likweme. Kapi pwa pitire siruwo yipo na ya dimbwilire asi mepangero lyawo ufuki ngava ruganesa. Pasihonena, vantu ava ngava dili kukwatesa ko Ukomunisi kapi va va tere asi mulyo. Morwasinke ya horokerere ngoso? Ose Vakomunisi nani kapi twa pura asi vantu navenye kwa hetakana? Ndi kuuyunga tupu yininke eyi atu dili kurugana? Makura tani tameke kukara nosinka.

Yipo na rundwilire yitambo yange, tani tameke kudimba nokufanaika. Ya tompokere nge kuza kounivesiti ni ka twikire nelirongo lyange yipo ni ya sikise mo sitambo sange sokukara mbimbi. Makura tani ya hageke kukwama nkareso zongwa ezi va rongere nge vakurona vange. Ano kukara novakadona wovanzi nokulihafesa yiyo ya kere nomulyo kwange. Nye kudimba nokulihafesa kapi ya gusire po sinka esi na kere naso. Nampili  mafano aga ngani fanaike kapi ngaga retere nge ruhafo. Yisinke ngayi horoka komeho? Yisinke twa karera po ose vantu?

Ya tetukisire nge sili apa na gwene malimbururo komapuro aga ngani lipura. Ezuva limwe kongurova, name novarongwa vakwetu kwa zogerere kuhamena meho. Mandy * murongwa mukwetu, age kwa kere gumwe goNombangi daJehova. Ngurova zoozo, ta korangeda nge. Age kwa tente asi: “Andreas, nsene ono hara kugwana malimbururo komapuro goge kuhamena eparu ntani meho, wa hepa kulironga Bibeli.”

Ame kapi na yi pulire nawa-nawa, nye na tokwere kupapara malimbururo moBibeli. Mandy ta tantere nge ni rese Ndaniyera egaununo 2, ano eyi na resere kwa tetukisire nge. Uporofete owo kwa faturura omu mapangero gokulisiga-siga ga pangera dogoro mosiruwo setu. Ta likida nge hena mauporofete gomoBibeli kuhamena meho. Ame na gwene malimbururo komapuro gange! Yilye ga tjenge mauporofete ogo? Ntani yilye nawa-nawa gokuvhura kupumba eyi ngayi horoka komeho? Nampo Karunga yipo ga kara.

Mandy yipo ga geve nge kwaHorst naAngelika, valikwali ava va vaterere nge ni kwate nawa egano Bibeli. Na ya dimbwilire asi mbunga zoNombangi daJehova zelike azi rongo vantu va dive edina lyaKarunga, Jehova. (Episarome 83:18, NW; Mateusa 6:9) Ame na lirongere asi Jehova Karunga kwa tumbwidira asi vantu ngava ka paruka narunye paapa pevhu moparadisa. Episarome 37:9 kutanta asi: “Ava va huguvara HOMPA ngava tunga sirongo mompora.” Ayo ya hafesere nge apa na divire asi nkenye ogu a limburukwa konompango daKarunga nga ka tunga sirongo mompora.

Nampili ngoso, na kondjere kusiga nkareso zange zondona nokuparuka kuliza neyi azi tanta Bibeli. Kukara mbimbi kwa ninkisire nge ni linenepeke, na hepere kutunga po elinunupiko. Ntani kapi ya rerupilire nge kusiga nkareso zange zondona. Ame kupandura unene Jehova kweyi a lididimikire nokulikida nkenda ntani age kukwata egano ava ava hetekere ko kulimburukwa eyi azi rongo Bibeli.

Monomvhura 18, ame kwa pulire tupu moUkomunisi ntani asi Karunga kapi ga kara po, nye Bibeli za ya rundurura eparu lyange. Eyi na lirongere ya ninkisire nge ni hageke kukara nosinka kuhamena meho. Momvhura 1993, tani gwana ekuho nokukara Mbangi zaJehova. Ano momvhura 2000 yipo na kwere Tabitha muzuvhisi goupampi. Ose kuruganesa siruwo setu mokuronga vantu Bibeli. Wovanzi ava atu ligwana nawo kapi va yi pura asi Karunga yipo ga kara ntani awo kwa pura moUkomunisi. Ayo kuhafesa nge unene apa ani vatere vantu va dive Karunga.

Apa na tamekere kulipakerera kumwe noNombangi daJehova, vakurona vange kapi va yi haferere. Nampili ngoso, awo va ya dimburura nkareso zange zongwa morwa kukara kumwe noNombangi. Vakurona vange ngesi kuresa Bibeli nokuza komapongo, ayo kuhafesa nge unene.

Name naTabitha twa kara noruhafo mononkwara detu morwa kukwama mapukururo gomoBibeli. Apa atu kwama mapukururo gomoBibeli, ayo kunkondopeka nonkwara detu.—Vahebeli 13:4.

Ngesi kapi nina kara hena nowoma meparu ndi sinka seyi yokomeho. Ame kwa hamena kepata lyoruhafo lyovapuli vakwetetu uzuni mudima, ava va kara nombili nouumwe. Ose kulitekura ngwendi vantu namumbyendi. Eyi yiyo na tokomenene meparu lyange, ngesi yina siki mo.