Nhi, poveli. Kupi va tundilira? Karunga kwa sitire vaengeli noumanguruki wokutura po matokoro. Konyima tupu zokumana kusita Adamu naEva, muengeli gumwe kwa ruganesere umanguruki wendi momudona ntani nokutameka kurwanesa. Age ya mu tompokere mokuzeda Adamu naEva va rwanese Karunga. (Genesis 3:1-7; Ehororo 12:9) Bibeli kapi za tumbura edina lyomuengeli ogo ntani nositumbukira esi ga kere naso komeho a ya kare murwanesi. Konyima zapa ga rwanesere, Bibeli kumutumbura asi Satana, kutanta asi “Murwanesi,” ano Muzonaguli, kutanta asi “Muswauli.”—Mateusa 4:8-11.

Urwanesi kapi wa hagerere popena. Mosiruwo saNowa, pwa kere vaengeli ava ‘va zumbire uhingiro wawo’ meguru. Awo kwa wizire pevhu nokuyagusa marutu gopanyama makura tava ya kwara vakadi, yininke eyi ya dira kutumbukira vaengeli.—Juda 6; Genesis 6:1-4; 1 Peturusa 3:19, 20.

Yisinke ya horokerere vaengeli owo wovadona? Apa Karunga ga tokwere kuzonagura po vantu noruhanzo, vaengeli owo kwa sigire marutu gopanyama nokutengura meguru. Nye Karunga kapi ga va pulisilire va tengure ‘kourenga wawo.’ Age kwa va zugumina “konhi kwi memundema” lyEzonauko lyanarunye. (Juda 6; 2 Peturusa 2:4) Vaengeli owo wovadona kwa kara mepangero lyaSatana Muzonaguli, “mukurona gonompepo donondona,” ogu a ‘lipirura, ta kara ngwendi muengeli gomuwa.’—Mateusa 12:24; 2 Vakolinte 11:14.

Bibeli kuronga asi Uhompa waKarunga ndi epangero lyemeguru kwa li tulisire po momvhura 1914. * Ano Satana nonompepo dendi donondona tava va zugumine pevhu. Satana nonompepo dendi donondona yiwo vana kuretesa po udona naunye ou una vhuka ngesi pevhu.—Ehororo 12:9-12.

Nampili ngomu udona una vhuka unene, ntaantani va ka u hagekese po. Ano nompepo donondona ngava ka di manga. Konyima zokupangera Uhompa waKarunga nomvhura 1 000, nompepo donondona ngava di mangurura karuwogona tupu nokukapukisa hena vantu. Makura ntani nye ngava ka di zonagwilira po.—Mateusa 25:41; Ehororo 20:1-3, 7-10.