NOMVHURA 3 000 da ka pita, Joba ga yi dimbwilire asi yidira kuvhura kuturonga kuhamena yirugana yaKarunga. Nkareso zayo kutuninkisa tu yi fanekese koyininke yoyinzi. Yidira kwa yi tumbura moBibeli tu lirongere ko kuhamena eparu ntani elikwatakano lyetu naKarunga. Tu konakoneni yihonena yimwe.

Vantu ava va kere moJerusarema va divire yisampamema, eyi ngayi tungire yikorogo yayo keguru lyononzugo. Yisampamema yimwe kwa tungire yikorogo yayo montembeli ezi ga tungire Saromo. Yisampamema oyo kwa gwene evango lyewa lyepopero lyokuvhura kurerera vana vayo pwa hana madonganeso.

Mutjangi gEpisarome 84 kwa kere muna Kora, ogu nga rugana montembeli sivike simwe konyima zomakwedi ntazimwe, ga mwene yikorogo oyo montembeli. Age kwa here a kare ngwendi yisampamema eyi ya kere nkenye apa montembeli, monzugo zaJehova. Age kwa tjenge asi: “Ee, yireru omu na hara ntembeli zoge ove Karunga Munankondo nadinye! Ee, yireru omu na hara kukara mo! Ame kuna diworoka nomukara dontembeli zaHOMPA. Rutu rwange mudima kuna hafere Karunga gomunamwenyo. Nomanzunge gaaga ga tunga sikorogo, yisampamema ya kara nembo lyayene; ayo kutura vana vayo popepi noyizambero yoge, HOMPA Munankondo nadinye, Hompa gwange naKarunga gwange.” (Episarome 84:1-3) Nove novana woge mwa kara neharo lyokukara nkenye apa novantu vaKarunga kombungakriste ndi?—Episarome 26:8, 12.

Muporofete Jeremiya kwa tjenge asi: “NaSamunkoma googu ga diva ruveze rokutengura.” Age ga divire siruwo esi ngava diruka vaSamunkoma va pite mosirongo setumbwidiro. Vasamunkoma ava ava diruka posiruwo somangenyena va tunde moAfrika va ze koMuzogo gwaEuropa va pite zomuramba gwaJorodana kwa va varura asi sivaro sawo kwa pitakana 300 000. Yidira eyi ya diva siruwo sayo sokutengura yi ka utire. Moomu yidira yapeke ayi diruka, ‘nasamunkoma nage ga diva ruveze rokutengura.’—Jeremiya 8:7.

Buke Collins Atlas of Bird Migration kwa tanta asi: “Yidira kwa yi sita nounongo wokudiva siruwo sokudiruka.” Jehova Karunga kwa pa unongo yidira eyi ayi diruka yi dive ruveze, nye age kwa pa vantu evhuliko lyokudiva siruwo noyinema. (Rukasa 12:54-56) Samunkoma kwa mu sita nounongo wangoso, nye vantu mokudiva siruwo esi  tuna kuparuka ntudi va hepa kudiva Karunga. Vaisraeli womosiruwo saJeremiya kapi va pakerere mbili yidiviso yangoso. Karunga kwa fatwilire udigu wawo asi: “Awo kwa nyoka nonkango dange, unongo musinke nye ou vana kara nawo ntaantani?”—Jeremiya 8:9.

Ose twa kara noumbangi asi kuna kuparuka posiruwo azi tumbura Bibeli asi ‘mazuva gopouhura.’ (2 Timoteusa 3:1-5) Honena Samunkoma ogu ga diva ‘ruveze.’

Ekuvi kwa litumbura yikando yoyinzi moBibeli, alyo kwa divikwire nomoSirongo sEtumbwidiro moomu. Bibeli kutanta asi nampili posikorogo lina kara keguru lyondundu alyo kuvhura kumona “yuma yokudipaga li lye,” morwa ‘alyo kutarera koure.’ (Joba 39:27-29) Meho galyo matwe, kuvhura kumona nampili ndimba ana kara ure wokilometa zimwe.

Ngwendi moomu ekuvi ali ‘tarere koure,’ Jehova nage kumona yokomeho. Yipo nye Jehova Karunga ga tente asi: “Kutunda ketameko ame kwa horora eyi ngayi wiza.” (Jesaya 46:10) Nsene tu kwama mavyukiso gaJehova ngatu gwanena mo uwa mounongo wendi wounene.—Jesaya 48:17, 18.

Bibeli kuhetakanesa ava va huguvara mwaKarunga komakuvi asi: “Nye ava ava huguvara ekwafo lyaHOMPA ngava gwana nonkondo donompe. Awo ngava tukisa mavava ngwendi makuvi.” (Jesaya 40:31) Ekuvi kutuka pokuruganesa mpepo. Alyo kuzanza mavava galyo makura tali tuka ngomu mpepo zina kupepa. Ekuvi kapi lya huguvara mononkondo dalyene mokutuka nokupupa. Ngwendi ekuvi, owo va huguvara mwaJehova va diva asi age ngava pa ‘nonkondo dononene.’—2 Vakolinte 4:7, 8.

Mazuva gatatu komeho a ka fe, Jesus kwa tere Jerusarema nokutanta asi: “Jerusarema, Jerusarema! Ove tupu o dipaga vaporofete, to va toona nomamanya ava va ku tumina. Rungapi na here kupongaika vana woge, moomu azi pongaike nhunhwa vana momavava gazo, nye one nokupura si!”—Mateusa 23:37.

Yidira nayinye kwa hara kupopera vana vayo. Yidira eyi ayi utire pevhu ngwendi nhunhwa, kulikunga koyiponga. Apa nhunhwa a zi mono karukodi azo kurondora yitjiyotjiyo, makura tayi dukire momavava gazo. Ano nsene asi upyu ndi mvhura yitjiyotjiyo kuvanda momavava gazinyayo. Jesus nage kwa here kugava epopero lyopampepo kovatungimo moJerusarema. Naina Jesus kuna kutuzigida a ya tu pwizumukise nokutupopera komaudigu nokoyinka yetu yemeparu.—Mateusa 11:28, 29.

Yosili, yinzi natu vhura kulirongera ko koyidira. Ngomu no mona nkareso zoyidira, diworoka yirongwa eyi za tumbura Bibeli natu lirongera ko. Ngano yisampamema yi ku vatere nkenye apa o hare kukara monzugo zaJehova. Huguvara mwaJehova a ku pe nonkondo ngwendi ekuvi. Ntani tambura ezigido lyaJesus pokudiva erongo lyendi eli ngali ku vatera ngwendi moomu nhunhwa a zi popere vana vazo. Ano samunkoma ngano a ku diworokese yihorokwa eyi yina kulikida siruwo esi tuna kuparuka.