MoSondaha kongurangura koyiha yomvhura 1520 vatungi womodoropa zaMeaux pepi naParis kwa va tetukisire eyi va zuvhire mongereka. Awo kwa zuvhire nonkango daKarunga meraka lyawo lyoRufransa kapisi moRuratina hena!

Mutoroki goBibeli Lefèvre d’Étaples (moRuratina, Jacobus Faber Stapulensis), konyima kwa ya tjangerere mukwawo asi: “Kapi to diva omu Karunga ana kuvatera vantu komavango gokulisiga-siga va tambure Nonkango dendi.”

Posiruwo sina, Ngereka zaKatolika ntani novalirongi vamwe womoParis kapi va pulisilire kuruganesa matoroko gomaraka gapeke ga hana asi goRuratina. Yisinke ya tumangedere Lefèvre a toroke Bibeli moRufransa? Ntani ngapi ya mu tompokere mokuvatera vantu va kwate egano Nonkango daKarunga?

Komeho Lefèvre a ya kare mutoroki goBibeli, age kwa konakonene mapuliro govantu nokugatara nsene asi kwa tunda momatjangwa. Age kwa dimbwilire asi matjangwa gamwe kwa ga toroka mepuko. Mepaparo lyendi lyokugwana usili weyi aga tanta matjangwa, yipo ga tamekere kulironga Bibeli Vulgate zomoRuratina zoVakatolika.

Melirongo lyendi olyo, kwa mu ninkisire a tante asi: “Kulironga matjangwa yiko kwelike a ku reta . . . ruhafo ntani ehuguvaro.” Makura Lefèvre yipo ga hagekere kukonakona mapuliro govantu nokutameka kutoroka Bibeli.

Momvhura 1509, Lefèvre yipo ga ndurukire buke zoMapisarome * moRuratina ezi ga gawinine monomukweyo ntano, kukwatera mo ewapukururo eli ga tulire moVulgate. Age kwa lisigire novalirongi vakwawo morwa age kwa here kukwata nawa egano eyi ga tente matjangwa. Nkedi zendi zokufaturura matjangwa kwa kundamene valirongi hena vamwe woBibeli.—Tara kakende “ Omu etoroko lyaLefèvre lya kundamene Martin Luther.”

Nampili ngomu Lefèvre ga kere Mukatolika, age ga yi divire asi mokuwapukurura marongo gomongereka ntudi vantu va hepere kuvaronga Matjangwa. Nye ngapi vantu nava va ronga Matjangwa nsene asi ago kwa kere tupu moRuratina?

Lefèvre kwa here Nonkango daKarunga yiyo ya mu ninkisire a rugane ko yuma yipo vantu va gwane Bibeli. Mokusikisa mo sitambo oso, mwaPembagona 1523 yipo ga pwagesere etoroko lyoMavangeli moRufransa. Etoroko olyo kwa kere mbiliha, eyi yiyo ya vaterere vantu woruhepo va gwane Bibeli ozo.

 Vantu kwa hefe apa va gwene Bibeli ozo. Vagara novakadi kwa hefe mokuresa nonkango daJesus meraka lyavene ano kwa ninkisire Nobibeli 1 200 di pwe kudigavera kovantu konyima tupu zomakwedi gongandi.

Metwaromo lyoMavangeli aga ga torokere, Lefèvre kwa fatwilire asi age kwa torokere mavangeli moRufransa yipo “vantu” womonongereka “va gwanene mo uwa mombudi zongwa ngwendi vantu woRuratina.” Morwasinke Lefèvre ga harerere kuvatera vantu va kwate egano eyi azi rongo Bibeli?

Age ga nongwenene asi marongo nomapuliro gongereka zaKatolika kwa tundilira konompo dovantu. (Marukusa 7:7; Vakorosi 2:8) Ntani ga yi divire asi siruwo sa sikire mo “sokudivisa mbudi zongwa mouzuni mudima yipo vantu ga dire kuvapukisa marongo gosintu.”

Lefèvre kwa horwere magano gepuko gava va rwanesere etoroko lyoBibeli moRufransa. Age kwa tente asi: “Ngapi omu nava ronga vantu asi va sikise mo eyi ga pangerere Jesus, awo kapi vana hara kupulisira vantu va liresere nonkango daKarunga meraka lyavene?”—Varoma 10:14.

Eyi yiyo ya ninkisire valirongi womoUnivesiti zaParis va hetekere ko kuhagekesa sirugana  saLefèvre. MwaSiwogedi 1523, awo kwa silikire etoroko lyoBibeli momaraka aga ngava uyunga vantu morwa asi “tayi zonagura ngereka.” Ngano kapi ga mu poperere hompa gwaFransa, Francis gokuhova, Lefèvre ngano va mu pangwire asi age kurwanesa ngereka.

Lefèvre kapi ga pulisilire nompata dovantu di donganese sirugana sendi sokutoroka Bibeli. Momvhura 1524 konyima zokumana kutoroka Matjangwa goRugereka (aga ga divikwa asi Etestamente Lyepe), age kwa pwagesere buke zoMapisarome moRufransa yipo vapuli va kanderere “nelituromo lyenene nomalizuvho.”

Valirongi tava tameke kukonakona momunene etoroko lyaLefèvre. Awo kwa tokwere asi etoroko lyendi lyoMatjangwa goRugereka va li hwike moyitarameho yovantu, ntani kwa tente asi matjangwa gendi gamwe “kukwatesa ko magano gaLuther.” Valirongi yipo va mu pulire a faturure magano gendi, nye Lefèvre kapi ga va limbwilire makura ta tjwayukire koStrasbourg. Age kwa ka twikilire kukatoroka Bibeli mokahorehore. Nampili ngomu vamwe va mu tere asi kapi ga kere nouradi, nye ga yi divire asi kumwena nkedi zongwa zokulimburura owo va dilire kukara norupandu koyininke ‘yokupongoka’ ndi usili womoBibeli.—Mateusa 7:6.

Konyima zomvhura zimwe kutunda apa Lefèvre ga tjwayukire, hompa gwaFransa, Francis gokuhova, yipo ga mu horowere a kare murongi gwamunendi Charles gonomvhura ne. Sirugana oso kwa pere Lefèvre siruwo a mane etoroko lyendi lyoBibeli. Momvhura 1530, etoroko lyendi lyoBibeli nazinye yipo lya pwire, ntani kwa li ndurukilire ponze zaFransa moAntwerp, mepulisiro lyomupangeli Charles gwautano. *

Lefèvre meparu lyendi nalinye kwa huguvarere asi nongereka ngadi siga marongo gosintu nokukwama Matjangwa. Age kwa yi pulire asi “aso sirugana sankenye Mukriste a rese Bibeli nokuzilironga.” Eyi yiyo ga ruganenene unene mokutoroka Bibeli yipo vantu navenye va zi gwane. Nampili ngomu ngereka zaKatolika za dilire kurundurura marongo gazo gosintu, nye Lefèvre ga vaterere vantu va dive Nonkango daKarunga.