“Ni tare, hawe, sipundi souhompa sina kara meguru, naGumwe ogu ana hingire ko. Ano ogu ga hingilire ko, yimoneka yendi kwa fene ngwendi emanya lyondiro lyajasipesi nemanya lyageege lyasarediyoni. Ano sipundi kwa si kundurukidire ekongoro, yimoneka yalyo ngwendi emanya lyoukwiliva lyasimaragadi.”—Ehororo 4:2, 3.

“Age kuminikira nakunye nouzera wounene, omu mwa kara maruvara nagenye gekongoro. Eyi kwa kere uzera wokuvaima ou wa likidire ekaropo lyaHOMPA.”—Hesekiyeli 1:27, 28.

Mamoneko ogo, kwa ga likidire mupositoli Johanesa nomuporofete Hesekiyeli, ago kwa likidire uyerere waJehova koyininke eyi atu mono, ngwendi mamanya gondiro nekongoro ntani sipundi souhompa. Ago kulikida asi evango eli ga kara Jehova kutetukisa, ewa unene ntani kwa kara mo mbili.

Efatururo lyomamoneko ogo kwa liza nononkango edi ga tjenge muepisarome asi: “HOMPA munene, yige tu fumadeka po unene, age yige tu tjira po unene kupitakana vakarunga navenye. Vakarunga navenye wonomuhoko peke, owo vakarunga woyimpempa, nye HOMPA yige ga sita eguru. Uyerere nefumano kwa mu kundurukida, unankondo nouwa kwa kara montembeli zendi.”—Episarome 96:4-6.

Nampili ngomu Jehova ga nenepa, age kuna tu harere tu mu hedere mekanderero ntani ga tu tumbwidira asi nga tu zuvha. (Episarome 65:2) Karunga kwa tu hara ntani kutupakera mbili, yiyo nye mupositoli Johanesa ga tjangerere asi: “Karunga yige eharo.”—1 Johanesa 4:8.

Murongwa Sitefanusa, “age mugara ga zura Mpepo zoKupongoka, ta nwike keguru, makura ta mono uyerere waKarunga naJesus ana sikama korulyo rwaKarunga. Makura ta tanta asi: ‘Tareni, ame kuna kumona eguru lina zeguruka, ano MunwaMuntu age kuna sikama korulyo rwaKarunga.’”—Yirugana 7:55, 56.

Sitefanesa kwa mwene emoneko eli konyima tupu zomazuva gongandi apa vampitisili woVajuda ava ga uyungisire va dipagere Jesus. Emoneko  eli kwa likidire asi Jesus kwa kere muzuni ntani va mu vhumbwire nokumupa sipundi sokuzeruka meguru. Eyi yiyo mupositoli Paurusa ga tjangerere asi: “Mokonda zeeyi, Karunga yiyo ga mu zerura unene, age yiyo ga mu ruka edina lya pitakana madina nagenye, asi navenye va twire edina lyaJesus nongoro, nava vemeguru nava vepevhu.”—Vafilipi 2:9, 10.

Nye nampili ngomu Jesus va mu zerura, matjangwa kulikida asi age kupakera mbili vantu ngwendi Jehova. Apa Jesus ga wizire pevhu, nga verura vaveli nokupindura vafe. Apa ga zembe mwenyo gwendi, age kwa likidire asi ga hara unene Karunga novantu. (Vaefeso 2:4, 5) Ntaantani Jesus nga ka ruganese nonkondo dendi mokukaretera vantu wovalimburukwi matungiko mouzuni naunye.

Muporofete Ndaniyera kwa tente asi: ‘Ame kuna kutara, na liharuka yipundi youhompa vana kutura pevega. Gumwe ogu ga kererera po ta hingire posipundi simwe souhompa. . . . Apo kwa kere po mayovi gomanzi govantu wokumuruganena, ano mamiliyona govantu kwa sikeme komeho zendi.’—Ndaniyera 7:9, 10.

Memoneko eli, Ndaniyera kwa mwene vaengeli wovanzi. Alyo kwa kere emoneko lyokutetura! Vaengeli ayo yisitwa yonondunge ntani yononkondo. Vamwe kuna kara vaserafi, ano vamwe vakerubi. Bibeli kwa tumbura vaengeli yikando yokupitakana 250.

Vaengeli kapisi vantu ava va parukire nare pevhu. Karunga kwa va sitire nare, komeho zokusita vantu. Apa va sitire evhu, vaengeli yipo va kere ntani awo kwa zigilire koruhafo.—Joba 38:4-7.

Nkedi zimwe vaengeli ava karere Karunga kuna kara pokulihameka mosirugana somulyo sokuzuvhisa mbudi zongwa zoUhompa waKarunga. (Mateusa 24:14) Elihamekomo lyawo mosirugana esi, kwa li likidire memoneko lyomupositoli Johannesa ogu ga tjenge asi: “Ame makura tani mono hena muengeli gumwe ana kutuka pokatji keguru. Age ana kara noMbudi zoNgwa zanarunye asi a zi udisire vepevhu, yirongo nayinye nomarudi nagenye nomaraka nagenye nonomuhoko nadinye.” (Ehororo 14:6) Vaengeli naina kapi vana kuuyunga  novantu ngwendi mosiruwo sanare, nye awo kuna kupitisira ava vana kuzuvhisa mbudi zongwa yipo va gwane vantu wonomutjima donongwa.

“Nye meguru tamu sikama yita: Mikayera [Jesus Kristusa] novaengeli vendi va rwise emukongoro novaengeli valyo. Emukongoro nalyo tali va rwisa novaengeli valyo, makura tava lifundu novaengeli valyo, nevega lyalyo makura tali pili mo meguru. Emukongoro lyenene makura tava li zuguma mo, ezoka lyanare eli ava tumbura asi Muzonaguli ndi Satana, eli ngali pukisa uzuni naunye. Alyo kuna li zugumine pevhu, kuna li zugumine po kumwe novaengeli valyo.”—Ehororo 12:7-9.

Konyima zapa va mene kusita vantu, muengeli gumwe kwa here va mu karere, yipo ga rwanesere Jehova, makura ta kara Satana, kutanta asi “Murwanesi.” Kutunda opo meguru ta mu pili mbili. Mwaza siruwo, vaengeli vamwe tava ya lipakerere nage, tava ya kara nompepo donondona. Awo kurwanesa Jehova nokupukisa vantu va dire kukwama mavyukiso gendi.

Satana nonompepo dendi donondona kwa kara nonyanya. Awo nonkore dovantu ntani yiwo vana kugwederera koruhepo rovantu. Pasihonena, Satana kwa dipagere yimuna novakareli vaJoba. Ntani kwa dipagere vana vaJoba murongo kupitira ‘mekundungu’ eli lya gende nzugo ezi va kere. Konyima zoyo, Satana ta zuguma Joba “masina gomadona morutu rwendi narunye.”—Joba 1:7-19; 2:7.

Ntaantani tupu Satana va ka mu guse po. Kutunda apa va mu zugumina pevhu, ga diva asi “siruwo sendi esi sina hupu ko sisupi.” (Ehororo 12:12) Satana ngava mu zonagura po, ozo mbudi zongwa!

“Ove [Jesus] kwa ku dipagere, yiyo wa zowerera nohonde zoge Karunga vantu womazimo nagenye nomaraka nonomuhoko nomarudi nagenye, yiyo wa tu ninka tu kare ohompa novapristeli vaKarunga gwetu, ava ngava pangera ngohompa evhu nalinye.”—Ehororo 5:9, 10.

Ngwendi moomu va vhumbwire Jesus keparu lyemeguru, vamwe nawo ngava va vhumbwira keparu lyemeguru. Jesus kwa tanterere varongwa vendi asi: “Ame kuna kuza ni ka mu wapaikire uturo. . . . Ngani ka tengura ni ya mu simburure, none ngomu ka kare oku na kara.”—Johanesa 14:2, 3.

 Ava ava zi meguru kuzira mo nositambo. Awo ngava ka lipakerera kumwe naJesus mepangero lyoUhompa eli ngali pangera evhu nalinye nokuretera vantu matungiko. Uhompa owo yiwo ga rongere Jesus varongwa vendi mekanderero eli asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi sikise mo pevhu ngwendi meguru.’—Mateusa 6:9, 10.

Mupositoli Johanesa kwa tjenge asi: “Ame makura tani zuvhu ezwi lyenene kuna kutunda meguru posipundi souhompa, tali tanta asi: ‘Tara, nzugo zaKarunga pozili povantu. . . . Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.’”—Ehororo 21:3, 4.

Emoneko eli kwa tamba kosiruwo apa Uhompa waKarunga, omu mwa hamena Jesus kumwe nava ava zi meguru, ngau ka hagekesa po upangeli waSatana nokukaninka evhu li kare paradisa. Yininke eyi ayi tu koresa nokutuguvisa kapi ngayi ka kara ko hena. Nomfa nado kapi nga di ka kara ko hena.

Yisinke ngayi horokera vantu wovanzi ava va fa, ava va dira kuvhumbwira keparu lyemeguru? Awo ngava ka va vhumbwira pevhu, ngava ka paruke narunye moParadisa.—Rukasa 23:43.