Vantu wovanzi kutanta asi kapi tatu vhuru kudiva eyi ya kara meguru morwa kwato ogu ga tunda mo na vhura kuyitutantera. Olyo kuna kara egano lyepuko. Jesus Kristusa kwa kere meguru komeho a wize pevhu. Age kwa tanterere vampitisili womaukarelikarunga posiruwo sina asi: “Ame kapi na tundira meguru asi, ni ya rugane eharo lyanyamwange, nye asi ni ya rugane eharo lyogu ga tuma nge.” Jesus kwa tanterere hena varongwa vendi yininke eyi ga mwene meguru asi: “MwaTate kwa kara mo mauturo gomanzi.”—Johanesa 6:38; 14:2.

Oguhwe vaJesus kuna kara Karunga, edina lyawo, Jehova, ano ‘uturo’ wawo meguru. (Episarome 83:18) Jehova naJesus Kristusa yiwo velike wokuvhura kutufatwilira nawa eyi ya kara meguru. Awo kwa tu fatwilira yoyinzi eyi ya kara meguru kupitira momamoneko aga va mwene vantu wovalimburukwi.

Yirongwa yina kukwama ko nayi ka faturura eyi va mwene vantu momamoneko aga va tumbura moBibeli. Ngomu no ka resa mamoneko ogo, diworoka asi meguru kapi mwa kara yininke eyi natu vhura kumona ndi tu kwate. Karunga kwa likidire mamoneko ogo monkedi ezi natu kwata egano eyi ya kara meguru. Mamoneko ogo naga ku vatera o kwate egano ava va kara ‘momauturo’ ogo gemeguru.