Ame kwa hampuruka nge momvhura 1960, awo onane nomvhura dawo 17. Otate kwa tu sigire ame mezimo. Name nonane kwa tungire nomama wovagara nava wovakadi mokadoropagona Burg, moNdovesiranda. Sinzi sovantu kapi va pulire mwaKarunga, kukwatera mo nepata lyetu. Kapi twa kere nosinka kuhamena Karunga.

Ame ngani hafere kukara nomama wovagara. Awo ngava pe nge yirugana yoyinzi ngwendi pokutuma nge ni ronde koyitji yipo ni ka sahe nomutayi. Apa na kere munona ngani hafere kudanauka. Eparu lyange kwa kere lyoruhafo.

Ame kwa ligwanekerere nosiponga apa na kere nonomvhura ntambali. Ame opo ntani nina kutameka mvhura zange zauvali kosure. Monzira zange zokuza kembo, tani rondo kevera lyorutjeno. Apa na rondere keguru ure wonometa 8 makura rutjeno taru hwike nge, tani pwilire. Apa na ka pwirurukire mosipangero, mawoko gange kapi gana kurugana. Ago kwa pire unene, va hepere kugateta yipo honde zi dire kuzonauka. Eyi kwa guvisire unene onane ntani omama wovagara nava wovakadi. Morwa unona, kapi na kwete egano omu kudira mawoko ngayi kundama eparu lyange.

Konyima zapa va dumbwire nge yipo na tengwire kosure. Vanasure vakwetu ngava hepeke nge, kuzundura nge ntani nokuzuguma nge yininke morwa kwato mawoko gokulikandwisa. Nkareso zawo kwa koresere nge unene. Konyima yipo va twere nge kosure zoyirema ezi za kere nohositera. Morwa sure ozo kwa kere ure nembo, onane nomama kapi ngava vhuru kukadingura nge. Ngani va mono tupu pepato. Monomvhura murongo kapi na kere nonane ndi nomama.

Ame kwa lirongere kurugana yininke nonompadi. Pasihonena, ame kwa lirongere kulisa rutugo nononyara dokonompadi. Na lirongere hena kuliputja komazego nokulifufura nonompadi dange. Na lirongere hena kuruganesa nompadi dange ngomu ngani uyunga novantu. Yosili, nompadi dange kwa ya kere ngwendi mawoko.

Ame kwa here kuresa nobuke doukwakonentu.  Poyiruwo yimwe ngani gazara ngwendi ni gwane ko mawoko goyivera yipo ni ruganese ko. Apa na kere nonomvhura 14 yipo na tamekere kukoka makanya. Ame kwa lizuvhire asi ta yi ninkisa nge ni lifane novantu ava va dilire kukara yirema. Kukoka kwa ninkisire nge ni lizuvhe asi name kuvhura kurugana nayinye. Vakondi yiwo ava koko makanya yi kare asi va kara nomawoko ndi kwato.

Ame ngani lihameke nkenye apa moyilihafeso yokulisiga-siga. Tani ya hamene kombunga zimwe zovadinkantu zedina Free German Youth, azo kwa zi kwatesere ko epangero ntani ame kwa kere hamutjanga, sipundi somulyo. Na lihamekere mombunga zokudimba nokutjanga nomutango ntani momaudano goyirema. Konyima zokumana edeuro yipo na ya tamekere kurugana mongesefa zomodoropa zetu. Apa na ya kulire ame ngani dwara nkenye apa mawoko goyiplastika morwa na here kukara ngwendi vantu navenye.

Ezuva limwe, apa na ndindilire ehina lyorutenda ni ze koyirugana, mugara gumwe ta hedere nge. Ta pura nge omu nani lizuvha nsene Karunga a tengwidira nge mawoko. Nonkango odo kwa tetukisire nge. Ame kwa here kugwana hena mawoko gange, nye kwa digoperere nge kuyipura. Morwa kapi na pulire mwaKarunga, ame kapi na yi pulire asi Karunga yipo ga kara. Kutunda ezuva olyo, ame ngani hendauka mugara ogo.

Ezuva limwe, mukwetu ogu ngatu rugana nage kwa zigidire nge tu ka dingure ekoro lyendi. Mokuzogera nawo, awo kwa uyungire kuhamena Jehova Karunga. Aso kwa kere sikando sange sokuhova kuzuvha asi Karunga ga kara nedina. (Episarome 83:18) Nye ame kwa patanene momutjima asi: ‘Kapi pwa kara Karunga, yi kare asi yige yilye edina lyendi. Na hepa kulikida vantu ava asi mepuko vana kara.’ Yipo na yi tambwire tu zogere kuhamena Bibeli. Nye kapi na vhulire kugava umbangi asi Karunga kapi ga kara po.

Ngomu twa konakonene mauporofete goBibeli, tani tameke kuyipura kanunu-kanunu asi Karunga yipo ga kara. Eyi ga pumba Karunga kwa sikire mo nampili ngomu va yi tjenge nomvhura mayovi da ka pita. Ezuva limwe apa twa zogerere Bibeli, ose kwa hetakanesere yihorokwa yomouzuni nomauporofete ga kara mwaMateusa 24 naRukasa 21 ntani 2 Timoteusa 3. Ngwendi moomu ukaro womuveli au vatere ndokotora a dive uvera womuveli, yihorokwa eyi va tumbura momauporofete kwa vaterere nge ni dive asi ose kuna kuparuka posiruwo esi azi tumbura Bibeli asi “mazuva gopouhura.” * Ayo kwa tetukisire nge pokumona omu mauporofete gana kusikilira mo.

Ame kwa ya yi pulire asi eyi na lirongere usili. Yipo na tamekere kukanderera kwaJehova Karunga nokuhageka kukoka makanya, nampili ngomu naga kokere ure wonomvhura murongo. Tani twikire kulironga  Bibeli konyara mvhura zimwe. Mokumona asi Nombangi daJehova edi da kere koUpumezuva waNdovesiranda kapi va di pulisilire, momazuva 27 Kudumogona 1986 yipo na gwene ekuho mokahorehore metemba lyokulikuhwira.

Ukareli wetu kapi va u pulisilire makura ngatu pongere momambo ntani ame kwa divire tupu vapuli vakwetetu wovasesu. Na hana kuyindindira, epangero yipo lya pulisilire nge ni ze koUtokero waNdovesiranda, oku va pulisilire ukareli woNombangi daJehova. Aso kwa kere sikando sange sokuhova kukara posigongi kumwe novanavazinyetu wovanzi unene. Sihorokwa oso kwa hafesere nge unene.

Apa va zonagwire po ekuma eli lya gawinine Ndovesiranda zokoUpumezuva nezi zokoUtokero yipo ukareli woNombangi daJehova va u pulisilire. Ose kwa hefe mokukarera Jehova nemanguruko. Ame kwa here kulihameka unene mosirugana sokuzuvhisa. Nye, na kere nowoma wokuzogera novantu ava na dira kudiva. Ngani lizuvhu asi ame kwato mulyo morwa urema ntani pounona ame kwa kere membo lyoyirema. Momvhura 1992 yipo na tokwere kuzuvhisa novili 60 mokwedi. Ame kwa hefe apa na di sikisire mo. Makura yipo na tokwere kusikisa mo novili edi nkenye kwedi nokutwikira ure wonomvhura ntatu.

Ame nkenye apa kudiworoka nonkango domoBibeli asi: ‘Ngwendi moomu navenye va dira nonkondo, name kutupu nonkondo.’ (2 Vakolinte 11:29) Nampili ngomu na kara sirema, ame kugazara ntani kuuyunga. Ame kukondja paapa na hulira mokuvatera wopeke. Urema ou kuvatera nge ni kwate egano yirema. Ame na kwata egano kukora kokudira kuvhura kurugana yimwe morwa urema. Ame kuhetekera ko kukorangeda ava ava lizuvhu ngoso. Kuvatera wopeke monkedi ozo kuhafesa nge.

Poyiruwo yimwe name kuguva, morwa kulizuvha ngwendi ni kare nomawoko yipo ni genderere kurugana yirugana. Nonkango edi adi vatere nge nkenye ezuva kuna kara asi: ‘Ame kuvhura nayinye nononkondo dogu a pameke nge.’ (Vafilipi 4:13) Nkenye ezuva Jehova ku pa nge nonkondo yipo ni sikise mo yirugana yankenye ezuva. Na yi diva hena asi Jehova kapi nga sigilira nge. Eyi yiyo ngani dilira kuhageka kumukarera.

Jehova kwa tungika nge ni kare nepata lyange. Mukadange Elke, mukadi gomuwa gombili neharo. Ntani na kara hena novambya novakuru wopampepo mombunga zoNombangi daJehova.

Etumbwidiro lyaKarunga lyoParadisa omu nga ka ninka ‘nainye yi kare yoyipe’ kukwatera mo mawoko gange kukorangeda nge unene. (Ehororo 21:5) Ame kukwata nawa egano eli etumbwidiro apa ani gazadara ko eyi ga rugene Jesus apa ga kere pevhu. Age kwa verwire wokufa mawoko ntani mugara ogu va tetere kutwi. (Mateusa 12:13; Rukasa 22:50, 51) Matumbwidiro gaJehova noyitetu eyi ga rugene Jesus ya vatera nge ni yi pure asi ntaantani ngani ka kare nomawoko gange.

Etungiko lyenene po kwange kuna kara kudiva Jehova Karunga. Age tate ntani mukwetu, ogu a hengagwida nge nokunkondopeka nge. Ame kulizuvha ngwendi hompa Ndafita ogu ga tjenge asi: “HOMPA kugamena, ta popere nge; . . . Age kwa kwafa nge, yiyo yina hafesa nge.” (Episarome 28:7) Ame kuna hara kukwama usili woBibeli eparu lyange nalinye. Ame kwa u tambura nampili ngomu na dira kukara nomawoko.