Kwato gumwe ga kara nefano lyene-lyene lyaJesus. Efano lyendi kapi va litjokwere pemanya ndi va li faneke nkenye oku. Nampili ngoso, vafanaiki va hetekera ko kufaneka omu ga fene.

Vafanaiki ava kapi va diva nawa-nawa omu ga fene Jesus. Sinzi sovafanaiki kufaneka omu ga fene Jesus kuliza nonompo ndi nomapuliro gawo ntani nomu va liharera lifane. Nampili ngoso, mafano aga ava faneke kuhamena Jesus kwa kundama mutaro govantu kuhamena Jesus neyi nga rongo.

Mafano gawo aga va faneka kuhamena Jesus kwa mu likida age nonohuki dononde nononzwedu ndi ana guvarara. Vamwe kumufaneka ngwendi muengeli ndi pamwe site sina mu kundurukida komutwe gwendi ndi ana likara ure novantu. Mafano ogo kulikida nawa-nawa omu ga fene Jesus ndi? Kupi natu gwana mauzera? Nsene tu konakona eyi ya kara moBibeli kuvhura yi tu vatere tu kwate egano omu nampo ga fene Jesus. Ntani kuvhura yi tu vatere tu kare nomutaro gouhunga kumuhamena.

Odo yido nonkango ga uyungire Jesus mekanderero apa ga gwene ekuho. (Vahebeli 10:5; Mateusa 3:13-17) Ngapi rwa fene oro rutu? Apa muengeli Ngabiliyera ga tanterere Mariya asi: “Ngo kara marutu gavali, ngo hampuruka mukeke gomugara,” apo kwa pitire po nomvhura 30 ngoso. (Rukasa 1:31, 35) Jesus kwa kere muntu gokusikilira mo, ngwendi moomu ga kere Adamu pomuhowo. (Rukasa 3:38; 1 Vakolinte 15:45) Jesus kwa kere muntu nawa-nawa, nampo sihwi sendi kwa fene sozina, Mariya.

Mokulisiga noVaroma, Jesus ga kere nononzwedu kuliza nompo zoVajuda. KoVajuda nonzwedu kwa kere sidiviso sefumadeko, ado kapi da kere dononde unene ntani ngava di pakere mbili. Tuna si huguvara asi Jesus nga tete nonzwedu nonohuki dendi. Vaava tupu va kere Vanasili yiwo ngava dili kuteta nohuki dawo, ngwendi Simisoni.—Numeri 6:5; Vapanguli 13:5.

Monomvhura 30, Jesus kwa kere muhongi goyikungu, age nga rugana pwa hana mahina. (Marukusa 6:3) Yipo nye, rutu rwendi kwa peme. Apa ga tamekere sirugana sokuzuvhisa, ‘ta tjida mo montembeli varandesi noyimuna nayinye, nononzwi nonongombe, yimaliva yovasinti ta yi wayagwire pevhu, makura ta gandanga yitafura yawo.’ (Johanesa 2:14-17) Mokusikisa mo sirugana esi kwa hepere muntu gononkondo ntani gokupama parutu. Jesus kwa ruganesere rutu oru ga mu wapaikilire Karunga mokusikisa mo sirugana esi ga mu pere: “Ame nyame tupu kukaudisira hena moyitata peke Mbudi zoNgwa zoUntungi waKarunga, yeeyi yiyo va tumina nge.” (Rukasa 4:43) Ayo kwa hepere nonkondo mokugenda porupandi a zuvhisire sirongo nasinye saPalesitina mbudi ozo.

Nkareso zaJesus zongwa kwa ninkisire vantu “ava wa rorora udigu” va tambure ezigido olyo. (Mateusa 11:28-30) Eharo nonkenda zendi ya likidire mulyo gwetumbwidiro eli lyokupwizumukisa ava vana hara kulirongera ko kwendi. Nampili vanonagona va here kukara pepi naJesus, morwa Bibeli  kutanta asi: “Ta va dingilikida mawoko gendi.”—Marukusa 10:13-16.

Nampili ngomu Jesus ga zuvhire kukora komeho a ka fe, kapi ga kere muntu gokuguvarara. Pasihonena, apa ga kere posipito sononkwara moKana age kwa tjindjire mema ga kare vhinyu. (Johanesa 2:1-11) Poyilika yimwe, age kwa rongere sirongwa somulyo sili.—Mateusa 9:9-13; Johanesa 12:1-8.

Kugusa ko oyo, erongo lyaJesus kwa vaterere vantu va kare nehuguvaro lyomwenyo gwanarunye. (Johanesa 11:25, 26; 17:3) Apa varongwa vendi 70 va mu tanterere eyi va ka limonene mokuzuvhisa, Jesus ‘kwa hefe” nokuvatantera asi: “Hafereni eyi asi madina geni vana ga tjangere meguru.”—Rukasa 10:20, 21.

Vampitisili womaukarelikarunga womomazuva gaJesus kwa here efumamo, ntani awo ngava linenepekere yitumbukira eyi va kere nayo. (Numeri 15:38-40; Mateusa 23:5-7) Mokulisiga, Jesus kwa rongere vapositoli vendi mokudira kukara “vapangeli” wovakwawo. (Rukasa 22:25, 26) Jesus kwa rondwere asi: “Omu likunge kovalirongi womatjangwa, ava va hara kugendagura momarwakani gomare, va tokomena emororo pomarandero.”—Marukusa 12:38.

Poyiruwo yimwe Jesus kapi va mu dimbwilire apa nga kara mokatji kovantu. (Johanesa 7:10, 11) Namplili apa ga kere novapositoli vendi 11 wovalimburukwi kapi va vhulire kumudimburura. Eyi yiyo Judasa ogu ga mu horwere ga geve “sidiviso” pokumuncumita yipo mbunga ezi za ya mu kwete zi mu dimburure.—Marukusa 14:44, 45.

Morwa kapi twa diva maumbangi nagenye, eyi kulikida asi monkedi omu ava faneke Jesus kapisi yimo ga fene. Yomulyo po kuna kara omu atu mu tara ngesi, nye kapisi omu ga fene nawa-nawa.

Konyima tupu zapa ga uyungire nonkango odo, Jesus kwa mu dipagere ntani ga ya vhumbukire. (Johanesa 14:19) Age kwa geve mwenyo gwendi, “gu kare sizoweseso sovanzi.” (Mateusa 20:28) Mezuva lyautatu, Karunga kwa mu pindwire koufe “pampepo” ntani ‘yiyo ga mu ninka asi a monekere’ varongwa vendi vamwe. (1 Peturusa 3:18; Yirugana 10:40) Ngapi ga fene Jesus apa ga monekerere varongwa vendi? Varongwa vendi kapi va vhulire kumudimburura morwa kwa kere mosihwi sapeke. Mariya Mangadarena kwa gazarerere Jesus asi murugani gosikunino; ano varongwa vavali ava va zire koEmausi awo kwa gazarere asi munayirongo.—Rukasa 24:13-18; Johanesa 20:1, 14, 15.

Ngapi tuna kumugazarera Jesus naina? Apa pwa pitire nomvhura 60 konyima zevhumbuko lyaJesus, mupositoli Johanesa kwa mwene Jesus memoneko. Johanesa kapi ga mwene Jesus ana kuzenzerera kosikuruse. Nye kwa mwene “Hompa gohompa, Mupangeli govapangeli,” Hompa goUhompa waKarunga, ogu nga ya funda po nonkore daKarunga, nokuretera vantu mauwa ganarunye.—Ehororo 19:16; 21:3, 4.