Don naMargaret * kwa hefe apa munwawo gomukadi nepata lyendi ga ya va dingwire. Apa va lire murarero gokuhulilira ngepata, Margaret ogu ga divire nawa kutereka, kwa terekere nondya edi va hara unene vatekuru vendi, makaroni nokasi [ndi cheese].

Apa va hingilire navenye, Margaret ta reta nondya nokuditenteka positafura. Apa ga kudumwine ko ruswiko, ta mono asi kasi zelike zina kara porupasa, makura ta tukuka. Age kwa divarere kutura po makaroni.

Yi kare asi nomvhura detu dingapi ndi udivi musinke twa kara nawo, natuvenye kutura mapuko. Kuvhura tu uyunge nonkango depuko ndi tu rugane yininke posiruwo sepuko ndi tu divare yininke. Ngapi omu natu lididimikira mapuko gangoso? Kuvhura tu ga nyokere po ndi? Kukara nomutaro gouhunga ngayi tu vatera tu gwane malimbururo komapuro ogo.

Apa ayi tu tompoka, ose kuhafera epandadeko ntani nokulizuvha asi lina tu fire. Nsene tuna tura epuko, nampili kapi tuna yi divire ndi wopeke kapi vana yi dimburura, ya wapa kutambura epuko lyetu. Elinunupiko lya hepa po mokutambura epuko.

Nsene ove kulizuvha asi nkenye eyi o rugana uhunga, udigu kutambura epuko lyoge ntani ngo hetekera ko kuligusa-gusa mo ndi o pe unzoni gwapeke kepuko lyoge. Malizuvho gangoso narunye kureta yitundwamo yoyidona. Udigu wangoso kuvhura u twikire, ntani kuvhura u korese wopeke. Nampili tu dire kuligwanekera noyitundwamo yoyidona yepuko lyetu ngesi, nye twa hepa kudiworoka asi “nkenye ogu mokatji ketu yige kuzeresa yirugana yendi kwaKarunga.”—Varoma 14:12.

Karunga kutara mapuko monkedi zapeke. Mobuke zoMapisarome, Karunga kwa mu singonona asi “munakenda age muneharo,” ntani asi “kapi a tatagana nkenye apa; kapi a handuka narunye.” Karunga ga diva asi ose kapi twa sikilira mo ntani varupirankondo, morwa age “kudiworoka asi ose mbundu zevhu.”—Episarome 103:8, 9, 14.

NgaGuhya gonkenda, age ana hara asi tu tare mapuko monkedi omu aga tara. (Episarome 130:3) MoNonkango dendi mwa kara mapukururo nomavyukiso aga naga tu vatera nsene tuna tura mapuko ndi wopeke vana tura mapuko.

Narunye, nsene muntu ana tura epuko, age kulihandukisa nokupa wopeke unzoni ndi ta ligusa-gusa mo. Nsene ono tura epuko eli lina koresa gumwe, hundira egusiropo yipo ukaume weni u twikire. Wa rugana rumwe epuko eli lya retesere po ndjorongani ndi lya ku koresere nokukoresa wopeke ndi? Mevango lyokulipangura nyamoge ndi lyokupa unzoni wopeke, ya wapa kurugana ko yuma mokuwapukurura epuko lyoge. Nsene tu  twikira kugazara mapuko aga atu tura, ayo kureta sinka sa hana hepero ntani kugwederera koudigu. Twa hepa kulironga kuwapukurura mapuko getu.

Nsene gumwe ana rugana epuko, ayo ureru kwetu kumutekura monkedi zondona. Ayo ya wapa kukwama epukururo lyaJesus Kristusa eli asi: “Nkenye eyi mwa harera vantu asi ava yi mu ninke, none omu yi va ninke.” (Mateusa 7:12) Nsene ono tura epuko nampili lyenunu, ove kundindira ko kwava wopeke va ku tekure monkedi zombili ndi va divare epuko lyoge. Yipo nye, nove tekura vakweni monkedi zombili nsene vana tura epuko.—Vaefeso 4:32.

Morwasinke aga horokere mapuko? Buke zimwe kwa faturura asi: “Mapuko kuvhura kuhoroka wa hana kuyidivira.” Twa hepa kuyitambura asi poyiruwo noyiruwo natuveye kutura mapuko. Nsene tu sikisa mo nompango domoBibeli, kapi ngatu tura mapuko gomanzi.

Mpango zimwe kuzigwana moYisewe 18:13, ezi azi tanta asi: “O hove tanko kuzuvha ko, ntani ono kulimburura. Nsene o dira kuyirugana, ugova woge neswau lyaamoge.” Kudiva mauzera nagenye kuhamena sihorokwa oso, ngayi ku vatera o dire kuhanduka usimbu ndi o uyunge nonkango donondona. Kupurakena nawa nsene vamwe tava uyunga ngayi ku vatera o nyokere po kutura mapuko ndi o pangure vantu.

Mpango zimwe hena zomoBibeli kutanta asi: “Kombinga zeni, one kareni nombili kovantu navenye ntani.” (Varoma 12:18) Kondja unene mokutunga po nkareso zombili nokuruganena kumwe nava wopeke. Nsene kuna kuruganena kumwe novakweni, va tara asi mulyo nokuvafumadeka nokuhetekera ko kuvapandadeka nokuvakorangeda. Kukara nonkareso zangoso, ngayi ku vatera o gusire po wopeke monkedi zombili nsene vana tura epuko nokudira kuuyunga nonkango donondona.

Tara mapuko ngo mpito zokulirongera ko. Mevango lyokuligusa-gusa mo kweyi ono uyunga ndi ono rugana, ruganesa mpito ozo pokutunga po yikara yoyiwa. Twikira kulididimika nokukara nonkenda nelipangero. Ntani twikira kukara nougomoki nombili neharo. (Vagarata 5:22, 23) Ayo ngayi ku vatera o lironge eyi no rugana sikando sokukwama ko. Hetekera ko mokudira kudemenena unene omu ono kulizuvha kuhamena epuko olyo. Kukara nonkareso zokuzoragana ngayi ku vatera o dire kukara nosinka sosinene.

Kukara nomutaro gouhunga komapuko ngayi tu vatera tu lididimikire nsene gana horoka. Ayo ngayi tu vatera tu kare nombili novakwetu. Nsene tu lirongera ko komapuko getu, ngatu kara vanongo ntani vakwetu ngava tu hara. Ntani kapi ngayi tu dompesa mutjima ndi tu lizuvhe udona-dona. Mokudiva asi vakwetu nawo kuna kulididimikira mapuko gawo, ngayi tu vatera tu tulise po ukaume nawo. Nye yomulyo po, twa hepa kuhonena eharo lyaKarunga ntani nomu a dongwenene po.—Vakorosi 3:13.

Epuko lyaMargaret ogu tuna tumbura ketamekero, lya zonagwisire po edinguro lina ndi? Hawe. Navenye va haferere murarero gwina nampili ngomu ga divarere kutura po makaroni. Konyima zonomvhura dongandi, vatekuru vaMargaret kwa ya simwitilire ko sihorokwa oso sokuzoresa vana vawo nokudiworoka omu va haferere murarero gwina nazinyakurwawo. Alyo epuko tupu lya horokere!