“Nkenye uhwi wouwa nosigava esi sa sikilira mo, kutunda meguru, kwaGuhyetu, musiti gomauzera.” (Jakopo 1:17) Etjangwa eli kwa tamba kougavi waGuhyetu gemeguru, Jehova Karunga. Komauhwi nagenye aga ga gava Karunga, pwa kara uhwi ou wa pitakana po nagenye. Uhwi musinke owo? Nonkango daJesus va tjanga mwaJohanesa 3:16 kutanta asi: “Yeeyi Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”

Karunga kwa tu pa Munwendi gelike a huru. Awo kuna kara uhwi wounene po kupitakana mauhwi nagenye aga twa gwana, morwa awo kwa tu zowora kononzo nokoukurupe ntani konomfa. (Episarome 51:5; Johanesa 8:34) Ose kapi twa kara nononkondo dokulizowora nyamwetu moupika wononzo. Morwa eharo lyendi lyenene, Karunga kwa geve eyi ya hepere po yipo tu manguruke ko koupika owo. Pokugava Munwendi gelike a huru, Jesus Kristusa ngosizoweseso, Jehova Karunga kwa pa vantu wokulimburukwa ehuguvaro lyomwenyo gwanarunye. Yisinke sizoweseso? Morwasinke sa karera nomulyo? Ngapi omu natu gwanena mo mauwa?

Sizoweseso kuna kara mfeto zokufuta mokuzowora ndi mokutengwida eyi va randesere. Bibeli kutanta asi vakurona vetu wokuhova, Adamu naEva kwa va sitire va hana nzo ntani va kere nehuguvaro lyokuparuka narunye moparadisa pevhu noruvharo rwawo oru va ya retere konyima. (Genesis 1:26-28) Nye awo kwa ya kere vananzo morwa kapi va limburukwire Karunga. Yitundwamo, Bibeli kutanta asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.” (Varoma 5:12) Yipo nye, ruvharo rwaAdamu kwa pinga nzo ezi za reta nomfa movantu navenye.

Sizoweseso kuvhura kutanta asi kufuta mfeto zokuliza ndi zokuhetakana nomulyo gweyi yina zumbana. Apa Adamu ga dilire kulimburukwa Karunga, age kwa zonene ntani ga zumbanesere eparu lyendi lyokusikilira mo. Kuliza noBibeli, eyi kwa ninkisa ruvharo rwaAdamu ru pinge nzo nonomfa. Yiyo nye va heperere eparu lyokusikilira mo, eparu lyaJesus, eli ga geve ngonzambo a tu zowore mo moupika wononzo. (Varoma 5:19; Vaefeso 1:7) Eyi yiyo Karunga ga gaverere sizoweseso yipo vantu ngava ka hafere eparu lyanarunye moparadisa pevhu eli va zumbanesere oAdamu naEva.—Ehororo 21:3-5.

Mokumona nayinye eyi ya sika mo, eyi kulikida nawa-nawa asi uhwi wosizoweseso ou au gava ehuguvaro lyokukaparuka narunye, yiwo uhwi wouwa po ou wa pitakana mauhwi nagenye. Mokukwata egano ‘sigava esi sa sikilira mo’ tu konakoneni yitwa eyi nayi tu vatera tu gave mauhwi gomulyo, ngomu vana yi zogere mosirongwa sa ka pita.

Kusikisa mo eharo lyetu. Ose vantu twa kara neharo lyokuparuka narunye. (Muudisi 3:11) Nampili ngomu atu dili kusikisa mo eharo olyo, nye sizoweseso sa tu pa ehuguvaro. Bibeli kutanta asi: “Yeeyi mfeto zononzo nomfa, nye uhwi wonkenda waKarunga  yiwo mwenyo gwanarunye mwaJesus Kristusa, Hompa gwetu.”—Varoma 6:23.

Kusikisa mo yihepwa yetu. Vantu nokuvhura si kutuzowora. Bibeli kutanta asi: “Muntu nokuvhura si a zowore mukwawo, nokuvhura si hena kufutira Karunga yizoweseso, yeeyi mfeto zoukaro womuntu nene unene. Yokuvhura kufuta age nokugwaneka si.” (Episarome 49:7, 8) Yipo nye twa hepera evatero lyaKarunga tu vhure kuzowoka mo moupika wononzo nonomfa. Karunga kwa geve eyi ya hepere po, kupitira ‘mwaJesus Kristusa ogu ga tu zowora.’—Varoma 3:23, 24.

Siruwo souhunga. Bibeli kutanta asi: “Apa twa kere tu vananzo, Kristusa yipo ga tu fililire.” (Varoma 5:8) Morwa sizoweseso kwa si geve “apa twa kere tu vananzo,” eyi kulikida asi Karunga ga tu hara unene. Nampili ngomu atu lididimikire yitundwamo yononzo, ose twa kara nehuguvaro lyokomeho.

Sitambo souhunga. Bibeli kulikida eyi ya tumangedere Karunga a gave Munwendi ngosizoweseso asi: “Karunga omu ga tu horwera eharo lyendi, mokututumina Munwendi thi asi tu parukire mwendi. Eharo lyeli asi, kapisi asi nyose twa here Karunga, hawe, Karunga yige ga tu hara, yiyo ga tuma Munwendi a ya kare nzambo zokugusisa po nonzo detu.”—1 Johanesa 4:9, 10.

Ngapi no likida rupandu kouhwi ou wa pitakana mauhwi nagenye? Diworoka nonkango daJesus domwaJohanesa 3:16 edi adi tanta asi googu “a mu pura” yige nga ka paruka. Kuliza noBibeli, epuro yilyo “ehuguvaro lya pama lyoyininke eyi twa ndindira.” (Vahebeli 11:1) Mokukara nehuguvaro olyo, wa hepa kukara nediwo lyosili. Morwa eyi, tatu kukorangeda o litulire po siruwo mokulironga kuhamena Jehova Karunga, Mugavi ‘gouhwi ou wa sikilira mo,’ ntani neyi wa hepa kurugana yipo ngo ka hafere mwenyo gwanarunye kupitira monzambo zaJesus zosizoweseso.

Ove kuvhura o lironge nayinye eyi pokukonakona nombudi dokoIntaneta zetu www.pr418.com/kwn. Nombangi daJehova nadi ka yi hafera mokukuvatera. Tuna si huguvara asi ngomu no ka lironga kuhamena uhwi owo ntani nomu no gwanena mo uwa, ngayi ku tumangeda o uyunge asi: “Ame tani pandwire Karunga mwaJesus Kristusa, Hompa gwetu.”—Varoma 7:25.