Kapisi ureru kugwana uhwi ou na vhura kuhafera muntu. Nampili ngoso, ogu a mono mulyo gouhwi googu ana gwana uhwi owo. Uhwi ou a mono gumwe asi mulyo, kwagumwe kwato mulyo.

Pasihonena, mudinkantu kuvhura a lizuvhe asi uhwi wouwa po kuna kara selefoni zondiro. Ano mukurona kuvhura a lizuvhe asi uhwi wouwa po kuna kara sininke esi ga pinga kekoro. Konompo dimwe, kupa muntu yimaliwa kuna kara uhwi wouwa po, yipo a ka yi ruganese kwankenye eyi ana hara.

Vantu wovanzi kupapara uhwi wouwa po ou nau hafesa ogu vana kuupa. Nampili ngomu ya dira kukara ureru, kugazadara ko koyininke yongandi kuvhura yi ku tompoke mokugwana uhwi wangoso. Tu konakoneni yitwa yine eyi nayi hafesa ogu vana kupa uhwi.

Eyi ga hara muntu ogo. Mugara gumwe gomoIreland, kwa tere mbasikora ezi va mu pere age nomvhura dendi 10 ndi 11 ngoso asi uhwi wouwa po kwendi. Morwasinke? Age kwa faturura asi: “Kwa zi here unene.” Eyi kulikida asi eyi ga hara muntu yiyo nayi mu ninkisa a hafere uhwi ndi hawe. Yipo nye, gazadara ko muntu ogu ono hara kupa uhwi. Hetekera ko kudiva yininke eyi a tara asi mulyo. Pasihonena, vakurupe kumona asi siruwo sokukara kumwe nepata lyawo mulyo kwawo. Nkenye apa awo kwa hara kumona vana vawo novatekuru vawo. Kulitulira po siruwo sokuza kumwe nawo kepwizumuko kuna kara uhwi wouwa po kwawo.

Mokudiva eyi ga hara muntu wa hepa kupurakena nawa. Bibeli kukorangeda asi: “Nkenye muntu a genderere kuzuvha, nye mokuuyunga . . . ta liwora.” (Jakopo 1:19) Pokuzogera kumwe novakaume ndi vanekoro, purakena nawa yipo o dive eyi va hara neyi va dira kuhara. Ayo ngayi ku vatera o gave uhwi ou nau va hafesa.

 Eyi ga hepa muntu ogo. Muntu kuvhura a hafere uhwi nsene ana u hepa, u kare asi wondiro ndi hawe. Ngapi no diva eyi ana hepa muntu?

Ayo ureru kupura muntu eyi ana hepa ndi eyi ana hara. Nye vantu ava va hara kugava kapi ayi va hafesa yokupura muntu, morwa awo kwa hara kupa muntu uhwi ga hana kuyindindira. Ntani hena, vamwe kuuyunga nemanguruko kuhamena eyi va hara neyi va dira kuhara, nye kapi tava ku tantere yininke eyi vana hepa.

Yipo nye ya wapera kunomena nawa muntu nokudiva ukaro wendi. Muntu ogo, mudinkantu ndi mukurupe ndi mudike ndi ga kwara ndi va mu zumba ndi kwa fisa ndi kurugana ndi ga hageka yirugana? Kugazadara ko koukaro womuntu ngayi ku vatera o dive uhwi ou no mu pa.

Mokudiva eyi ana hepa muntu ogu ono hara kupa uhwi, pura ko vamwe ava va pita moukaro wangoso. Awo ngava ku tantera yihepwa eyi nampo va dira kudiva wopeke. Eyi ngayi ku vatera o gave uhwi ou ana hepa muntu, ou ga dira kugazara asi kuvhura o u mu pe.

Siruwo souhunga. Bibeli kutanta asi: “Ee, ehafo musinke lyokugwana nonkango dina zire mo poruveze rwado.” (Yisewe 15:23) Etjangwa eli kulikida asi kuuyunga nonkango posiruwo souhunga mulyo. Ya lifana hena neyi atu rugana. Ngwendi moomu nonkango edi vana uyunga posiruwo souhunga adi hafesa ogu ana kudipurakena, nouhwi nawo kuhafesa nsene ou gava posiruwo souhunga.

Tu tante asi kaume koge kuna kukwara ndi mudinkantu kuna kumanesa sure. Ndi valikwali vana kundindira mukeke. Edi kuna kara nompito dimwe edi atu vhuru kugava mauhwi. Vamwe kwa yi mona asi ayo ya wapa kudidilika yihorokwa yangoso komeho zosiruwo. Monkedi zangesi, ngayi ku rerupira kuwapaika uhwi ou ngo ka gava posihorokwa sangoso. *

Kapisi kundindira dogoro poyilika yokulikarera ntani ono kugava uhwi. Kugava nkenye apa kureta ruhafo. Nye twa hepa kutakamesa. Pasihonena, nsene mugara a gava uhwi komukadi pwa hana konda zeyi ana kuyiruganena, mukadi kuvhura a gazare asi uhwi owo nampo kuna kulikida asi ana mu hara. Ntudi yi kare asi eyi ana kugazara usili, nsene kapisi ngoso kuvhura kureta epiyagano ndi maudigu. Eyi tayi tu twaredesa kositwa hena simwe somulyo, sitambo seyi ono ku gavera.

Sitambo seyi ono ku gavera. Ngomu vana yi likida, ya wapa kugazadara ko nsene asi ogu ono kupa uhwi kuvhura a kare negano lyepuko. Ntani hena, ya wapa kogu ana kugava uhwi a dive sitambo seyi ana kuugavera. Nampili ngomu ava gazara vantu asi awo kugava uhwi nositambo souhunga, nye wovanzi kugava uhwi poyipito eyi ya fumana morwa makondjeso govantu. Ano vamwe kwa hara kugava asi nawo ngava va pe ndi va fumanene po.

Yisinke natu rugana mokudivilisa asi tuna kara nositambo souhunga sokugava uhwi? Bibeli kutanta asi: “Yirugana yeni nayinye omu yi rugane meharo.” (1 Vakolinte 16:14) Nsene eharo li ku tumangeda o gave, mauhwi goge ngaga retera ruhafo ava ono kugapa, ntani nyamoge ngo limonena ruhafo oru aru tundu mokugava. Ove ngo hafesa Guhyetu gemeguru, nsene o gava kutundilira komutjima. Mupositoli Paurusa kwa pandadekere Vakriste womoKolinte apa va geve yigava mokuvatera vapuli  vakwawo womoJudeya. Paurusa kwa va tanterere asi: “Karunga kwa hara ava ava gava neharo lyewa.”—2 Vakolinte 9:7.

Kugazadara ko koyitwa eyi tuna zogere, ngayi tu vatera tu gave mauhwi aga ngaga hafesa wopeke. Yitwa oyo yiyo ya tumangedere Jehova a gave kovantu uhwi ou wa pitakana mauhwi nagenye. Kuna kukukorangeda o rese sirongwa sokukwama ko esi sa zogera uhwi owo.