Yimo ga lizuvhire mukadona gonomvhura 13 apa va mu pere kambwagona ngouhwi. Munangesefa gomukadi kwa tente asi kompiuta ezi va mu pere oguhwe apa ga kere kosure kwa kere uhwi ou wa rundwilire eparu lyendi. Mulikwali gumwe kwa lizuvhire asi sikarata esi ga rugene mukadendi apa va gwanesere mvhura zimwe mononkwara kwa kere uhwi wouwa po.

Nkenye mvhura, wovanzi kulitulira po siruwo mokupaparera vakaume ndi vanekoro uhwi wouwa po posilika sokulikarera. Sinzi sawo kulizuvha ngwendi moomu va lizuvhire ava va tumbura ketameko lyosirongwa esi. Ove ngapi? Nove ono hara kugava ndi kugwana uhwi ou nau vhura kukuhafesa ndi?

Kapisi googu a gwana uhwi yige gelike na hafa, nye nogu a u gava. Bibeli kutanta asi: “Kugava kwa kara nerago, kwa pitakana kutambura.” (Yirugana 20:35) Ogu vana pe uhwi nsene au tara asi mulyo, ayo kuhafesa ogu ana u gava.

Ngapi nkareso zoge zokugava uhwi nazi kuretera ruhafo ntani nogu ono kuupa? Nsene kapi ono kuvhura kugava uhwi wouwa po, yisinke no rugana yipo uhwi woge va u hafere?