Vantu wovanzi mouzuni mudima kwa yi pura asi Krismesa kuna kara sipito sezuva lyehampuruko lyaJesus. Ngapi omu ono kugazara, Vakriste vanare nava va parukire momazuva gaJesus ngava dana Krismesa ndi? Wa diva eyi azi uyunga ko Bibeli kuhamena kudana mazuva gehampuruko ndi? Kugwana malimbururo komapuro aga, nayi ku vatera o dive nsene asi Krismesa sipito soVakriste ndi hawe.

Konda zokuhova, Bibeli kapi za uyunga ko yuma kuhamena kudana sipito sezuva lyehampuruko lyaJesus ndi lyovakareli vaKarunga wovalimburukwi. Azo kwa simwitira kuhamena yipito yovantu vavali tupu yehampuruko. Navenye kapi va kere vakareli vaJehova, ntani poyipito eyi kwa horokere po yininke yoyidona ngoruha rosipito. (Genesis 40:20; Marukusa 6:21) Kuliza nobuke Encyclopædia Britannica, Vakriste wokuhova kwa nyokerere po “nompo dovapagani kuhamena kudana mazuva gehampuruko.”

Bibeli kapi za tumbura ezuva eli va hampurukire Jesus. Cyclopedia zaMcClintock naStrong kwa tanta asi: “Ezuva lyehampuruko lyaKristusa kwato oku no ligwana nampili mEtestamende Lyepe ndi monobuke dimwe dapeke.” Jesus ngano ga here vasikuli vendi va dane ezuva lyendi lyehampuruko, ngano ga va tanterere ezuva eli va mu hampurukire.

Konda zauvali, Bibeli kapi za uyunga ko asi Jesus ndi varongwa vendi nawo va dene Krismesa. Kuliza nobuke New Catholic Encyclopedia, kudana Krismesa kwa kutumbura sikando sokuhova “mokalindeli zaPhilocalus, mutjangi goMuroma ogu ga tjenge mauzera ogo momvhura 336.” Apa ya horokere eyi azo Bibeli za pwa nare kutjanga ntani age Jesus opo ga tengura nare meguru. Eyi yiyo nye, McClintock naStrong va tjangerere asi “kudana Krismesa kapisi Karunga ga yi tulisa po, ntani kapi va yi tjanga mEtestamende Lyepe.” *

NgoMurongi goMunene, Jesus kwa tanterere vasikuli vendi nayinye eyi ga va harerere asi va rugane, ano ayo kwa yi tjanga moBibeli. Age kapi ga va tanterere asi va dane Krismesa. Moomu tupu mitili a dili kuharera varongwa vendi va rugane eyi ana dili kuvatantera, naJesus nage kapi ga harera vasikuli vendi va ‘pitakanese pweyi va tjanga’ moBibeli.—1 Vakolinte 4:6.

Nye, pwa kara silika somulyo esi va rugene Vakriste wokuhova, Murarero gwaHompa ndi ediworoko lyonomfa daJesus. Jesus ga tanterere varongwa vendi ezuva eli nava rugana silika oso ntani ga va likidire omu nava si rugana. Eyi ga va tanterere ntani nezuva eli va mu dipagere kwa yi tjanga moBibeli.—Rukasa 22:7, 19; 1 Vakolinte 11:25.

Krismesa kuna kara sipito sehampuruko, ano Vakriste wokuhova kapi ngava dana sipito oso sovapagani. Ntani hena, Bibeli kapi za uyunga ko asi Jesus ndi varongwa vendi nawo va dene Krismesa. Kuliza nomauzera aga, Vakriste mouzuni mudima kapi ava dana Krismesa. ▪