1, 2. (a) Erondoro musinke lya parura vantu wovanzi? (Tara efano.) (b) Mavyukiso musinke va kara nago vantu vaKarunga aga naga vhura kuvaparura?

“SIKAMA, TARA, PURAKENA.” Nomvhura 100 da ka pita nonkango odo kwa moneka koyidiviso yoyinene yokonzira zomahina gorutenda koMuzogo moAmerika. Morwasinke? Yipo matuwa aga ngaga taguruka nzira ozo ga dire kulimbwanda nomahina gorutenda. Kulimburukwa marondoro gopoyidiviso yangoso kwa parura vantu wovanzi.

² Jehova kwa rugana yoyiwa kupitakana tupu kutupa yidiviso. Age kuvyukisa vantu vendi yipo ngava ka gwane mwenyo gwanarunye nokunyokera po yiponga. Jehova kwa kara ngwendi musita geharo ogu a pitisire nokurondora nonzwi dendi yipo di dire kuvyuka monzira zosiponga.​—Resa Jesaya 30:20, 21.

3. Ngapi vantu va ya kere monzira zokutwara konomfa?

³ Kutamekera kesito, Jehova kwa pa vantu vendi mavyuksiso ndi mapukururo. Pasihonena, mosikunino saEdeni, Jehova kwa geve mavyukiso  aga ngano ga twaredesere vantu va gwane mwenyo gwanarunye ntani ruhafo. (Genesis 2:15-17) Nye Adamu naEva va nyokere mavyukiso gaGuhyawo geharo. Eva kwa purakenene komavyukiso gaSatana, ntani Adamu kwa purakenene kwamukadendi. Yitundwamo? Navenye kwa ligwanekerere noruhepo ntani nonomfa. Morwa kudira kulimburukwa kwawo, vantu navenye kwa kere monzira zokutwara konomfa.

4. (a) Morwasinke konyima zoRuhanzo va heperere mavyukiso gomape? (b) Ngapi ukaro woupe wa horwere magazaro gaKarunga?

⁴ Karunga kwa pere Nowa mavyukiso aga ga mu parwire. Konyima zoRuhanzo, Jehova kwa pangerere vantu va dire kulya ndi kunwa honde. Morwasinke? Jehova kwa pulisilire vantu va lye nyama. Morwa ukaro owo woupe, awo va hepere mavyukiso gomape asi: “Sininke simwe sokudira kulya one: azo nyama zina kara nohonde, ntundiliro zomwenyo.” (Genesis 9:1-4) Kompangera ezi, ose kulirongera ko magazaro gaKarunga kuhamena eparu, eli lya hamena kwendi. Age ga kara nononkondo dokutupa noveta kuhamena eparu, morwa yige Musiti ntani Mugavi geparu. Pasihonena, age kwa tanta asi vantu kapisi va dipage vakwawo. Karunga kutara eparu nohonde asi kwa pongoka, ntani age nga tengeka ava ava yi ruganesa momudona.​—Genesis 9:5, 6.

5. Yisinke natu ka konakona, ntani morwasinke?

⁵ Konyima zomazuva gaNowa, Karunga ga twikilire kuvyukisa vantu vendi. Mosirongwa esi, tatu ka konakona yihonena yongandi omu Karunga a vyukisa vantu vendi. Eyi ngayi tu nkondopeka etokoro lyetu tu twikire kukwama mavyukiso gaJehova nampili mouzuni woupe.

6. Morwasinke Vaisraeli va heperere kulimburukwa veta zaMosesa, ntani nkareso musinke va hepere kukara nazo?

⁶ Momazuva gaMosesa, Jehova kwa pere vantu vendi mavyukiso omu nava kara nomu nava mu karera. Morwasinke? Maukaro kwa rundurukire. Vaisraeli kwa kere vapika moEgipite nomvhura dokupitakana mafere gavali, omu vantu vamo ngava karere vafe noyikarunga yokuhonga ntani nokurugana eyi ngayi swaukisa Karunga. Apa va mangurukire mo moEgipite, va hepere mavyukiso gomape. Awo kwa kere muhoko ogu ngagu kwama noVeta daJehova. Nobuke dimwe kwa tanta asi nkango zoRuhebeli “veta” kwa likwatakana nonkango “evyukiso, epukururo, erongo.” Veta kwa poperere Vaisraeli koruhonda nokoukareli woyimpempa wonomuhoko edi dava kundurukidire. Apa Vaisraeli ngava purakene kwaKarunga, va gwene matungiko. Apa va ya nyokere Karunga, va ligwanekerere noyitundwamo yoyidona.​—Resa Deuteronomium 28:1, 2, 15.

7. (a) Faturura eyi Jehova ga gaverere mavyukiso koVaisraeli. (b) Ngapi Veta za kere ngwendi mupisuli goVaisraeli?

⁷ Mavyukiso gomape kwa hepere po morwa konda zongandi. Veta kwa wapaikire Vaisraeli kosihorokwa somulyo mositambo saJehova, ewizo lyaMesiyasa, Jesus Kristusa. Veta kwa diworokesere Vaisraeli asi awo kapi va sikilira mo. Azo kwa va vaterere va kwate egano asi va hepa sizoweseso,  nzambo zokusikilira mo ezi ngazi ya gusilira po nonzo dawo. (Vagarata 3:19; Vahebeli 10:1-10) Ntani, Veta kwa poperere ezimo omu ga tundililire Mesiyasa nokuvatera Vaisraeli va mu dimburure apa ga ya monekere. Veta kwa kere ngwendi “mupisuli” gopokaruwogona, dogoro noku ga wizire Kristusa.​—Vagarata 3:23, 24.

8. Morwasinke twa hepera mavyukiso gomoVeta zaMosesa?

⁸ NgoVakriste, nose kuvhura kugwanena mo mauwa momavyukiso aga ga geve Jehova kupitira moVeta. Monkedi musinke? Ose kuvhura tu sikame nokutara ndi tu gazadare ko konompango edi da kara moVeta. Nampili ngomu twa dira kukara konhi zonoveta, ose kuvhura tu di huguvare ngevyukiso meparu lyetu ntani nokukarera Jehova. Age kwa ninka noveta odo va di tjange moBibeli yipo tu lirongere ko, nokutuvyukisa kupitira monompango damo ntani tu likide rupandu kweyi ga tu ronga Jesus ogu ga pitakana Veta. Purakena kweyi ga tente Jesus asi: “Mwa zuvha sa omu va tanta asi, ‘Walye o hondere.’ Nye ame tani mu tantere asi, nkenyogu a tara mukadi, nye a mu dovaukire, nare ana mu honderere momutjima.” Eyi kutanta asi kapisi tu nyokere po tupu ruhonda nye hena twa hepa kunyokera po magazaro nomadowo gomadona.​—Mateusa 5:27, 28.

9. Ukaro musinke wa ninkisire Karunga a gave hena mavyukiso gomape?

⁹ Apa ga monekere Jesus ngaMesiyasa, Jehova kwa geve mavyukiso gomape nokuhorora mauzera gomanzi kuhamena sitambo sendi. Morwasinke ya karerere hepero? Mo-33, Jehova kwa nyokere muhoko goVaisraeli ntani nokuhorowora mbungakriste zi kare vantu vendi. Eyi kulikida asi ukaro wovantu vaKarunga kwa rundurukire hena.

10. Morwasinke Karunga ga gaverere veta zompe kombungakriste, ntani ngapi za lisiga nezi ga geve koVaisraeli?

¹⁰ Jehova kwa geve Veta zaMosesa koVaisraeli zi va ronge omu nava paruka nomu nava mu karera. Kutamekera momazuva govapositoli, vantu vaKarunga kapi va tundilire tupu momuhoko gumwe nye monomuhoko dokulisiga-siga, ano ngava va tumbura asi Vaisraeli wopampepo. Awo kwa tulisire po mbungakriste ntani kwa kere megwanekero lyepe. Jehova kwa va pere mavyukiso gomape omu nava paruka nomu nava mu karera. Yosili, “Karunga kapi ga paka mpongo, nye mwankenye muhoko nkenye ogu a mu tjira, nye ta rugana youhunga, ta mu tambura.” (Yirugana 10:34, 35) Awo ngava kwama “Veta zaKristusa,” ezi za horora nompango edi va tjangera monomutjima kapisi poyiperende yomamanya. Veta ezi kuvyukisa Vakriste va gwanene mo uwa nkenye oku va tunga.​—Vagarata 6:2.

11. Momaruha musinke za mu kundama Mukriste “Veta zaKristusa”?

¹¹ Vaisraeli wopampepo kwa gwanena mo uwa momavyukiso gaJehova kupitira mwaJesus. Komeho tupu a divise egwanekero lyepe, Jesus kwa geve nompangera mbali domulyo. Zokuhova, kwa hamenene kosirugana sokuzuvhisa. Zauvali, kwa hamenene omu nava kara Vakriste nomu nava litekura-tekura. Mavyukiso ogo kwa tembe koVakriste navenye, kukwatera mo  nose, yi kare asi twa kara nehuguvaro lyokukaparukira meguru ndi pevhu.

12. Mpango musinke ga geve Jesus kuhamena kuzuvhisa?

¹² Pwanare, vantu wonomuhoko ngava wiza koIsraeli va ya karere Jehova. (1 Vahompa 8:41-43) Nye Jesus kwa geve mpango ezi za kara mwaMateusa 28:19, 20. (Resa.) Jesus kwa tanterere varongwa vendi ‘va ze’ kovantu navenye. PoPentekoste 33, Jehova kwa yi likidire asi ana hara mbudi zongwa va zi zuvhisire mouzuni mudima. Mezuva olyo, vantu wokusika 120 womombungakriste zompe kwa va zwidire mpepo zokupongoka nokutameka kuuyunga maraka peke-peke koVajuda noku kwava va lihamesere koUjuda. (Yirugana 2:4-11) Ntani va ya zuvhisilire Vasamaliya. Momvhura 36, kwa ya zuvhisilire vantu wovanzi kukwatera mo vapagani ava va dilire kurugana yovamba. Eyi kwa tente asi Vakriste va hepere kuzuvhisira navenye mouzuni!

13, 14. (a) Yisinke ya hamena mo ‘mosipango sosipe’ esi ga geve Jesus? (b) Yisinke tuna lirongere ko kosihonena saJesus?

¹³ Jesus kwa geve hena “sipango sosipe” kuhamena omu natu tekura vanavazinyetu. (Resa Johanesa 13:34, 35.) Twa hepa kuvalikida eharo, ntani nokukara neharo lyokuvafira. Esi kuna kara sininke esi sa dilire kukara moVeta.​—Mateusa 22:39; 1 Johanesa 3:16.

¹⁴ Jesus kuna kara sihonena sosiwa sogu ga likidire eharo lyangoso. Age kwa here unene varongwa vendi ntani ga va fililire. Age kwa harera vasikuli vendi navenye va rugane yokulifana. Eyi yiyo twa hepera kulididimikira maudigu ntani nokukara neharo lyokufira vanavazinyetu.​—1 Vatesaronika 2:8.

15, 16. Moukaro musinke woupe tuna kara, ntani ngapi Karunga ana kutuvyukisa?

¹⁵ Jesus kwa horowora “mukareli gokulimburukwa gonondunge” a paape vasikuli vendi “nondya posiruwo sado.” (Mateusa 24:45-47) Nondya edi kwa kwatera mo mavyukiso aga ava gwana vantu vaKarunga apa maukaro aga runduruka. Ngapi ukaro wetu una kara woupe?

¹⁶ Ose kuna kuparuka “pomazuva gopouhura,” ano ntaantani ngatu ligwanekere noudigu wounene ou wa dira kukara po rumwe. (2 Timoteusa 3:1; Marukusa 13:19) Ntani, Satana novaengeli vendi kwa va zuguma mo meguru va wize pevhu, awo kuna kuretera vantu ruhepo. (Ehororo 12:9, 12) Ose kuna kulimburukwa mpango zaJesus pokuzuvhisira vantu navenye mouzuni momaraka gomanzi kupita pwanare.

17, 18. Morwasinke natu limburukwira komavyukiso ava tupe?

¹⁷ Mbunga zaKarunga kutupa yiruganeso yoyinzi eyi ayi tu vatere mokuzuvhisa. Ove kuyiruganesa ndi? Komapongo getu, ose kugwana mavyukiso omu natu ruganesa yiruganeso oyo monkedi zongwa. Ove kutara mavyukiso ogo asi kuna kutunda kwaKarunga ndi?

¹⁸ Mokugwana matungiko gaKarunga, twa hepa kupurakena nawa komavyukiso nagenye aga a tu pe kupitira  mombungakriste. Nsene tu limburukwa ngesi, ayo ngayi tu rerupira kukwama mavyukiso ‘poudigu wounene,’ apa uzuni naunye waSatana ngava u zonagura po. (Mateusa 24:21) Konyima zoyo, ngatu hepa mavyukiso gomape mouzuni woupe wouhungami omu ngatu ka manguruka ko komapukiso gaSatana.

19, 20. Nobuke musinke ngava ka penuna, ntani yitundwamo musinke?

¹⁹ Momazuva gaMosesa, muhoko goVaisraeli gwa hepere mavyukiso gomape, yipo Karunga ga va pere Veta. Konyima, mbungakriste za hepere kukwama “Veta zaKristusa.” Mokulifana, Bibeli kututantera asi mouzuni woupe, ngatu ka gwana nobuke nomavyukiso gomape. (Resa Ehororo 20:12.) Nobuke odo ngadi ka faturura eyi nga ka hepa ko Jehova kovantu posiruwo oso. Pokukadilironga, vantu navenye ngava ka diva eyi ana va harere Karunga, kukwatera mo ava ngava ka pindura koufe. Ado ngadi ka tu vatera tu ka dive monkedi omu a gazara Jehova. Ose ngatu ka kwata nawa egano Bibeli, makura moParadisa ngatu ka litekura monkedi zeharo zefumadeko ntani zouhunga. (Jesaya 26:9) Gazara tupu yininke yoyinzi eyi ngatu ka diva ntani nokukaronga wopeke mepangero lyaHompa, Jesus Kristusa!

²⁰ Nsene tu kwama mavyukiso va “tjanga monobuke” ntani nokutwikira kulimburukwa Jehova posiruwo seheteko lyokuhulilira, nga ka tjanga madina getu ‘mobuke zomwenyo.’ Ose kuvhura ngatu ka gwane mwenyo gwanarunye! Eyi yiyo twa hepera KUSIKAMA yipo tu rese eyi azi uyunga ko Bibeli, KUTARA yipo tu kwate egano eyi ayi tanta, ntani KUPURAKENA yipo tu limburukwe ngesi mavyukiso gaKarunga. Nsene tu sikisa mo yininke oyo, ose kuvhura ngatu paruke udigu wounene ntani nokuhafera kulironga kuhamena Karunga gwetu gonondunge geharo, Jehova, dogoro narunye.​—Muudisi 3:11; Varoma 11:33.