1. Kutundilira kesito, sikara musinke sa singonona yirugana yaJehova?

JEHOVA naJesus kwa kara mouumwe kutundilira kesito. Jehova kwa sitire Jesus komeho a site yisitwa nayinye. Jesus kwa rugene naKarunga ntani kwa kere ‘ponyonga ngonkurungu.’ (Yisewe 8:30) Vakareli vaJehova nawo ngava ruganene kumwe mosirugana esi ga va pere. Pasihonena, Nowa nepata lyendi kwa tungire kumwe emuwato. Vaisraeli kwa ruganenene kumwe va tunge Nkongoronzugo nokuzizungurura ntani nokuzisimba apa ngava dirukire kevango lyapeke. Pontembeli, awo ngava dimbi nokusika kumwe yiumba va hamberere Jehova nonomusika donongwa. Vakareli vaJehova kwa sikisire mo nayinye oyo morwa ngava ruganene kumwe.​—Genesis 6:14-16, 22; Numeri 4:4-32; 1 Histoli 25:1-8.

2. (a) Ngapi va kere Vakriste wokuhova? (b) Mapuro musinke natu ka zogera?

 ² Vakriste wokuhova nawo ngava ruganene kumwe. Mupositoli Paurusa kwa fatwilire asi nampili ngomu va lisigire mediwo nomoyirugana, awo kwa kere mouumwe. Navenye ngava kwama Mupitisili gwawo, Jesus Kristusa. Paurusa kwa va hetakanesere korutu oru rwa kara nomaruha gokulisiga-siga aga aga ruganene kumwe. (Resa 1 Vakolinte 12:4-6, 12.) Nye ose ngapi? Ngapi omu natu ruganena kumwe mokuzuvhisa, mombungakriste ntani mepata?

3. Emoneko musinke ga mwene mupositoli Johanesa?

³ Mupositoli Johanesa kwa mwene vaengeli ntambali memoneko ava va fudire marumbendo. Apa muengeli gwautano ga fudire rumbendo rwendi, Johanesa ta mono “mbungururu zina kugwa meguru zi gwire pevhu.” Mbungururu ozo kwa ruganesere nsapi mokupaturura sirongo sokonhinhi. Pomuhowo, tamu tundu musi gomunzi ano momusi tamu tundu simbonde gomunzi. Mevango lyokuzonagura yitji ndi nankenye simeno, aso kwa zonagwire po “vantu ava va pira sinongweneso saKarunga poyipara yawo.” (Ehororo 9:1-4) Johanesa ga yi divire asi simbonde kuretesa po ezonauko lyenene ngwendi moomu ya horokere moEgipite posiruwo saMosesa. (Exodus 10:12-15) Simbonde esi ga mwene Johanesa kwa karerere po vagwavekwa ava ava zuvhisa mbudi zezonaguropo maukarelikarunga goyimpempa. Ano vantu mamiliyona ava va kara nehuguvaro lyokukaparukira pevhu kwa lipakerera kumwe nawo. Awo kwa kara mouumwe mosirugana sokuzuvhisa. Aso kwa vatera vantu wovanzi va sige maukarelikarunga goyimpempa ntani va manguruke mo mepangero lyaSatana.

4. Sirugana musinke va hepa kurugana vantu vaKarunga, ntani ngapi omu nava si sikisa mo?

⁴ Ose kwa kara nositumbukira sokuzuvhisira vantu navenye “mbudi zongwa” komeho uhura u wize. Esi kuna kara sirugana sosinene! (Mateusa 24:14; 28:19, 20) Twa hepa kuzigida navenye ava va ‘fa enota’ va wize va ya nwe “mema gomwenyo,” eyi kutanta asi twa hepa kuronga usili woBibeli ava vana hara kuudiva. (Ehororo 22:17) Nye eyi kuyisikisa mo tupu nsene tu kara ‘mouumwe’ ntani nokuruganena kumwe mombungakriste.​—Vaefeso 4:16.

5, 6. Ngapi sirugana sokuzuvhisa a si tu reta mouumwe?

⁵ Mokuzuvhisira wovanzi, twa hepa kuliwapaikira nawa sirugana sokuzuvhisa. Mavyukiso atu gwana kombungakriste kutuvatera tu yi sikise mo. Konyima zepongo lyoyirugana yokuzuvhisa, ose kuza tu ka zuvhisire  vantu mbudi zongwa zoUhompa. Ose hena kuhanesa yimbapiratjangwa yokuhamena koBibeli. Ose kwa hanesa yimbapiratjangwa yokusika komamiliyona uzuni mudima. Poyiruwo yimwe kututantera tu lihameke mehaneso lyokulikarera. Apa atu rugana sirugana esi, ose kusirugana kumwe nomamiliyona aga aga zuvhisa mbudi zokulifana. Ntani kurugana hena novaengeli ava ava vatere vantu vaKarunga va zuvhise mbudi zongwa.​—Ehororo 14:6.

⁶ Ee, ruhafo musi pokuresa Yearbook kuhamena yitundwamo yosirugana sokuzuvhisa uzuni mudima! Gazara hena omu twa kara mouumwe apa atu zigida vantu koyigongi yetu. Koyigongi, natuvenye kupurakena kombudi zokulifana. Yiuyungwa noyidanauka nomalikido kutukorangeda tu ruganene Jehova paapa twa hulira. Apa atu kara poMurarero nkenye mvhura, ose kukara mouumwe novanavazinyetu mouzuni mudima. (1 Vakolinte 11:23-26) Natuvenye kuponga ezuva lyokulifana moNisani 14 kongurova mokulikida rupandu rwetu kwaJehova kweyi ga tu ruganena ntani nokulimburukwa mpango zaJesus. Komeho zoMurarero, ose kuruganena kumwe mokuzigida vantu wovanzi va ya lipakerere nose posilika esi somulyo.

7. Apa atu ruganene kumwe, yisinke atu vhuru kusikisa mo?

⁷ Simbonde gumwe nokuvhura si kuzonagura yininke yoyinzi. Nose pwanyoselike, nokuvhura si kuzuvhisira vantu wovanzi. Nye morwa ose kuruganena kumwe, kuvhura tu zuvhisire vantu wovanzi kuhamena Jehova nokuvatera vamwe va mu hamberere nokumufumadeka.

8, 9. (a) Sihonena musinke ga ruganesere Paurusa mokuronga Vakriste va kare mouumwe? (b) Ngapi natu ruganena kumwe mombungakriste?

⁸ Paurusa kwa tanterere Vaefeso omu nava wapaika mbungakriste, ntani kwa tente asi navenye womombungakriste va hepa ‘kukura momalikwatakano gene-gene.’ (Resa Vaefeso 4:15, 16.) Paurusa kwa ruganesere sihonena sorutu mokufaturura asi nkenye Mukriste kuvhura kuvatera mbungakriste zi kare mouumwe ntani nokukwama Jesus, Mupitisili gombungakriste. Age kwa tente asi maruha nagenye gorutu kwa ga gwanekedesa “kumwe nonongongo edi ga paka po Karunga.” Tu kare asi tu vanona ndi tu vakondi, twa kara noukanguki wouwa ndi hawe, yisinke twa hepa kurugana?

⁹ Jesus kwa pa situmbukira vakuronambunga va pitisire mbungakriste, ntani kuna tu harere tu va fumadeke nokukwama mavyukiso gawo. (Vahebeli 13:7, 17) Eyi kapisi ureru kuyisikisa mo. Nye kuvhura tu hundire Jehova a tu vatere. Mpepo zendi zokupongoka kuvhura zi tu vatere tu limburukwe mavyukiso govakuronambunga. Gazara hena omu natu vatera mbungakriste zetu nsene twa linunupika nokuruganena kumwe novakuronambunga. Mbungakriste zetu  ngazi kara mouumwe ntani eharo kovakwetetu nga li nkondopara.

10. Ngapi vakwafimbunga ava vatere mbungakriste zi kare mouumwe? (Tara efano pepenuno 18.)

¹⁰ Vakwafimbunga nawo kuvatera mbungakriste zi kare mouumwe. Awo kurugana unene va vatere vakuronambunga ntani ose kuvapandura kwanayinye eyi ava rugana. Pasihonena, vakwafimbunga kutara nsene yina gwanena po yimbapiratjangwa eyi nava ruganesa mokuzuvhisa ntani nokutambura navenye ava ava wiza komapongo. Awo hena kurugana unene mokuwapukurura nokuzeresa Sinyanga setu soUhompa. Apa atu ruganene kumwe novanavazinyetu owo, ose kukara mouumwe nokukarera Jehova monkedi zokuliza.​—Hetakanesa Yirugana 6:3-6.

11. Yisinke nava rugana vadinkantu mokuvatera mbungakriste zi kare mouumwe?

¹¹ Vakuronambunga vamwe kwa rugana unene mombungakriste nomvhura dononzi. Nampo ngesi kapi vana kuvhura kurugana ngwendi pwanare morwa vana kurupa. Vanavazinyetu wovadinkatu kuvhura va va vatere. Nsene va gwana edeuro, awo kuvhura kusikisa mo yitumbukira yomombungakriste. Ntani nsene vakwafimbunga va rugana unene, awo ngava kara vakuronambunga komeho. (1 Timoteusa 3:1, 10) Vakuronambunga vamwe wovadinkantu kwa tura po ezokomeho. Vamwe ngesi kuna kara vatareli wonombunga nokuvatera nombungakriste dokulisiga-siga. Ose kuhafa apa vadinkantu ava kara neharo lyokuruganena vanavazinyetu.​—Resa Episarome 110:3; Muudisi 12:1.

12, 13. Yisinke nayi vatera navenye vemepata va ruganene kumwe?

¹² Ngapi natu vatera vemepata lyetu va ruganene kumwe? Kukara noukareli wepata nkenye sivike kutuvatera. Apa vakurona novanona ava kara kumwe mokulironga kuhamena Jehova, awo kunkondopeka eharo lyawo. Poukareli wepata, kuvhura va liyomberese eyi nava ka uyunga mokuzuvhisa, eyi nayi va vatera navenye va liwapaikire. Apa ava zuvhu omu nkenye gumwe gwawo ana kufaturura usili womoBibeli ntani nokudimburura asi navenye va hara Jehova nokuhara kumuhafesa, ayo kuvahedesera kumwe ngepata.

¹³ Ngapi valikwali nava vhura kuruganena kumwe? (Mateusa 19:6) Nsene navenye kwa hara Jehova nokumukarera kumwe, awo ngava kara noruhafo nomouumwe. Awo va hepa kulihara ngwendi moomu ga yi rugene Abirahamu naSara, Isaka naRebeka ntani Elikana naHana. (Genesis 26:8; 1 Samwere 1:5, 8; 1 Peturusa 3:5, 6) Nsene mugara nomukadi va yi rugana oyo,  awo kukara mouumwe nokuhedera Jehova pepi.​—Resa Muudisi 4:12.

14. Nsene mulikwali goge kapi a karere Jehova, yisinke no rugana o nkondopeke nonkwara deni?

¹⁴ Bibeli kulikida nawa-nawa asi kapisi tu kware ava ava dili kukarera Jehova. (2 Vakolinte 6:14) Nye, pwa kara vanavazinyetu vamwe ava va kwara muntu ga hana asi Mbangi. Apa vamwe va lirongere usili awo va kwara nare, ano mulikwali gwawo kapi ga ya kara Mbangi. Vamwe kwa kwere mukareli gwaJehova, nye konyima mulikwali gwawo ta ya sigi mbungakriste. Momaukaro gangoso, Vakriste va hepa kukondja va nkondopeke nonkwara dawo pokulimburukwa mapukururo gomoBibeli. Eyi kapisi ureru. Pasihonena, Mary naDavid ngava karere Jehova kumwe. Makura, David ta ya hageke kuza komapongo. Nye, Mary simpe ga hetekerere ko kukara mukadi gomuwa nokulikida yikara yoSikriste. Age hena nga rongo vana vendi ntazimwe nokutwikira kuza komapongo nokoyigongi. Konyima zonomvhura dongandi, apa vana vawo va ya kulire nokutunda mo membo, Mary kwa twikilire kukarera Jehova nampili ngomu ngayi mu digopere. Makura, David ta tameke kuresa yimbapiratjangwa eyi nga mu sigire Mary. Mwaza siruwo, David ta tameke kuza komapongo gamwe. Mutekurwendi gomumati gonomvhura ntazimwe nga mu pungwire sipundi nkenye apa, ano apa David nga dili kumoneka kepongo, mumati nga uyunga asi: “Mama nina mu rongora naina kepongo.” Konyima zonomvhura 25, David ga tengwire kwaJehova, ano nage namukadendi ngesi va hafa kweyi vana kukarera hena kumwe Jehova.

15. Ngapi valikwali wovakurona nava vatera valikwali wovadinkantu?

¹⁵ Satana kuna kuhomokera mapata. Eyi yiyo valikwali ava ava karere Jehova va hepera kuruganena kumwe. Yi kare asi nomvhura dokuhura kupi  wa kara mononkwara, gazara eyi no uyunga ndi no rugana mokunkondopeka nonkwara deni. Nsene one valikwali wovakurona, one kuvhura mu tulire po valikwali wovadinkantu sihonena sosiwa. Nampo kuvhura mu va zigide va ya lihameke moukareli weni wepata. Awo ngava yi dimburura asi yi kare asi nomvhura dokuhura kupi mwa kara mononkwara, mwa hepa simpe kulihara.​—Titusa 2:3-7.

16, 17. Ruhafo musinke vana kundindira vakareli vaKarunga ava ava ruganene kumwe?

¹⁶ Apa Vaisraeli va zire kosipito moJerusarema, awo kwa ruganenene kumwe. Awo kwa wapaikire eyi va hepere morugendo rwawo. Makura tava gendi kumwe nokulivatera-vatera. Pontembeli, navenye ngava dimbi nokukarera kumwe Jehova. (Rukasa 2:41-44) Naina, ngomu tuna kuliwapaikira eparu mouzuni woupe, twa hepa kukara mouumwe nokukondja kuruganena kumwe. Kuvhura o gazare ko nonkedi omu no yi rugana oyo ndi?

¹⁷ Vantu womouzuni kapi ava ruganene kumwe. Nye ose kupandura Jehova morwa ga tu vatera tu kare nombili ntani tu kwate egano usili. Vantu vendi uzuni mudima kumukarera monkedi ezi ga hara. Ntani unene po pomazuva gopouhura, vantu vaJehova kuna kara mouumwe kupita pwanare. Ngamoomu tupu Jesaya naMika va porofetere asi: ‘Tu rondeni kumwe kondundu’ zaJehova. (Jesaya 2:2-4; resa Mika 4:2-4.) Ee, ruhafo musi ngatu kara naro komeho apa vantu navenye vepevhu ngava ‘gwanekera kumwe’ nokuruganena kumwe va karere Jehova!